އެޗްއާރްސީއެމްގެ މެންބަރަކަށްވުމަށް އެދި ހުށައެޅުމުގެ މުއްދަތު އިތުރުކޮށްފި
5 އޯގަސްޓު 2020 ވާ ބުދަ ދުވަހުގެ 12:30ގެ ނިޔަލަށް ހުށައެޅޭނެ
އެޗްއާރްސީއެމް- އެޗްއާރްސީއެމްގައި ތިއްބެވި މެމްބަރުންނަށް ބޮޑެތި ފާޑުކިއުންތަކެއް އަމާޒުވެފައިވާއިރު، ގިނަ މެމްބަރުން ވަނީ މަޤާމުން އިސްތިއުފާ ދެއްވާފައި
ހިއުމަންރައިޓްސް ކޮމިޝަން އޮފް މޯލްޑިވްސް (އެޗްއާރްސީއެމް) ގެ މެމްބަރަކަށް ވުމަށް އެދި ހުށައެޅުމުގެ މުއްދަތު އިތުރުކޮށްފިއެވެ.
ރައީސުލްޖުމްހޫރިއްޔާގެ އޮފީހުން ބުނީ، އެ ކޮމިޝަނުގެ ހަތަރު މެންބަރުންގެ މެންބަރުކަމުގެ މަޤާމަށް ކުރިމަތިލުމުގެ މުއްދަތު ހަމަވާތީ، އަލުން މުއްދަތު އިތުރުކޮށްފައިވާ ކަމަށެވެ. އެގޮތުން 5 އޯގަސްޓު 2020 ވާ ބުދަ ދުވަހުގެ 12:30ގެ ނިޔަލަށް ފުރުސަތު ހުޅުވާލެވިފައިވާ ކަމަށް ރައީސް އޮފީހުން މައުލޫމާތުދެއެވެ.
ރައީސް އޮފީހުން ބުނީ، އެޗްއާރްސީއެމްގެ މެންބަރުކަމުގެ ފޯމު ބަލައިގަތުމަށް ހަމަޖެހިފައިވަނީ، ޖުލައި 23، އޯގަސްޓު 4 އަދި 5 ވަނަ ދުވަހު ހެނދުނު 09:30 އިން މެންދުރުފަހު 12:30 އަށް، ރައީސުލްޖުމްހޫރިއްޔާގެ އޮފީހުން ކަމަށެވެ. އަދި، ހިއުމަން ރައިޓްސް ކޮމިޝަނުގެ މެންބަރުކަމަށް ކުރިމަތިލުމަށް އެދޭ ފޯމު ރައީސުލްޖުމްހޫރިއްޔާގެ އޮފީހުގެ ވެބްސައިޓުން ޑައުންލޯޑް ކުރެވޭނެ ކަމަށްވެސް ބުނެފައިވެއެވެ.
އެޗްއާރުސީއެމްގައި މިވަގުތު ތިއްބެވި މެމްބަރުންނަށް ބޮޑެތި ފާޑުކިއުންތަކެއް ވަނީ އަމާޒުވެފައެވެ. އެގޮތުން އެޗްއާރްސީއެމްގެ ޒިންމާ އެންމެ ފުރިހަމައަށް އަދާ ނުކުރާ ކަމަށް ގިނަ ބަޔަކު ޤަބޫލުކުރާއިރު، މަގާމުން ވަކިކުރުމުގެ މަސައްކަތް މަޖިލީހުން ކުރަން ފެށުމާއެކު، އެކޮމިޝަނުގެ ގިނަ މެމްބަރުން ވަނީ އިސްތިއުފާ ވެސް ދެއްވާފައެވެ.
