އިންޑިއާގައި ކޮވިޑު ކޭސްތައް މިލިއަނަކަށް

ހަލުވިކަމާއި އެކު ކޮވިޑް-19 ފެތުރެމުންދާ ގައުމުތަކުގެ ތެރޭގައި ހިމެނޭ އިންޑިއާގައި ބަލި ޖެހުނު މީހުންގެ އަދަދު އެއް މިލިއަނަށް އަރާފައިވާ ކަމަށް އެ ގައުމުގެ ހެލްތް މިނިސްޓްރީން ބުނެފިއެވެ.

އިންޑިއާގައި ބަލި ޖެހިގެން މަރުވި އަދަދު ވަނީ 25،000ށް ވުރެ މައްޗަށް އަރާފައެވެ. ފާއިތުވި 24 ގަޑިއިރު ތެރޭގައި 35،000 ކޭސްއެއް ވަނީ ރިޕޯޓް ކުރެވިފައެވެ. އެ ގައުމުގެ ހެލްތް މިނިސްޓަރު ވިދާޅުވީ، ބަލި ޖެހުނު މީހުންގެ ތެރެއިން އައިސީޔޫ ގައި ފަރުވާދެމުންދަނީ ދެ އިންސައްތަ މީހުންނަށް ކަމަށެވެ.

އިންޑިއާ ގައި ބަލި ޖެހިގެން މަރުވާ މީހުންގެ ރޭޓް އުޅެނީ 2.57 އިންސައްތާގައެވެ. ރިކަވަރީ ރޭޓް އުޅެނީ 63.25 އިންސައްތާގައެވެ.

އިންޑިއާ ގައި އެންމެ ބޮޑަށް ބަލި ފެތުރެމުންދަނީ މަހަރާޝްތްރާ ސްޓޭޓްގައެވެ. މިދިޔަ އަހަރު ޑިސެމްބަރު މަހު ޗައިނާގެ ވުހާން ސިޓީން އުފަންވި ކޮރޯނާވައިރަސް ދުނިޔޭގެ 218 ގައުމަކަށް ވަނީ ފެތުރިފައެވެ.