ވީ އެންމެ އަވަހަށް ޔޫން ބޭރަށް ފޮނުވާލުމުގެ މަސައްކަތް ދަނީ ކުރަމުން: އާސަންދަ
އެ ކޭސްގައި ކުރިންވެސް އަމްރިތާ ހޮސްޕިޓަލުގައި ސާރޖަރީއެއް ހަދާފައިވޭ
ޔުނާން އާއި އޭނަގެ އަންހެނުން ފާތިމަތު ރިހުލާ (ރިހޫ) މުލިއާގޭ ސަރަޙައްދުގައި ކަންބޮޑުވުން ފާޅުކުރަނީ
ފިލްމީތަރި މުޙައްމަދު ޔުނާންގެ ދަރިފުޅު ޔޫން މުޙައްމަދު ޔުނާން ބޭސްފަރުވާއަށް ފޮނުވާލުމުގެ އިންތިޒާމް ވީ އެންމެ އަވަހަކަށް ހަމަޖައްސައި ދިނުމުގެ މަސައްކަތް ކުރަމުންދާކަމަށް އާސަންދަ ކުންފުނިން ބުނެފިއެވެ.
ދަރިފުޅުގެ ބޭސްފަރުވާގެ އިންތިޒާމު ލަސްވަމުންދާތީ ޔުނާން އާއި އޭނަގެ އަންހެނުން ފާތިމަތު ރިހުލާ (ރިހޫ) މުލިއާގޭ ކުރިމަތީގައި ތިބެގެން އެކަމުގެ ކަންބޮޑުވުން ފާޅު ކޮށްފައިވާއިރު، އެކަމާ ގުޅޭގޮތުން "ރާއްޖެއެމްވީ"އަށް މައުލޫމާތު ދެއްވަމުން އާސަންދައިގެ މީޑިއާ އޮފިޝަލް ވިދާޅުވީ، އެ ކޭސްގައި ކުރިންވެސް އަމްރިތާ ހޮސްޕިޓަލުގައި ސާރޖަރީއެއް ހަދާފައިވާ ކަމަށާއި، ދެވަނަ ސަރޖަރީއެއް ހެދުމަށް ދިއުމުގައި ދަތިތަކެއް ދިމާވެގެން އުޅޭ ކަމަށެވެ.
އެގޮތުން މިވަގުތު ވެސް އަމްރިތާ ހޮސްޕިޓަލަށް 77 ބަލި މީހުން ފޮނުވާލާފައިވާކަން ފާހަގަ ކުރައްވައި އޭނާ ވިދާޅުވީ، ހޮސްޕިޓަލުގެ އެކޮމޮޑޭޝަންގައި ދަތިތަކެއް ކުރިމަތިވި ކަމަށެވެ. އަދި މިވަގުތު އެ ހޮސްޕިޓަލުގައި ތިބި ތިން ދިވެއްސަކު ކޮވިޑް-19އަށް ޕޮޒިޓިވްވެ އައިސޮލޭޓް ކުރުމުގެ އިންތިޒާމުތައް ހަމަޖައްސަމުންދާތީ، އެ ހޮސްޕިޓަލް ތެރެ ވަރަށް ހަލަބޮލި ކަމަށް އޭނާ ވިދާޅުވިއެވެ.
އޭނާ އިތުރަށް ވިދާޅުވީ، ދެން މަސައްކަތް ކުރީ އިންޑިއާގެ ޓްރިވެންޑްރަމްގައި ހުންނަ ކިމްސް ހޮސްޕިޓަލަށް ފޮނުވާ 30 އަކަށް މީހުންގެ ބެޗާއެކު ޔޫންއަށް އާސަންދައިގެ ދަށުން ދެވޭނެ އިންތިޒާމު ހަމަޖެއްސުމަށް ކަމަށް އޭނާ ވިދާޅުވިއެވެ. އެހެންނަމަވެސް، އެ ސަރޖަރީއަކީ ކިމްސް ހޮސްޕިޓަލުގައި ހެދޭނެ ސަރޖަރީއެއް ނޫންކަމަށް ހޮސްޕިޓަލުން މިހާރު އަންގާފައިވާކަމަށް އޭނާ ވިދާޅުވިއެވެ.
އޭގެ އިތުރުން، އަމްރިތާ ހޮސްޕިޓަލަށް ގެންދަން ބޭނުންވި ނަމަވެސް، މިހާރު ޗާޓަރކުރާ ފްލައިޓް ދަނީ ޓްރިވެންޑްރަމްއަށް ކަން ފާހަގަކޮށް އޭނާ ވިދާޅުވީ، އާސަންދައިން އެކަމުގައި ހޮސްޕިޓަލާ މުއާމަލާތްކޮށް، ޕޭޝަންޓް ގެންދެވޭނެ އިންތިޒާމު ހަމަޖެއްސުމަށް މިހާރުވެސް މަސައްކަތް ކުރަމުންދާ ކަމަށެވެ. އަދި އެކަމަށްޓަކައި ދަތުރުކުރުމަށް ބޭނުންވާ ހުއްދަތައް ވެސް ހޯދައިދީފައި ވާކަމަށް އާސަންދައިން މައުލޫމާތުދެއެވެ.
އެހެންނަމަވެސް، ކޮޗިންއަށް ގެންދެވޭނެ އިންތިޒާމްތައް ހަމަޖައްސައިދެވޭތޯ މަސައްކަތްކުރަމުންދާ ކަމަށް އާސަންދައިން ވަނީ މައުލޫމާތު ދީފައެވެ.
އާސަންދައިގެ ދަށުން ދާއިރު، އަމިއްލައަށް ނުދެވޭނެކަން ފާހަގަ ކުރައްވައި އޭނާ ވިދާޅުވީ، ކޮވިޑް-19ގެ މި ޙާލަތުގައި ކަރަންޓީން ކުރުމާއި، ދަތުރުފަތުރުތަކުގެ ހުއްދަ ދިނުމުގައި ވަކި އުސޫލުތަކެއް ޤާއިމު ކުރެވިފައިވާއިރު، އާސަންދައިގެ ދަށުން އަމިއްލައަށް ގޮސް ބޭރު ޤައުމަކަށް "ދޫކޮށްލުން" އެއީ ކުރެވޭނެ ކަމެއް ނޫން ކަމަށެވެ.
ޔޫންގެ މައިންބަފައިންނާ ޙަވާލާދީ މީޑިއާތަކުން ރިޕޯޓް ކޮށްފައިވާ ގޮތުން ޔޫންއަކީ އުފަންވިއިރުވެސް ހިތުގެ މައްސަލަތަކެއް ހުންނަ ކުއްޖެކެވެ. އެގޮތުން ހިތުގެ ވާތްފަޅި މަސައްކަތް ނުކޮށްގެން އޮޕަރޭޝަން ކޮށްފައިވާ ކަމަށާއި، ފުއްޕާމޭ ވެސް "ސްޓިފް" ވެފައިވާކަމަށް ރިޕޯޓް ކޮށްފައިވެއެވެ.
