މާލެ ސިޓީގެ ސްކޫލްތަކުގައި ކީ ސްޓޭޖް 3 (ގްރޭޑް 7 އަދި 8) ގެ ކިޔެވުން އޮގަސްޓް 16 ގައި ފެށުމަށް އެޑިޔުކޭޝަން މިނިސްޓްރީން ނިންމައިފިއެވެ.

އެޑިޔުކޭޝަން މިނިސްޓްރީން ބުނީ ކޮވިޑް 19 އާ ގުޅިގެން ރާއްޖޭގެ ހުރިހާ ސްކޫލްތަކެއްގެ ކިޔެވުން މެދުކަނޑާލުމަށް ފަހު ޖުލައި 1 ގައި ވަނީ މާލެ ސިޓީގެ ސްކޫލްތައް ފިޔަވައި ރާއްޖޭގެ ހުރިހާ ސްކޫލްތަކެއްގައި ގްރޭޑް 1 ން 12ށް ކިޔެވުން ފަށާފައިވާ ކަަމަށެވެ.

މާލެ ސިޓީގެ ސްކޫލްތަކުގައި ކިޔަވައިދީފައި ވަނީ ގްރޭޑް 9 ން 12 އަށެވެ.

ނަމަވެސް މިހާރު ކޮވިޑް-19 ގެ ހާލަތަށް ބަލައި އަދި އެޗްޕީއޭގެ ލަފަޔާއެކު ކީ ސްޓޭޖް 3 (ގްރޭޑް 7 އަދި 8) ގެ ކިޔެވުން މާލެ ސިޓީގެ ސްކޫލްތަކުގައި އޮގަސްޓް 16 ގައި ފެށުމަށް ނިންމާފައިވާ ކަމަށް މިނިސްޓްރީން މައުލޫމާތުދެއެވެ.

އޮގަސްޓް މަހު ގްރޭޑް 7 އަދި 8ގެ ގްރޭޑްތަކަށް ސްކޫލުތަކުގައި ކިޔެވުން ފެށުމަށް ނިންމާފައިވާކަން އިއުލާން ކޮށްފައިވާއިރު، މާލެ ސިޓީގެ ސްކޫލުތަކުގައި މިހާރު ކިޔަވައިދޭން ފަށާފައިވާ ގްރޭޑްތަކުގެ އިތުރުން އެހެން ގްރޭޑްތަކަށް ކިޔަވައިދޭން ފެށި ނަމަވެސް އިތުރު ނުރައްކަލެއް ނެތް ކަމަށް ހެލްތު އިމަރޖެންސީ އޮޕަރޭޝަން ސެންޓަރު (އެޗްއީއޯސީ)ގެ ތަރުޖަމާނު ޑރ. ނަޒްލާ ރަފީގް ވިދާޅުވެފައިވެއެވެ.

ސްކޫލުތަކުގެ ކިޔެވުން ފަށަނީ އެޗްޕީއޭގެ ގައިޑްލައިންތަކާ އެއްގޮތަށް ރައްކާތެރިކަމުގެ ގިނަ ފިޔަވަޅުތަކާއެކުއެވެ.

އެގޮތުން ސްކޫލުތަކުގައި ދަރިވަރުން އަތް ދޮވެވޭނެ އިންތިޒާމް ހަމަޖައްސާފައިވާއިރު، މާސްއެޅުމާއި، ހުން ޗެކްކުރުމުގެ އިތުރުން އިޖްތިމާއީ ގައިދުރުކަމަށް ވަނީ ޚާއްސަ ސަމާލުކަމެއްދީފައެވެ.