ޕީއެސްޖީގައި މަޑުކުރަން އެމްބާޕޭ ނިންމައިފި

އަންނަ ސީޒަނުގައި ވެސް ޕީއެސްޖީގައި މަޑުކުރަން ބޭނުންވާ ކަމަށް އެ ޓީމުގެ ފޯވާޑް ކީލިއަން އެމްބާޕޭ ބުނެފިއެވެ.

އުމުރުން 21 އަހަރުގެ އެމްބާޕޭ ޕީއެސްޖީއާއެކު ހަދާފައިވާ އެއްބަސްވުން ހަމަވާނީ 2022 ވަނަ އަހަރުއެވެ. އެކަމަކު ރެއާލް މެޑްރިޑާއި ލިވަޕޫލުން އެމްބާޕޭ ހޯދުމަށް މަސައްކަތް ކުރަމުން އަންނަ ކަމަށް ރިޕޯޓުތައް ބުނެއެވެ.

މީޑިއާއަށް ދިން އިންޓަވިއުއެއްގައި 2017 ވަނަ އަހަރު ޕީއެސްޖީއާ ގުޅުނު އެމްބާޕޭ ބުނީ ހަތަރުވަނަ އަހަރަށްވެސް ޕީއެސްޖީގައި މަޑުކުރަން ބޭނުންވާ ކަމަށެވެ. އަދި ޕީއެސްޖީއަށް 50 އަހަރު ފުރޭއިރު، އެއީ ކްލަބުގެ ސަޕޯޓަރުންގެ އިތުރަށް ކުޅުންތެރިންނަށްވެސް ވަރަށް ހާއްސަ ކަމެއް ކަމަށާއި، ކޮންމެ ގޮތެއް ވިޔަސް ކްލަބުގައި މަޑުކުރަން ބޭނުންވާ ކަމަށްވެސް ބުންޏެވެ.

މޮނާކޯއިން ކެރިއަރު ފެށި އެމްބާޕޭ އެންމެ ފުރަތަމަ ޕީއެސްޖީއާ ގުޅުނީ ލޯނު އެއްބަސްވުމެއްގެ ދަށުންނެވެ. އޭގެ ފަހުން 208 މިލިއަން ޑޮލަރު ދެއްކުމަށްފަހު ޕީއެސްޖީން އެމްބާޕޭގެ އެއްބަސްވުން ދާއިމީކުރިއިރު، އޭނާ އަންނަނީ އެ ކްލަބުގައި ތަފާތު މޮޅު ކުޅުމެއް ދައްކަމުންނެވެ.

އެގޮތުން މިހާތަނަށް ޕީއެސްޖީއަށް ކުޅެދިން 120 މެޗުގައި 90 ލަނޑު އެމްބާޕޭ ޖަހާފައިވާއިރު، އޭނާ ވަނީ ޕީއެސްޖީއާއެކު މިހާތަނަށް ފްރެންޗު ލީގު ތިން ފަހަރު ހޯދާފައެވެ. އަދި ވަނީ އެ ކްލަބާއެކު ފްރެންޗު ކަޕާއި ފްރެންޗު ލީގު ކަޕްވެސް ކާމިޔާބުކޮށްފައެވެ.

ފްރާންސްގެ ގައުމީ ޓީމަށް މިހާތަނަށް 34 މެޗުން 13 ލަނޑު ކާމިޔާބުކޮށްފައިވާ އެމްބާޕޭ ވަނީ 2018 ވަނަ އަހަރުގެ ފީފާ ވޯލްޑް ކަޕްވެސް ކާމިޔާބުކޮށްފައެވެ.