ބާސާގެ ލެޖެންޑް ޒަވީ ކޮވިޑް-19ށް ޕޮޒިޓިވް ވެއްޖެ

ބާސެލޯނާގެ ލެޖެންޑް ޒަވީ ހެނާންޑޭޒް ކޮވިޑް-19 ށް ޕޮޒިޓިވް ވެއްޖެއެވެ.

ކޮވިޑް-19ށް ޕޮޒިޓިވް ވިކަން ޒަވީ ވަނީ އޭނާގެ އިންސްޓާގްރާމްގައި ހާމަކޮށްފައެވެ. ޒަވީ ބުނީ އޭނާ ކޮވިޑް-19ށް ޕޮޒިޓިވްވި ނަމަވެސް، ހާލު ރަނގަޅު ކަމަށެވެ. އަދި ވައިރަހުގެ އެއްވެސް އަލާމާތެއް އޭނާގެ ހަށިގަނޑުން ފެނިފައިނުވާ ކަމަށްވެސް ވަނީ ބުނެފައެވެ.

ޒަވީ އިތުރަށް ބުނީ ކޮވިޑް-19ށް ޕޮޒިޓިވް ވުމާއެކު އޭނާ މިހާރު އައިސޮލޭޝަނަށް ބަދަލުކޮށްފައިވާ ކަމަށާއި، އޭނާ ކޯޗުކޮށްދެމެން އަންނަ ގަތަރުގެ އަލް ސާދަށް މިވަގުތު އިރުޝާދު ދޭނީ ޓެކްނިކަލް ސްޓާފްގެ ހެޑް ޑޭވިޑް ޕްރަޓްސް ކަމަށެވެ.

ދާދި ފަހުން ޒަވީ ވަނީ ހާއްސަ އިހުތިޔާރެއް ލިބޭ ގޮތަށް އަލް ސާދުގެ އެއްބަސްވުން އާކޮށްފައެވެ. އަލް ސާދުގެ އެއްބަސްވުން ޒަވީ އާކޮށްފައިވަނީ އަންނަ އަހަރުގެ ޖުލައި މަހުގެ ނިޔަލަށެވެ. މި އެއްބަސްވުމުގައި ވަނީ ޒަވީއަށް ހާއްސަ އިހުތިޔާރެއްގެ ދަށުން ވަކި މުއްދަތެއްގެ ނޯޓިސް އެއް ދިނުމަށްފަހު އޭނާ ބޭނުންވާ ކްލަބަކަށް ބަދަލުވެވޭނެކަން ހިމަނާފައެވެ.

ހާއްސަ އިހުތިޔާރެއް ލިބޭ ގޮތަށް އަލް ސާދުގެ އެއްބަސްވުން ޒަވީ އާކުރިއިރު، ބާސެލޯނާގެ ކޯޗަކަށް ޒަވީ ހަމަޖެއްސުމަށް އެ ކްލަބުން މަސައްކަތް ކުރަމުން އަންނަ ކަމަށް ރިޕޯޓުތައް ވަނީ ބުނެފައެވެ.

ސްޕެއިންގެ އިތުރުން ދުނިޔޭގައި އުފެދުނު އެންމެ މޮޅު އެއް މިޑްފީލްޑަރު ކަމަށްވާ ޒަވީ އަލް ސާދަށް ބަދަލުވީ 2015 ވަނަ އަހަރެވެ. އެ ޓީމަށް ކުޅެދިނުމަށް ފަހު ޒަވީ ކޯޗެއްގެ ރޯލުގައި އެ ޓީމާ ހަވާލުވީ މިދިޔަ އަހަރުގެ ޖުލައި މަހުގައެވެ. ޒަވީގެ އިރުޝާދުގެ ދަށުން އަލް ސާދުން ވަނީ ގަތަރު ކަޕާއި ގަތަރު ސުޕަ ކަޕްގެ ތަށި އުފުލާލާފައެވެ.