މަނާގަޑީގައި ބޭރުގައި އުޅެގެން 40 ފަރާތެއް ޖޫރިމަނާކޮށްފި
22 ޖުލައި 2020 | ބުދަ 18:11މަނާގަޑީގައި ވިޔަފާރިކޮށްގެން 23 ފަރާތެއް ވަނީ ޖޫރިމަނާ ކުރެވިފައި
ޗީފް އިންސްޕެކްޓަރ އޮފް ޕޮލިސް މުހައްމަދު ޝަރީފް
ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ކަނޑައަޅާފައިވާ ގަޑިތަކާއި ޚިލާފަށް މަނާގަޑީގައި ބޭރުގައި އުޅުނު 40 ފަރާތެއް ޖޫރިމަނާ ކޮށްފިއެވެ.
ހެލްތް އިމަޖެންސީ އޮޕަރޭޝަން ސެންޓަރ (އެޗްއީއޯސީ) އިން ބޭއްވި ނޫސްވެރިންގެ ބައްދަލުވުމުގައި ޗީފް އިންސްޕެކްޓަރ އޮފް ޕޮލިސް މުހައްމަދު ޝަރީފް ވިދާޅުވީ އެޗްޕީއޭއިން ނެރޭ ގައިޑްލައިންތައް ތަންފީޒްކުރުމުގެ ގޮތުން ފުލުހުން ކުރަމުންގެންދާ މަސައްކަތުގެ ތެރެއިން މިހިނގާ ޖުލައި މަހުގެ 01 އިން ފެށިގެން މަނާގަޑިތަކުގައި މަގުމަތީގައި އުޅެގެން 2075 މީހަކަށް ނަސޭހަތްދީ 40 ފަރާތެއް ޖޫރިމަނާ ކޮށްފައިވާ ކަމަށެވެ.
މީގެ އިތުރުން މަނާގަޑީގައި ވިޔަފާރިކޮށްގެން 101 ފަރާތަކާއި ސުވާލު ކުރެވި ނަސޭހަތްދީ އަދި އޭގެތެރެއިން 23 ފަރާތެއް ޖޫރިމަނާ ކުރެވިފައިވާ ކަމަށެވެ. އަދި ކެފޭ ހޮޓާ ރެސްޓޯރެންޓް ހިންގާ ފަރާތްތަކުގެ ތެރެއިން 110 ފަރާތަކާއި ސުވާލުކުރެވި ނަސޭހަތްދެވި އޭގެތެރެއިން 14 ފަރާތެއް ޖޫރިމަނާކުރެވިފައިވާ ކަމަށް ޝަރީފް ވިދާޅުވިއެވެ.
އައު އާންމު ހާލަތުގައި އަމަލުކުރަންޖެހޭ ގޮތުގެ ގައިޑްލައިންއެއް އެޗްޕީއޭއިން ވަނީ ކަނޑައަޅާފައެވެ.
