ލިޔެކިޔުމެއް ނެތް ބިދޭސީންގެ ތެރެއިން ގައުމަށް ފޮނުވާލެވުނު މީހުންގެ އަދަދު 4000ށް ވުރެ މައްޗަށް
25 ޖުލައި 2020 | ހޮނިހިރު 14:32އަނބުރާ ގައުމަށް ފޮނުވާލެވުނު ބިދޭސީންގެ ޖުމްލަ އަދަދު 14000 އަށް އަރާ
އަނބުރާ ގައުމަށް ފޮނުވާލި ބިދޭސީންގެ ތެރެއިން ބަޔަކު ވެލާނާ އެއަރޕޯޓު ތެރޭގައި މަޑުކޮށްލައިގެން
ރާއްޖޭގައި ދިރިއުޅޭ ލިޔެކިޔުމެއް ނެތް ބިދޭސީންގެ ތެރެއިން ގައުމަށް ފޮނުވާލެވުނު މީހުންގެ އަދަދު 4000ށް ވުރެ މައްޗަށް އަރައިފިއެވެ.
މިކަމާއި ގުޅިގެން ފޮރިން މިނިސްޓްރީން ބުނީ މިހާތަނަށް ރާއްޖޭގައި ލިޔެކިއުމެއް ނެތި އުޅޭ ބިދޭސީންގެ ތެރެއިން 4205 މީހަކު އަނބުރާ ގައުމަށް ފޮނުވާލާފައިވާ ކަމަށެވެ. މިއާއި އެކު ކޮވިޑާ ގުޅިގެން ސަރުކާރުން ފެށި ވޮލުންޓަރީ ރިޕެޓްރިއޭޝަން ޕްރޮގްރާމުގެ ތެރެއިން އަނބުރާ ގައުމަށް ފޮނުވާލެވުނު ބިދޭސީންގެ ޖުމްލަ އަދަދު ވަނީ 14،000 ގާތްކޮށްފައެވެ.
ރާއްޖޭގައި މަސައްކަތް ކުރާ ބިދޭސީންގެ ތެރެއިން ލައްކައަކާއި ގާތްކުރާ އަދަދަކަށް ގަވާއިދާ ހިލާފަށް ބިދޭސީން އުޅެމުން އަންނަ ކަމަށް ސަރުކާރުން ވަނީ ހާމަކޮށްފައެވެ. މުޅި މައްސަލައަށް ހައްލެއް ގެނައުމުގެ ގޮތުން އިކޮނޮމިކް މިނިސްޓްރީން ދަނީ މިހާރުވެސް މަސައްކަތްތަކެއް ކުރަމުންނެވެ.
އެގޮތުން އިކޮނޮމިކް މިނިސްޓަރ ވަނީ އަމާޒަކީ މި އަހަރުގެ ތެރޭގައި 20،000 ބިދޭސީން އެ މީހުންގެ ރުހުމުގައި އަނބުރާ ގައުމަށް ފޮނުވާލުން ކަމަށް ވިދާޅުވެފައެވެ. އަދި އަނބުރާ ގައުމަށް ދާން ބޭނުންވާ ފަރާތްތަކަށް ސަރުކާރުން ވަނީ ލުއި ފަސޭހަ ގޮތްތަކެއް ހުޅުވާލާފައެވެ.
ބިދޭސީން ލައްވާ މަސައްކަތް ކުރުވައި އެ މީހުންނަށް މުސާރަ ނުދޭ މައްސަލަތައްވެސް އަންނަނީ މި ފަހަކަށް އައިސް އިތުރުވަމުންނެވެ. މުސާރަ ނުލިބޭ މައްސަލައިގައި ބިދޭސީން ބައެއް މުޒާހަރާތައް ކޮށްފައިވާއިރު، މިފަހުން ހިނގި މުޒާހަރާތަކުގައި ބައެއް ހަމަނުޖެހުން ހިނގާފައިވެއެވެ. މި މުޒާހަރާތައް ކޮންޓްރޯލް ނުކުރެވިއްޖެނަމަ، ގައުމީ ސަލާމަތަށް ނުރައްކަލެއް ކުރިމަތި ވެދާނެ ކަމަށް ސަލާމަތީ ބާރުތަކުން ވަނީ ބުނެފައެވެ.
