ރެއާލުން 34 ވަނަ ފަހަރަށް ސްޕެނިޝް ލީގުގެ ޗެމްޕިއަންކަން ހޯދައިފި

ޖެހިޖެހިގެން 10 މެޗު ކާމިޔާބުކޮށް ރެއާލް މެޑްރިޑުން 34 ވަނަ ފަހަރަށް ސްޕެނިޝް ލީގުގެ ޗެމްޕިއަންކަން ހޯދައިފިއެވެ.

ތިން އަހަރަށް ފަހު ރެއާލުން ސްޕެނިޝް ލީގު ކާމިޔާބުކުރިއިރު، ސްޕެނިޝް ލީގުގެ އެންމެ ކާމިޔާބު ޓީމަކީވެސް ރެއާލެވެ. ރެއާލުން ޗެމްޕިއަންކަން ކަށަވަރުކުރީ ބުރާސްފަތި ދުވަހުގެރޭ އަމިއްލަ ދަނޑުގައި ވިޔަރެއާލް އަތުން 2-1 ން މޮޅުވެގެންނެވެ.

މި މެޗުގެ ފުރަތަމަ ހާފު ފަށައިގެން ރެއާލުން ރަނގަޅު ކުޅުމެއް ދެއްކިއިރު، މެޗުގެ ތިންވަނަ މިނެޓުގައި ރެއާލްގެ ޑިފެންޑަރު ޑެނީ ކާވަހާލަށް ވަނީ ލަނޑު ޖަހަން ރަނުގެ ފުރުސަތެއް ލިބި ބޭކާރުވެފައެވެ. މެޗުގައި ރެއާލުން ލީޑު ނެގީ 29 ވަނަ މިނެޓުގައެވެ. މިޑްފިލްޑަރު ލުކާ މޮޑްރިޗްގެ އެހީތެރިކަމާއެކު މި ލަނޑު އެޓީމަށް ކާމިޔާބުކޮށްދިނީ މި ސީޒަނުގައި މޮޅު ކުޅުމެއް ދައްކަމުން އަންނަ ފޯވާޑް ކަރިމް ބެންޒެމާއެވެ.

މި މެޗުގައި ރެއާލުން ލީޑު ފުޅާކުރީ 79 ވަނަ މިނެޓުގައެވެ. ލިބުނު ޕެނަލްޓީއަކުން ރެއާލަށް މި ލަނޑު ކާމިޔާބުކޮށްދިނީ ބެންޒެމާއެވެ. މިއީ ރެއާލްގެ ކެޕްޓަން ސާޖިއޯ ރާމޯސްއަށް އޭރިއާ ތެރެއިން ކުރި ފައުލަކާ ގުޅިގެން ރެފުރީ ދިން ޕެނަލްޓީއެކެވެ. މި މެޗުގައި ވިޔަރެއާލުން ފަރަގު ކުޑަކުރީ މެޗުގެ 83 ވަނަ މިނެޓުގައި ވިސެންޓޭ އިބޯރާ ކާމިޔާބުކުރި ލަނޑުންނެވެ.

ވިޔަރެއާލް ބަލިކޮށް ރެއާލުން ޗެމްޕިއަންކަން ކަށަވަރުކުރިއިރު، މިދިޔަ ސީޒަނުގެ ޗެމްޕިއަންކަން ހޯދި ބާސެލޯނާ ވަނީ ބުރާސްފަތި ދުވަހުގެރޭ އަމިއްލަ ދަނޑުގައި އޮސަސޫނާ އަތުން 2-1 ން ބަލިވެފައެވެ.

މި ނަތީޖާތަކާއެކު ޗެމްޕިއަންކަން ހޯދި ރެއާލް އެއްވަނައިގައި އޮތީ ހަތް ޕޮއިންޓުގެ ލީޑަކާއެކުއެވެ. ރެއާލަށް ކުޅުނު 37 މެޗުން ލިބުނު 86 ޕޮއިންޓު ލިބިފައިވާއިރު، ވާދަވެރި ބާސާއަށް 37 މެޗުން ލިބިފައިވަނީ 79 ޕޮއިންޓެވެ. އަދި ބުރާސްފަތި ދުވަހުގެރޭ ގެޓާފޭ އަތުން 2-0 ން މޮޅުވި އެތުލެޓިކޯ މެޑްރިޑް ތިންވަނައިގައި އޮތީ 37 މެޗުން ލިބިފައިވަނީ 69 ޕޮއިންޓާއެކުއެވެ.