ލޯކަލް ގަވަރމެންޓް އޮތޯރިޓީ (އެލްޖީއޭ) ގެ ބޯޑުގެ ނާއިބު ރައީސްކަމަށް މުހައްމަދު މާހިރު ޢީސާ އިންތިޚާބު ކުރައްވައިފިއެވެ.

އެލްޖީއޭއިން ބުނީ ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުން ކަށަވަރުކުރުމުގެ ޚާއްސަ ގާނޫނުގެ 7 ވަނަ މާއްދާގެ (ހ) ގެ ދަށުން އެކުލަވާލެވުނު އޮތޯރިޓީގެ ބޯޑުގެ ނާއިބު ރައީސް ކަމަށް މުޙައްމަދު މާހިރު ޢީސާ އިންތިޚާބު ކުރައްވާފައިވާ ކަމަށެވެ.

އެލްޖީއޭއިން ބުނީ އޮތޯރިޓީގެ ބޯޑަށް ނާއިބު ރައީސް އިންތިޚާބު ކުރުން ކުރިޔަށް ދިޔައީ ބުރާސްފަތި ދުވަހު ކުރިޔަށް ދިޔަ ބޯޑުގެ 10 ވަނަ ބައްދަލުވުމުގައި ކަމަށެވެ.

މިހާރު ތިބި ކައުންސިލަރުންގެ މުއްދަތު އިތުރުކުރުމާއެކު އެލްޖީއޭގެ ބޯޑު އަލުން އެކުލަވާލައި ބޯޑަށް 7 މެމްބަރުން ރައީސުލްޖުމްހޫރިއްޔާ އިބްރާޙިމް މުޙައްމަދު ސޯލިޙު އައްޔަނު ކުރެއްވީ ޖޫން މަހުގެ 09 ވަނަ ދުވަހެވެ.

އެލްޖީއޭގެ ބޯޑު އަލުން އެކުލަވާލާފައިވާއިރު، އެލްޖީއޭގެ ރައީސަކީ މިނިސްޓަރ އޮފް ހޯމް އެފެއާޒް ޝެއިޙް އިމްރާން އަބްދުﷲ އެވެ. ރައީސުލްޖުމްހޫރިއްޔާގެ އޮފީހުން ރައީސް އޮފީހުގެ އެޑްވައިސަރ އިބްރާޙިމް ޝިހާބާއި، ރައީސް އޮފީހުގެ މިނިސްޓަރ އަޙުމަދު ސަމީރު ވަނީ އައްޔަނު ކުރައްވާފައެވެ.

އޭގެ އިތުރުން، އެލްޖީއޭގެ ޗީފް އެގްޒެކެޓިވް އޮފިސަރަކަށް ފާތިމަތު އަފްޝަން ލަތީފް އައްޔަނު ކުރައްވާފައިވާއިރު، ހޯމް މިނިސްޓްރީގެ ސްޓޭޓް މިނިސްޓަރ މުޙައްމަދު މާހިރު އީސާވެސް ބޯޑުގައި ހިމެނިވަޑައިގަންނަވައެވެ. އަދި ފިނޭންސް މިނިސްޓްރީގެ ސްޓޭޓް މިނިސްޓަރ އަޙުމަދު ޝަރީފްއާއި، މިނިސްޓަރ އޮފް ނޭޝަނަލް ޕްލޭނިންގ އެންޑް އިންފްރާސްޓްރަކްޗަރ ގެ ނައިބް ފާތިމަތު ނިއުމާވެސް އައު ބޯޑުގައި ހިމެނިވަޑައިގަންނަވައެވެ.