ސަމާލުވޭ! އިތުރު 77 މީހަކު ޕޮޒިޓިވްވެ، އެކްޓިވް ކޭސްތައް 688ށް
އިތުރު 36 މީހަކު ބަލިން ރަނގަޅުވެފައިވޭ
ރާއްޖެއިން ފެންނަމުންދާ ކޭސްތަކާ ގުޅިގެން ރެންޑަމް ސާމްޕްލިން އާއި، ކޮންޓެކްޓް ޓްރޭސިންގެ މަސައްކަތް ކޮންމެ ދުވަހަކުވެސް ކުރިއަށްދޭ
ރާއްޖެއިން އިތުރު 77 މީހަކު ކޮވިޑް-19ށް ޕޮޒިޓިވްވެއްޖެއެވެ.
ހޮނިހިރު ދުވަހު ހެލްތް ޕްރޮޓެކްޝަން އޭޖެންސީ (އެޗްޕީއޭ)އިން ކުރި ޓްވީޓެއްގައި ބުނީ، ރާއްޖެއިން އިތުރު 77 މީހަކު ކޮވިޑް-19 އަށް ޕޮޒިޓިވްވެފައިވާ ކަމަށާއި، އޭގެ ތެރޭގައި 56 ދިވެހިން ހިމެނޭ ކަމަށެވެ. އަދި ބަންގްލަދޭޝްއަށް ނިސްބަތްވާ 20 މީހަކާއި، އިންޑިއާއަށް ނިސްބަތްވާ މީހަކުވެސް އޭގެ ތެރޭގައި ހިމެނެއެވެ. އެއާއެކު ރާއްޖެއިން ޕޮޒިޓިވްވި މީހުންގެ ޖުމުލަ އަދަދު ވަނީ 3252ށް އަރާފައެވެ.
އެޗްޕީއޭއިން ބުނީ، އިތުރު 36 މީހަކު ބަލިން ރަނގަޅުވެފައިވާ ކަމަށެވެ. އެއާއެކު ރާއްޖެއިން ކޮވިޑް-19 ޖެހިގެން ރަނގަޅުވި މީހުންގެ ޖުމުލަ އަދަދު ވަނީ 2534ށް އަރާފައެވެ. އަދި މިވަގުތުގެ އެކްޓިވް ކޭސްތަކުގެ އަދަދަކީ 688 ކަމަށް އެޗްޕީއޭގެ ޓްވީޓުގައި ބުނެފައިވެއެވެ.
އޭގެ އިތުރުން، މިވަގުތުވެސް 541 މީހަކަށް އައިސޮލޭޝަން ފެސިލިޓީތަކުގައި ފަރުވާދެމުންދާކަމަށް އެޗްޕީއޭގެ ފަހުގެ ތަފާސްހިސާބުތަކުން ދައްކައެވެ.
ފުރަބަންދަށް ލުއި ދިނުމުގެ މަރުޙަލާތަކުގެ ދަށުން އާންމުން މަގުމައްޗަށް ނުކުމެ އުޅުމުގެ ހުއްދަ ދީފައިވާއިރު، މި ފަހުން ފެންނަމުންދާ ކޭސްތަކުގައި ބިދޭސީންނަށްވުރެ ދިވެހިން ޕޮޒިޓިވްވަމުންދާ ނިސްބަތް އިތުރުކަން ފާހަގަ ކުރެވެއެވެ. އެއާއެކު ބޭރުގައި އުޅޭއިރު ބަލިން ރައްކާތެރިވުމަށް އަޅަންޖެހޭ ފިޔަވަޅުތަކަށް ސަމާލުވުމަށް ޑޮކްޓަރުންނާއި ކަމާބެހޭ ފަރާތްތަކުން ތަކުރާރުކޮށް ދަނީ ގޮވާލަމުންނެވެ. ޚާއްސަކޮށް ބޭރުގައި އުޅޭއިރު މާސްކް އެޅުމާއި، އިޖުތިމާއީ ގައިދުރުކަމަށް ޚާއްސަ ސަމާލުކަމެއް ދޭން ޖެހެއެވެ.
