ވިލިނގިއްޔާއި ގަމުގައި ކޮވިޑް ފެސިލިޓީ ހުޅުވައިފި
ވިލިނގިލި ކޮވިޑް-19 މެނޭޖްމަންޓް ސެންޓަރުގައި 23 އައިސީޔޫ އެނދުގެ އިތުރުން ވެންޓިލޭޓަރުގައި ފަރުވާދެވޭނެ
ގަމުގައި ތައްޔާރުކުރި ކޮވިޑް-19 ފެސިލިޓީ؛ ރާއްޖޭގެ 5 ސަރަހައްދެއްގައި 5 ފެސިލިޓީއެއް ވަނީ ހުޅުވާފައި
ކޮވިޑް-19 އަށް ފަރުވާދިނުމަށް އަތޮޅުތަކުގެ ތެރޭގައި ގާއިމްކުރާ ފެސިލިޓީތަކުގެ ތެރެއިން ގއ. ވިލިނގިލި އަދި ލ. ގަން ފެސިލިޓީ ރަސްމީކޮށް ހުޅުވައިފިއެވެ.
ވަރޗުއަރލްކޮށް އަންގާރަ ދުވަހުގެ ރޭ ބޭއްވި ރަސްމިއްޔާތެއްގައި މި ދެ ފެސިލިޓީ ރަސްމީކޮށް ހުޅުވާފައިވާ އިރު ވިލިނގިލި ކޮވިޑް-19 މެނޭޖްމަންޓް ސެންޓަރުގައި 23 އައިސީޔޫ އެނދުގެ އިތުރުން ވެންޓިލޭޓަރުގައި ފަރުވާދެވޭނެ އިންތިޒާމް ވަނީ ހަމަޖެހިފައެވެ. މީގެ އިތުރުން ގަމު ކޮވިޑް މެނޭޖްމަންޓް ފެސިލިޓީގައި 20 އައިސީޔޫ އެނދާއި 15 އައިސޮލޭޝަނަށް އެނދުގެ އިތުރުން ކަރަންޓީނު ކުރާ މީހުންނަށް ޚާއްސަ 12 އެނދު ހުރެއެވެ.
ހެލްތް މިނިސްޓްރީން ބުނީ މި ދެ ފެސިލީޓީން ވެސް ކޮވިޑަށް ޓެސްޓް ކުރެވޭނެ ކަމަށެވެ. ރާއްޖޭގައި މާލެ ސަރަހައްދު ފިޔަވާ 5 ސަރަހައްދެއްގައި ކޮވިޑް މެނޭޖްމަންޓް ފެސިލިޓީތަކެއް ވަނީ ގާއިމްކޮށްފައެވެ. އެގޮތުން ހއ. ހދ. ށ. ހިމެނޭ ޒޯނުގެ ކޮވިޑް މެނޭޖްމަންޓް ފެސިލިޓީ ގާއިމްކޮށްފައިވަނީ ށ. ފުނަދޫގައެވެ. މި ފެސިލީގެ މިމަހުގެ 16 ވަނަ ދުވަހު ވަނީ ހުޅުވާފައެވެ.
ނ. ރ. ބ. ޅ. ހިމެނޭ ޒޯނުގެ ކޮވިޑް މެނޭޖްމަންޓް ފެސިލިޓީ ގާއިމުކޮށްފައިވަނީ ބ. އޭދަފުށީގައެވެ. މި ފެސިލިޓީ ވެސް ވަނީ މި މަހު 16 ގައި ހުޅުވާފައެވެ. އަދި ލ. ގަމުގައި ހުޅުވި ފެސިލިޓީއަކީ މ. ފ. ދ. ތ. ލ. ހިމެނޭ ޒޯނުގެ ކޮވިޑް މެނޭޖްމަންޓް ފެސިލިޓީއެވެ. ގއ. ވިލިނގިލި ގައި ހުޅުވި ކޮވިޑް މެނޭޖްމަންޓް ފެސިލިޓީ ހާއްސަކުރީ ގއ. އަދި ގދ. އަތޮޅަށެވެ.
ރާއްޖޭގެ އެންމެ ދެކުނުން ފުވައްމުލައް ސިޓީ އަދި އައްޑު ސިޓީ ހިމެނޭ ޒޯނުގެ ކޮވިޑް މެނޭޖްމަންޓް ފެސިލިޓީ ގާއިމް ކުރެވިފައިވަނީ އައްޑޫ ސިޓީ ހިތަދޫގައެވެ. މިތަނުން ކޮންމެ ފެސިލިޓީ އެއްގައިވެސް މަދުވެގެން 20 އެނދުގެ އައިސީޔޫ އަކާއި 30 އައިސޮލޭޝަން އެނދު ހުންނާނެ ކަމަށް ހެލްތް މިނިސްޓްރީން ބުނެއެވެ.
އޭގެ އިތުރުން ހއ. އިހަވަންދޫ އަދި ފުވައްމުލައް ސިޓީގައި ތިން އެނދުގެ އައިސީޔޫ ހުންނާނެ ކަމަށާއި، މިތަންތަން ގާއިމު ކުރެވިފައިވަނީ ކޮވިޑްގައި ހާލުބޮޑުވާ ބަލިމީހުންނަށް ބޭނުންވާ ވަސީލަތްތަކާއެކު ކަމަށް ވެސް ހެލްތް މިނިސްޓްރީން ބުނެއެވެ.
