އަނދިރި ނުވަތަ އަޑީ ދައުލަތައް ސީޕީގެ ރައްދު: ދިވެހި ދައުލަތުގެ މައްޗަށް ނުފޫޒު ނުފޯރުވޭނޭ!

އިތުރު ފަރާތަކަށް ދިވެހި ދައުލަތުގެ މައްޗަށް އެއްވެސް ނުފޫޒެއް ނުފޯރުވޭނެކަމަށް ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވެއްޖެއެވެ.

ބުރާސްފަތި ދުވަހުގެ ރޭ ރާއްޖެޓީވީގެ ފަލަސުރުހީ ޕްރޮގުރާމްގައި ދިވެހި ދައުލަތުގެ މައްޗަށް ބާރު ފޯރުވާ އަނދިރި ދައުލަތެއް އޮވޭތޯ ސުވާލުކުރުމުން ސީޕީ ވިދާޅުވީ، މިވަގުތުވެސް ދިވެހި ދައުލަތް އޮތީ، ދިވެހި ދައުލަތުގެ ހިންގުމުގެ މައްޗަށް ބާރު ނުވަތަ ނުފޫޒު ފޯރުވޭނެ ހާލަތެއްގައި ނޫންކަމަށެވެ. ސީޕީ ވިދާޅުވީ ފާއިތުވެދިޔަ ދޮޅު އަހަރު ދުވަހަކީ ރާއްޖޭގައި ހަރުކަށި ފިކުރާ ދެކޮޅަށް އެންމެ ބާރު ސްޕީޑްގައި ފިޔަވަޅު އެޅުނު އަހަރުތައް ކަމަށެވެ.

ސީޕީ ވިދާޅުވީ ފުލުހުންނަކީ ދިވެހި ރައްޔިތުންގެ ރައްކާތެރިކަމަށްޓަކައި ގާއިމްވެފައި އޮންނަ މުއައްސަސާއަކަށް ވެފައި، އެނިގަފައިވާ މައުލޫމާތުތަކަށް ބަލާކަމުގައިވާނަމަ ހަރުކަށި ފިކުރަށް ގެނބިފައިވާ މީހުންގެ ފުށުން ދިވެހި ރައްޔިތުންނަށް އޮތް ނުރައްކާ ވަރަށް ބޮޑު ކަމަށެވެ. އެގޮތުން، ހަރުކަށި ފިކުރުމުގެ ތެރޭގައި މަސައްކަތްކުރާ ވަކިވަކި މީހުންނާއި ނެޓްވޯރކްތަކަށް ނިސްބަތްވާ ފަރާތްތަކުގެ ފުށުން ރައްޔިތުންނަށް އޮތް ނުރައްކާ ކައިރިވެފައި، މާ ބޮޑު ކަމަށް ސީޕީ ފާހަގަކުރެއްވިއެވެ.

ޕްރޮގުރާމްގައި ސީޕީ ވިދާޅުވީ، އިސްލާމް ދީނާއި ދެކޮޅު ފިކުރު ފަރާތްތައް ފިޔަވަޅު ނާޅާކަމަށް ބުނެ ދެކެވޭ ވާހަކަތަކަކީ ދޮގު ވާހަކައެއްކަމަށާއި ހަރުކަށި ފިކުރުގެ ވާހަކަ ގިނައިން ދެކެވެނީ އޭގެ ސަބަބުން މުޖްތަމައަށް އޮތް ނުރައްކާ ބޮޑުކަމުންކަމަށެވެ.

ސީޕީ މިހެން ވިދާޅުވެފައިވަނީ، އަނދިރި ދައުލަތެއްގެ ބާރު ދިވެހި ދައުލަތުގެ ތެރޭގައި ގަދަ ކުރަމުން ގޮސް އަނދިރި ދައުލަތުގެ ބާރު ދިވެހި ދައުލަތުގެ އެންމެ އެތެރެއަށް ވަދެފައިވާ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެފައިވާ ދަނޑިވަޅެއްގައެވެ. އެގޮތުން، އެކި މަންސަތަކުގައި ދިވެހިރާއްޖޭގައި ޝެޑޯ ސްޓޭޓް ނުވަތަ އަނދިރި ދައުލަތެއް ވަކިހިއްޕާފައިވާ ކަމަށާއި، އެ ދައުލަތް ރޫޅާލަންޖެހޭ ކަމަށް ސަރުކާރުގެ އިސްފަރާތްތަކުން ދަނީ ބުނަމުންނެވެ. ދީނީ ގޮތުން ހަރުކަށި ފިކުރުގެ މީހުން ހިންގަނީ "އަނދިރި ދައުލަތެއް" ކަމަށް ސިފަ ކުރައްވައި، އެ މީހުން ހުއްޓުވަން ތިން ކަމެއް ކުރަން ރައްޔިތުންގެ މަޖިލިހުގެ ފަރާތުން ތުޅާދޫ ދާއިރާގެ މެމްބަރު ހިސާން ހުސެއިންވެސް ވަނީ މީގެކުރިން ހުށަހަޅުއްވާފައެވެ.