އިތުރު 17 މީހަކު ކޮވިޑަށް ޕޮޒިޓިވްވެ، 31 މީހަކު ބަލިން ރަނގަޅުވެއްޖެ
23 ޖުލައި 2020 | ބުރާސްފަތި 17:19ޕޮޒިޓިވްވި މީހުންގެ ތެރޭގައި 10 ދިވެހިން ހިމެނޭ
މާލެ ސިޓީ، ރެމްޑަމް ސާންޕަލް ނެގުމުގެ ތެރެއިން
ރާއްޖެ އިން ކޮވިޑް-19 އަށް އިތުރު 17 މީހަކު ޕޮޒިޓިވް ވެއްޖެއެވެ.
ހެލްތް ޕޮރޮޓެކްޝަން އެޖެންސީ (އެޗްޕީއޭ) އިން ކޮށްފައިވާ ޓްވީޓްގައި ހާމަކޮށްފައިވާ ގޮތުން ބުރާސްފަތި ދުވަހު ޕޮޒިޓިވްވި މީހުންގެ ތެރޭގައި ހިމެނެނީ 10 ދިވެހިންނާއި، ބަންގްލަދޭޝްގެ 6 މީހަކާއި އިންޑިއާ މީހެކެވެ.
އެކްޓިވް ކޭސްގެ ގޮތުގައި 626 ކޭސްއެއް ރިޕޯޓްކޮށްފައިވާއިރު މިހާތަނަށް ބަލިން ރަނގަޅުވި މީހުންގެ ޖުމްލަ އަދަދަކީ 2428 މީހުންނެވެ. އެހެންކަމުން ވޭތުވެދިޔަ 24 ގަޑިއިރުގެ ތެރޭގައި ބަލިން ރަނގަޅުވެފަިއވަނީ 31 މީހަކު އެވެ.
މިހާތަނަށް ކޮވިޑް-19 އަށް ރާއްޖެ އިން ޕޮޒިޓިވް ވެފައިވާ މީހުންގެ ޖުމްލަ އަދަދަކީ 3120 މީހުންނެވެ. ކޮވިޑް-19 ޖެހިގެން ރާއްޖެއިން މަރުވި މީހުންގެ އަދަދަކީ 15 އެވެ.
ލޮކްޑައުން އަށް ދިން ލުއިތަކާއިއެކު ޕޮޒިޓިވް ކޭސްތަކުގެ އަދަދު ފާއިތުވި ދުވަސްތަކުގައި ވަނީ އިތުރުވެފައެވެ. މި ފަހަކަށް އައިސް ގިނައިން ޕޮޒިޓިވްވަނީ ދިވެހިންނެވެ. ބަލިން ސަލާމަތްވުމަށް މާސްކް އެޅުމާއި، ގިނަގިނައިން އަތް ދޮވުމާއި އިޖްތިމާއީ ގައިދިރުކަން ދެމެހެއްޓުމަށް ކަމާބެހޭ ފަރާތްތަކުން ދަނީ ތަކުރާރިކޮށް އިލްތިމާސް ކުރަމުންނެވެ.
