ދުވާފަރުގެ ބޮޑެތި މަގުތައް ޒަމާނީ ފެންވަރަށް ހެދުމުގެ މަޝްރޫއުގެ ބޮޑު ބައެއް ނިންމާލައިފި
24 ޖުލައި 2020 | ހުކުރު 03:2467 އިންސައްތަ މަސައްކަތް ވަނީ ނިމިފައި
ރ.ދުވާފަރުގެ މަގެއް، ތާރުއަޅާ ނިމިފައި
ރ. ދުވާފަރުގެ ބޮޑެތި މަގުތައް ޒަމާނީ ފެންވަރަށް ހެދުމުގެ މަޝްރޫއުގެ ބޮޑު ބައެއް ނިންމާލައިފިއެވެ.
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގް ކޮމްޕެނީ (އެމްޓީސީސީ)ން ބުނީ ދުވާފަރުގެ ބޮޑެތި މަގުތައް ޒަމާނީ ފެންވަރަށް ހެދުމުގެ މަޝްރޫއުގެ 67 އިންސައްތަ މަސައްކަތް ނިމިފައިވާ ކަމަށެވެ. މި މަޝްރޫއުގެ ތެރެއިން މަގުތަކުގެ އޭބީސީ ފަށަލަ އެޅުމުގެ މަސައްކަތް 14 ޖުލައި 2020 ގައި ނިމިފައިވާ ކަމަށާއި، 12 މަގުގެ 3312.23 މީޓަރު ސަރަހައްދެއްގައި އޭބީސީ ފަށަލަވަނީ އެޅިފައިވާ ކަމަށް އެމްޓީސީސީން ބުނެއެވެ.
މި މަޝްރޫޢުގެ ދަށުން ގާއިމުކުރާ ފެން ހިންދާ ނިޒާމަކީ ރަށުގެ ވަށައިގެންވާ މޫދަށް ފެން ބޭރު ކުރުމުގެ ބަދަލުގައި ރަށުގެ ސާފު ފެން ފަށަލައާ ހަމަޔަށް ފެން ޕަންޕު ކޮށްދޭ ނިޒާމެއްކަން އެމްޓީސީސީން ބުނެއެވެ.
ދުވާފަރުގެ ބޮޑެތި ހުރިހާ މަގެއްގައި ތާރުއެޅުގެ މަސައްކަތް ކުރުމަށް އެމްޓީސީސީއާއި ޙަވާލުކުރީ 2019 ވަނަ އަހަރުގެ މެއި މަހުގެ 22 ވަނަ ދުވަހު އެވެ.
މި މަޝްރޫޢަށް 28.2 މިލިއަން ރުފިޔާ ޚަރަދުވާއިރު، މި މަސައްކަތް 240 ދުވަހުގެ ތެރޭގައި ނިންމަން ޖެހެއެވެ.
