އަރަބި ބަހުން ރާއްޖެ އިޝްތިހާރުކުރަން ޝަހީމްގެ ''މާލްދީފް''
ވެބްސައިޓުން ރާއްޖެއާ ބެހޭ ގިނަ މައުލޫމާތުތަކެއް ލިބޭ
އިސްލާމިކް ޔުނިވާސިޓީގެ ކުރީގެ ޗަންސެލަރ ޑރ. ޝަހީމް
ދިވެހިރާއްޖެ މެދުއިރުމައްޗަށް އިޝްތިހާރު ކުރުމުގެ ގޮތުން އިސްލާމިކް ޔުނިވާސިޓީގެ ކުރީގެ ޗަންސެލަރ ޑރ. މުހައްމަދު ޝަހީމް އަލީ ސައީދު، އަރަބި ބަހުން ވެބްސައިޓެއް ލޯންޗުކޮށްފިއެވެ.
ބުދަ ދުވަހު ޑރ. ޝަހީމް ކުރެއްވި ޓްވީޓެއްގައި ވިދާޅުވީ، އެ ވެބްސައިޓަކީ ރާއްޖޭގައި އަރަބި ބަހުން ފުރަތަމަ ލޯންޗުކުރި ވެބްސައިޓް ކަމަށެވެ. ޝަހީމް ވިދާޅުވީ، ވެބްސައިޓް ލޯންޗު ކުރުމުގެ މަގްސަދަކީ ރާއްޖޭގެ ފަތުރުވެރިކަން އަރަބި ދުނިޔެއަށް ފޯރުކޮށްދީ އަރަބި ގައުމުތަކާއި ރާއްޖެއާ އޮންނަ ގުޅުން ބަދަހި ކުރުން ކަމަށެވެ.
ރާއްޖޭގެ ޒުވާނުންތަކެއް ފަރުމާކޮށްފައިވާ މަލްދީފް ވެބްސައިޓް ލޯންޗުކޮށްފައިވަނީ ފޭސްބުކް ލައިވް މެދުވެރިކޮށެވެ. މި ވެބްސައިޓުން ރާއްޖެއާ ބެހޭ ގިނަ މައުލޫމާތުތަކެއް ލިބެއެވެ. އޭގެ ތެރޭގައި ރިސޯޓުތަކުގެ މައުލޫމާތުތަކާއި ރާއްޖޭގެ ރީތިކަމުގެ ވާހަކަތައް ވަނީ ހިމަނާފައެވެ.
އޭގެ އިތުރުން ރާއްޖޭގެ ތާރީހާ ސަގާފަތާއި ބެހޭ ގިނަ މައުލޫމާތުތަކެއް ވެސް އެ ވެބްސައިޓްގައި ވަނީ ހިމަނާފައެވެ. މި ވެބްސައިޓުގެ ވާހަކަ މިހާރު ވަނީ އަރަބި ގައުމުތަކުގެ ނޫސްތަކަށް އަރާފައެވެ.
އަރަބި ފަތުރުވެރިންނަށް ހާއްސަކޮށްގެން ވެބްސައިޓެއް ލޯންޗުކޮށްފައިވާއިރު، ކޮވިޑުގެ ބިރާހެދި ބަންދުކުރި ރާއްޖޭގެ އެއާޕޯޓް ވަނީ 110 ދުވަސް ފަހުން ހުޅުވާފައެވެ. ބޯޑަރު ހުޅުވާލި ދުވަހު، 101 ފަތުރުވެރިޔަކު ވަނީ ރާއްޖެ ޒިޔާރަތްކޮށްފައެވެ.
ސަރުކާރުން އަމާޒު ހިފާފައި ވަނީ، މި އަހަރު ނިމުމުގެ ކުރިން އިތުރު ފަސް ލައްކަ ފަތުރުވެރިން ރާއްޖެ ގެނައުމަށެވެ. ސިނާއަތުގައި ހަރަކާތްތެރިވާ ފަރާތްތަކުން ބުނަމުން އަންނަނީ، މިހާރު ވެސް ރާއްޖެއަށް އޮތް ޑިމާންޑު ވަރަށް ރަނގަޅު ކަމަށެވެ. އަދި ވައިގެ ދަތުރުތައް އިތުރުވުމުން، އަންނަ ފަތުރުވެރިންގެ އަދަދުތައް އިތުރުވާނެ ކަމަށް ވަނީ މައުލޫމާތު ދީފައެވެ.
