ހުޅުމާލެ ހޮސްޕިޓަލަށް ވިހަން ދިޔަ މާބަނޑު އަންހެނަކު ކޮވިޑް-19ށް ޕޮޒިޓިވްވެއްޖެއެވެ.

ހެލްތް އިމަރޖެންސީ އޮޕަރޭޝަންސް ސެންޓަރާއި ހަވާލާދީ މީޑިއާ ރިޕޯޓުތައް ބުނާ ގޮތުން، އަންހެން މީހާ ކޮވިޑަށް ޕޮޒިޓިވް ކަން އެނގިފައިވަނީ، ހޮސްޕިޓަލަށް ވިހަން ދިއުމުން އެޑްމިޓްކޮށް ހެދި ޓެސްޓްގެ ނަތީޖާ ލިބުމުންކަމަށެވެ. ހޮނިހިރު ދުވަހުގެ ހެނދުނުގެ ވަގުތެއްގައި ނަތީޖާ ލިބިފައިވާއިރު، އެކަމާއި ގުޅޭ އިތުރު ތަފްސީލެއް އެޗްއީއޯސީން ހާމަކޮށްފައެއް ނުވެއެވެ.

އެ އަންހެން މީހާއަށް ކޮވިޑް ޖެހިފައިވަނީ އެޑްމިޓްކުރި ފަހުން ނުވަތަ ކުރިން ކަމެއް އެނގިފައި ނުވާއިރު މިކަމާއި ގުޅޭ ތަފްސީލް އަދި މިހާތަނަކަށް ހުޅުމާލެ ހޮސްޕިޓަލުންވެސް ހާމަކޮށްފައެއް ނުވެއެވެ.

ހެލްތް ޕްރޮޓެކްޝަން އޭޖެންސީ (އެޗްޕީއޭ)އިން ބުނީ، ހުކުރު ދުވަހު ރާއްޖެއިން އިތުރު 55 މީހަކު ކޮވިޑް-19 އަށް ޕޮޒިޓިވްވެފައިވާ ކަމަށާއި، އޭގެ ތެރޭގައި 31 ދިވެހިން ހިމެނޭ ކަމަށެވެ. އަދި ބަންގްލަދޭޝްއަށް ނިސްބަތްވާ 21 މީހަކާއި، އިންޑިއާއަށް ނިސްބަތްވާ 2 މީހެއްގެ އިތުރުން، ސްރީލަންކާ ރައްޔިތަކުވެސް ހިމެނޭކަމަށް އެޗްޕީއޭއިން ބުނެއެވެ. އެއާއެކު ރާއްޖެއިން ކޮވިޑް-19 އަށް ޕޮޒިޓިވްވި މީހުންގެ ޖުމުލަ އަދަދު ވަނީ 3،175ށް އަރާފައެވެ.

އޭގެ އިތުރުން، އިތުރު 70 މީހަކު ބަލިން ރަނގަޅުވެފައިވާއިރު، މިހާތަނަށް ރާއްޖެއިން ކޮވިޑް-19 ޖެހިގެން ރަނގަޅުވި މީހުންގެ ޖުމުލަ އަދަދު ވަނީ 2498ށް އަރާފައެވެ. އަދި މިވަގުތުގެ އެކްޓިވް ކޭސްތަކުގެ އަދަދު ވަނީ 647ށް އަރާފައެވެ.