އަންނަ ސީޒަނުގައި ރެއާލް މެޑްރިޑްގެ ކޯޗުގެ މަގާމުން ނުފެނިދާނެ ކަމަށް އެޓީމަށްށް 34 ވަނަ ފަހަރަށް ސްޕެނިޝް ލީގު ކާމިޔާބުކޮށްދިން ކޯޗު ޒިނެދިން ޒިދާން ބުނެފިއެވެ.

ޒިދާން ބުނީ ފުޓްބޯޅައަކީ ކޮންމެ ދަނޑިވަޅެއްގައިވެސް ބަދަލު އަންނަ ކުޅިވަރެއް ކަމަށާއި، ރެއާލްގެ ކޯޗުގެ މަގާމުގައި ހުރުމަކީ ބޮޑު ޕްރެޝަރެއް ކަމަށެވެ. އެހެންކަމުން ރެއާލާއެކު އޭނާގެ ކުރިމަގު ބުނަން ދަތިވާނެ ކަމަށާއި، ކޮންމެ ފަދަ ދަނޑިވަޅަކުވެސް ކޯޗުގެ މަގާމުން ދުރު ކޮށްފާނެ ކަމަށެވެ.

ޒިދާން އިތުރަށް ބުނީ ރެއާލްގެ މިހާރުގެ ޓާގެޓަކީ ޔުއެފާ ޗެމްޕިއަންސް ލީގު ކަމަށާއި، ޗެމްޕިއަންސް ލީގު ކާމިޔާބު ކުރުމަކީ އުނދަގޫ ބޮޑު ބުރަ މަސައްކަތެއް ކަމަށެވެ. އެކަމަކު ރެއާލްގެ މިހާރުގެ ސްކޮޑަށް ޗެމްޕިއަންސް ލީގު ކާމިޔާބު ކުރުމަކީ އުނދަގޫ ކަމަކަށް ނުވާނެ ކަމަށްވެސް ބުންޏެވެ. އަދި ސްޕެނިޝް ލީގު ކާމިޔާބު ކުރުމާ ހަމައަށް ރެއާލުން ކޮންމެ މެޗެއްގައިވެސް ނުކުތީ ފައިނަލެއް ކަމުގައި ދެކިގެން ކަމަށާއި، އެހެންކަމުން ކުރިއަށް އޮތް ޗެމްޕިއަންސް ލީގުގެ މެޗުތަކުގައިވެސް ނުކުންނާނީ އެ އަޒުމުގައި ކަމަށްވެސް ޒިދާން ބުޏްނެވެ.

އަންނަ ސީޒަނުގައި ރެއާލް މެޑްރިޑްގެ ކޯޗުގެ މަގާމުން ނުފެނިދާނެ ކަމަށް ޒިދާން ބުނިއިރު، ރެއާލްގެ މެނޭޖްމަންޓުންނާއި ކުޅުންތެރިން އަންނަނީ ޒިދާނަށް ތައުރީފުކޮށް ވާހަކަދައްކަމުންނެވެ. އެގޮތުން ރެއާލްގެ ކެޕްޓަން ސާޖިއޯ ރާމޯސް ބުނީ ޒިދާން އަތްލާ ކޮންމެ އެއްޗެއްވެސް ރަނަށް ބަދަލުވާ ކަމަށާއި، ރެއާލްގެ އެންމެ ކާމިޔާބު ކޯޗަކީ ޒިދާން ކަމަށެވެ. އަދި ރެއާލްގެ ރައީސް ފްލެރެންޓީނޯ ޕެރޭޒް ވިދާޅުވީ އޭނާ ރެއާލްގެ ރައީސްގެ މަގާމުން ދުރަށްދާއިރު، މީހުން އޭނާ ދަންނާނީ ރެއާލްގެ އެންމެ ކާމިޔާބު ކޯޗު ކަމަށްވާ ޒިދާންގެ ސޮއި ހޯދި މީހާގެ ގޮތުގައި ކަމަށެވެ.

ޒިދާން އެންމެ ފުރަތަމަ ރެއާލަށް ކޯޗުކޮށްދިނީ 2016-2018 ގެ ނިޔަލަށެވެ. އެ މުއްދަތިގެ ތެރޭގައި ޖެހިޖެހިހެން ތިން ފަހަރަށް ރެއާލަށް ޗެމްޕިއަންސް ލީގު ހޯދައިދިންތާ މަދު ދުވަސްކޮޅެއްގެ ތެރޭގައި ކުއްލި ގޮތަކަށް ރެއާލްގެ ކޯޗުކަން އޭނާ ދޫކޮށްލިއެވެ. ޒިދާން ދެވަނަ ފަހަރަށް ރެއާލާ ހަވާލުވީ މިދިޔަ އަހަރު މާޗު މަހުގައެވެ. ރެއާލާއެކު ޒިދާން މިހާރު ހަދާފައިވާ އެއްބަސްވުން ހަމަވާނީ 2022 ވަނަ އަހަރުއެވެ.

ޒިދާންގެ އިރުޝާދުގެ ދަށުން ރެއާލުން މި ސީޒަނުގެ ސްޕެނިޝް ލީގު ކާމިޔާބުކުރިއިރު، ޒިދާން ވަނީ މިހާތަނަށް ރެއާލާއެކު ޖުމްލަ 11 ތަށި ކާމިޔާބުކޮށްފައެވެ.