ކުރެންދޫގައި ގާއިމް ކުރަމުންދާ ނަރުދަމާ ނިޒާމްގެ 99 އިންސައްތަ މަސައްކަތް ނިމިއްޖެ
23 ޖުލައި 2020 | ބުރާސްފަތި 18:09މިމަޝްރޫއުގެ ދަށުން އެރަށުގެ ނަރުދަމާ ނިޒާމުގެ މައި ނެޓްވޯކް ގާއިމް ކޮށްފައިވޭ
ޅ.ކުރެންދޫ
މާލެ ވޯޓަރ އެންޑް ސުވަރޭޖް ކޮމްޕެނީ (އެމްޑަބްލިޔުއެސްސީ) އިން ޅ. ކުރެންދޫގައި ގާއިމްކުރަމުންދާ ނަރުދަމާ ނިޒާމްގެ 99 އިންސައްތަ މަސައްކަތް ނިމިއްޖެއެވެ.
އެމްޑަބްލިޔުއެސްސީން ބުނީ މިމަޝްރޫއުގެ ދަށުން އެރަށުގެ ނަރުދަމާ ނިޒާމުގެ މައި ނެޓްވޯކް ގާއިމްކޮށް އަދި 366 ގެއެއްގައި ޖަންކްޝަން ބަހައްޓައި، މިގެތަކަށް ނަރުދަމާގެ ކަނެކްޝަން ގުޅާދެވިފައިވާ ކަމަށެވެ.
ކުރެންދޫ ނަރުދަމާ ނިޒާމުގެ އަމަލީ މަސައްކަތް ފެށިފައިވަނީ 20 ސެޕްޓެމްބަރު 2018 ގައެވެ.
މިމަޝްރޫއުގެ ދަށުން 6,000 މީޓަރގެ ނަރުދަމާ މައި ނެޓްވޯކްއާއި، 720 މީޓަރގެ ޕަންޕިން ލައިންއެއް ވަނީ ގާއިމްކޮށްފައެވެ. މީގެ އިތުރުން 2 ޕަންޕިންގސްޓޭޝަނާއި، ސީ އައުޓް ފޯލް އަދި އިދާރީ ބިލްޑިންގއެއް ވެސް ވަނީ ޤާއިމްކޮށްފައެވެ. އަދި ހަމަ މިއާއި އެކު ނަރުދަމާ ނިޒާމް ހިންގާ ބެލެހެއްޓުމަށް ބޭނުންވާ ޖަނަރޭޓަރ ސެޓާއި ވެހިކަލް މި މަޝްރޫއުގެ ދަށުން ފޯރުކޮށްދެވިގެންދާނެ ކަމަށް އެމްޑަބްލިޔުއެސްސީން ބުނެއެވެ.
މި މަޝްރޫއައަކީ މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ފަރާތުން އެމްޑަބްލިޔުއެސްސީއާ ހަވާލުކޮށްގެން ކުރިއަށް ގެންގޮސްފައިވާ މަޝްރޫއެކެވެ. މިމަޝްރޫއަށް ޖުމްލަ 29,401,918.84 (ނަވާވިސް މިލިއަން ހަތަރު ލައްކަ އެއްހާސް ނުވަސަތޭކަ އަށާރަ) މިލިއަން ރުފިޔާ ހަރަދުވާނެ ކަމަށް ލަފާ ކޮށްފައިވެއެވެ.
ނަރުދަމާ ނިޒާމުގެ މަސައްކަތް ނިމިފައިވާއިރު، މި ނިޒާމް ޓެސްޓްކޮށް، ކޮމިޝަން ކުރުމަށް މިނިސްޓްރީ އޮފް ނޭޝަނަލްޕްލޭނިންގ، ހައުސިންގ އެންޑް އިންފްރާސްޓްރަކްޗަރގައި މިހާރު ވާނީ އެދިފައެވެ.
