މިނިވަން މުއައްސަސާތަކުން ސަރުކާރުން ބުނާ ކޮންމެ ގޮތަކަށް ކަންކަން ކުރަން ނުޖެހޭ: މެމްބަރު އާޒިމް

ރާއްޖޭގައި ޤާއިމުކޮށްފައިވާ މިނިވަން މުއައްސަސާތަކުން ސަރުކާރުން ބުނާ ކޮންމެ ގޮތަކަށް ކަންކަން ކުރަން ނުޖެހޭކަމަށް މެދުހެންވޭރު ދާއިރާގެ މެމްބަރު އަލީ އާޒިމް ވިދާޅުވެއްޖެއެވެ.

ބުރާސްފަތި ދުވަހުގެ ރޭ ބޭއްވި އެމްޑީޕީ ގައުމީ މަޖިލީހުގެ ޖަލްސާގައި ޕާލިމެންޓަރީ ގްރޫޕުނ ކޮށްފައިވާ ބައެއް މަސައްކަތްތަކުގެ ތެރެއިން، ބައެއް ކޮމިޝަން ތަކުގެ މެމްބަރުން ވަކި ކުރެއްވުމުގެ މައްސަލައަށް އަލިއަޅުވާލައްވާ އާޒިމް ވިދާޅުވީ، މިނިވަން މުއައްސަސާތަކުގައި ތިއްބަވާ ބޭފުޅުން ސަރުކާރުން ބުނާ ކޮންމެ ގޮތަކަށް ކަންކަން ކުރަން ނުޖެހޭ ކަމަށެވެ. އަދި ވެރިކަން ބަދަލުވުމުން، އެކަމަށް ޖަވާބުދާރީވާއިރު، އެއީ ސަރުކާރުން ބުނެގެން ކުރި ކަންކަން ކަމަށް ބުނެވެން ނޯންނާނެ ކަމަށްވެސް އާޒިމް ވިދާޅުވިއެވެ.

އާޒިމް ވިދާޅުވީ، އެމްޑީޕީއަކީ ޤާނޫނީ ދައުލަތެއް ހިންގަން މަސައްކަތް ކުރާ ޕާޓީއެއް ކަމަށާއި، ޤާނޫނާ ޚިލާފަށް އެއްވެސް ކަމެއް ކުރަން ބޭނުންފުޅު ނުވާ ކަމަށެވެ. އަދި ބައެއް ކޮމިޝަންތަކުގެ މެމްބަރުން ވަކިކުރީ އެ ސަބަބުތަކަށްޓަކައި ކަމަށް އާޒިމް ވިދާޅުވިއެވެ.

އޭގެ އިތުރުންވެސް ޕާލިމެންޓަރީ ގްރޫޕުން ކުރަމުންދާ މަސައްކަތްތަކަށް މެމްބަރު އާޒިމް އަލިއަޅުވާލައްވާފައިވާއިރު، އެމްޑީޕީގެ ޕާލިމެންޓަރީ ގްރޫޕުގެ މީޑިއާ ކޯޑިނޭޓަރަކަށް މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ އައްޔަނު ކުރައްވާފައިވާކަންވެސް އާޒިމް ވަނީ އިއުލާނު ކުރައްވާފައެވެ.