މިނިވަންކަން ދެމެހެއްޓޭނީ ސިޔާސީ ގޮތުން ހަމަޖެހުން އޮވެގެން ކަމަށް ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވެއްޖެއެވެ.
ރާއްޖޭގެ ވެރިކަމުގެ އިންތިޒާމުގައި ވާދަވެރި ޕާޓީތައް މިހާރަށްވުރެ ބޮޑަށް ބައިވެރިވުމަށް ރައީސުލްޖުމްހޫރިއްޔާ އިބްރާޙިމް މުޙައްމަދު ސޯލިހު ކުރެއްވި އިލްތިމާސްއަށް މަރުޙަބާ ދަންނަވަމުން ނަޝީދު ކުރެއްވި ޓްވީޓެއްގައި ވިދާޅުވީ، މިނިވަންކަން ދެމެހެއްޓޭނީ ސިޔާސީ ގޮތުން ހަމަޖެހުން އޮވެގެން ކަމަށެވެ.
އަދި ފުރިހަމަ ޑިމޮކްރެޓިކް ނިޒާމަކަށް ދައުލަތުގެ އިޚުލާސްތެރި ވާދަވެރިޔާއާއި، އޭނާގެ ކެބިނެޓުގެ ފާޑުކިއުން މުހިއްމު ކަމަށް ރައީސް ނަޝީދު ކުރެއްވި ޓްވީޓުގައި ވިދާޅުވިއެވެ.
ރައީސް ނަޝީދު އެހެން ވިދާޅުވެފައިވާއިރު، ސިޔާސީ ކަންކަމުގައި ޚިޔާލު ތަފާތުވިޔަސް، ގައުމުގެ އެންމެ މަތީ މަސްލަހަތާއި ގުޅޭ ގޮތުން އެންމެން އެއްބަސް ވާންޖެހޭ ކަންކަން ހުންނާނެ ކަމަށާއި، އެފަދަ ކަންކަމުގައި ސިޔާސީ ވާދަވެރިކަމުގައި ބައިބައިވުމަށް ފުރުސަތު ނުދިނުމަށް ރައީސް ސޯލިޙު ވަނީ ގޮވާލައްވާފައެވެ.
މިނިވަން ދުވަހާއި ގުޅިގެން ޤައުމާ މުޚާތަބު ކުރައްވާ ދެއްކެވި ވާހަކަފުޅުގައި ރައީސް ސޯލިޙު ވިދާޅުވީ، މަލްޓި ޕާޓީ ޑިމޮކްރެޓިކް ނިޒާމެއްގެ ތެރެއިން ގައުމު އާރާސްތު ކުރުމުގެ މަސައްކަތް ކުރަމުން ދާނީ ސިޔާސީ ވާދަވެރިންގެ އަޑު އަހައިގެންކަމަށެވެ.
