ނަޒާހާތްތެރިކަމާ ފުށުއަރާ އެއްވެސް ޢަމަލަކީ ބަލައިގަންނާނެ ކަމެއް ނޫން: ކޮމިޝަނަރ ޖެނެރަލް އޮފް ކަސްޓަމްސް
18 ޖުލައި 2020 | ހޮނިހިރު 12:39އަމާނާތްތެރިކަމާއެކު، މަސްޢޫލިއްޔަތު އަދާކުރުންމަތީ ދެމިތިބުމަށް ކަސްޓަމްސްގެ މުވައްޒަފުންނަށް، އިލްތިމާސްކުރެއްވި
ކޮމިޝަނަރ ޖެނެރަލް އޮފް ކަސްޓަމްސް އަބްދުﷲ ޝަރީފް
ނަޒާހާތްތެރިކަމާ ފުށުއަރާ އެއްވެސް ޢަމަލަކީ ކަސްޓަމްސްއިން އެއްވެސް މިންވަރަކަށް ބަލައިގަންނާނެ ކަމެއް ނޫންކަމަށް ކޮމިޝަނަރ ޖެނެރަލް އޮފް ކަސްޓަމްސް އަބްދުﷲ ޝަރީފް ވިދާޅުވެއްޖެއެވެ.
ކަސްޓަމްސްގެ 130 ވަނަ އަހަރީ ދުވަހުގެ މުނާސަބަތުގައި ކޮމިޝަނަރ ޖެނެރަލް އޮފް ކަސްޓަމްސް ދެއްވި ޚާއްސަ ޚިޠާބުގައި ވަނީ ތެދުވެރިކަމާއި އަމާނާތްތެރިކަމާއެކު، ވަޒީފާގެ މަސްޢޫލިއްޔަތު އަދާކުރުންމަތީ ދެމިތިބުމަށް، ކަސްޓަމްސްގެ މުވައްޒަފުންނަށް، އިލްތިމާސްކުރައްވާފައެވެ.
ކޮމިޝަނަރ ޖެނެރަލް އޮފް ކަސްޓަމްސް ވަނީ މި ޚިޠާބުގައި، ކޮވިޑް-19 އާ ގުޅިގެން އުފެދިފައިވާ ބިރުވެރިކަމާ އެކުވެސް ރާއްޖޭގެ ދޮރޯށި ބެލެހެއްޓުމުގައި ކަސްޓަމްސްގެ އޮފިސަރުން ސާބިތުކަމާއެކު ކުރަމުން ގެންދާ ޚިދުމަތްތައް ފާހަގަކުރައްވާފައެވެ.
ކަސްޓަމްސްގެ އަހަރީ ދުވަސް ފާހަގަ ކުރުމުގެ ގޮތުން ކަސްޓަމްސް ބިލްޑިންގްގައި ހޮނިހިރު ދުވަހު ބޭއްވި ރަސްމިއްޔާތުގައި ވަނީ އެ މުއައްސަސާގެ ޚިދުމަތްތައް މެދުނުކެނޑި ފޯރުކޮށްދިނުމަށްޓަކައި ޢާއިލާތަކާ ވަކިން، އެކަހެރިވެ ތިބެ މަސައްކަތް ކުރި އޮފިސަރުންނަށާއި، ގޭގައި ތިބެގެން މަސައްކަތްކުރި އޮފިސަރުންނަށާއި، ރާއްޖެއަށް އަންނަ އަދި ފުރާ ފަސިންޖަރުން ބަލައި ފާސްކުރުމުގެ މަސައްކަތްކުރި އޮފިސަރުންގެ އިތުރުން ވޮލަންޓިއަރުންގެ ގޮތުގައި ނޭޝަނަލް އެމަޖެންސީ އޮޕަރޭޝަން ސެންޓަރުގެ މަސައްކަތްތަކުގައި ޙަރަކާތްތެރިވި ކަސްޓަމްސްގެ އޮފިސަރުންގެ އަގު ވަޒަންކުރުމުގެ ގޮތުން ހަނދާނީ ލިޔުން ހަވާލުކޮށްފައެވެ.
