ވެށިފަހި މާލޭގެ ލިޔެކިޔުންތައް ހުރި ތަނެއް އެނގޭ މީހަކު ނެތް: އަސްލަމް
ދައުލަތުގެ ލިޔެކިއުންތައް ދެމެހެއްޓޭނެ ގޮތެއް ހޯދަން ޖެހޭ
މިނިސްޓަރު އޮފް ޕްލޭނިންގް ހައުންސިންގް އެންޑް އިންފްރާންސްޓްރަކްޗަރ މިނިސްޓަރު މުހައްމަދު އަސްލަމް
ވެށިފަހި މާލެ ޕްރޮގްރާމުގެ ދަށުން ދޫކޮށްފައިވާ ލިޔެކިއުންތައް ހުރި ތަނެއް އެނގޭ މީހަކު މިހާރު ނެތް ކަމަށް މިނިސްޓަރު އޮފް ޕްލޭނިންގް ހައުންސިންގް އެންޑް އިންފްރާންސްޓްރަކްޗަ މިނިސްޓަރު މުހައްމަދު އަސްލަމް ވިދާޅުވެއްޖެ އެވެ.
ބުދަ ދުވަހުގެ މަޖިލީހުގެ ޖަލްސާގައި ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމް ކުރީގެ ރައީސް މުހައްމަދު ނަޝީދު ވެރިކަމުގައި ހިންގި ވެށިފަހި މާލެ ޕްރޮގްރާމާއި ގުޅިގެން ކުރެއްވި ސުވާލަށް ޖަވާބުދެއްވަމުން އަސްލަމް ވިދާޅުވީ ވެށި ފަހި މާލެ ޕްރޮގްރާމްގެ ދަށުން ދޫކޮށްފައިވާ ލިޔެކިއުންތައް މިހާރު ދައުލަތުގައި ނެތް ކަމަށެވެ. އަދި އެ ލިޔުންތައް ހުރި މީހަކުވެސް ނެތް ކަމަށެވެ.
މިނިސްޓަރ ވިދާޅުވީ ސަރުކާރު ބަދަލުވި ނަމަވެސް، ދައުލަތުގެ ލިޔެކިއުންތައް ދެމެހެއްޓޭނެ ގޮތެއް ހޯދަން ޖެހޭ ކަމަށެވެ.
މިނިސްޓަރ މިހެން ވިދާޅުވުމުން ނައިފަރު ދާއިރާގެ މެމްބަރު ވަނީ ނިޒާމީ ނުކުތާއެއް ނަންގަވައިފައެވެ. ނިޒާމީ ނުކުތާ ހުށަހަޅުއްވަމުން މެމްބަރު ވިދާޅުވީ ވެށިފަހި މާލެ ޕްރޮގްރާމްގެ ލިޔެކިއުންތައް ކޮންމެވެސް ފަރާތަކުން ގެއްލުވާލުމަކީ އެތައް ރައްޔިތުންނެއްގެ ހައްގުތައް ވެސް ގެއްލުން ކަމަށެވެ. އަދި މި ކަންތައްތައް ތަހުގީގު ކުރަންޖެހޭކަން ވެސް ފާހަގަކުރެއްވިއެވެ.
މިއާއި ގުޅިގެން މިނިސްޓަރ ވިދާޅުވީ މި ލިޔެކިއުންތައް ގެއްލުވާލީ ވަކި މީހަކު ކަމަށް ވިދާޅުނުވާ ކަމަށާއި މިއީ އޮޅިގެން ހިނގާފައިވާ ކަމަކަށް ވީނަމަވެސް، މި ފަދަ މައްސަލައެއް ތަކުރާރުވިޔަ ނުދޭން މަސައްކަތް ކުރަން ޖެހޭ ކަމަށެވެ.
އަސްލަމް ވިދާޅުވީ މި ކަންތައްތައް ހިނގާފައިވާ ގޮތް ދެނެގަތުމަށްޓަކައި ތަހުގީގެއް ވެސް ކުރަންޖެހޭ ކަމަށެވެ.
ކުރީގެ ރައީސް މުހައްމަދު ނަޝީދުގެ ސަރުކާރުގެ ފެށި ވެށިފަހި މާލެ ޕްރޮގްރާމް ހުޅުވާލީ ކުދި ބިންތަކުގައި ދިރިއުޅޭ މާލޭގެ ރަށްވެހިންނާއި ބިން ނުވަތަ ދިރިއުޅޭނެ އަމިއްލަ ތަނެއް ނެތް މާލެއަށް އުފަން ރަށްވެހީގެ އިތުރުން މާލެ މުނިސިޕަލްޓީގެ ދަފުތަރުގައި ރަޖިސްޓްރީވެފައި ތިބި މީހުނަށެވެ. އޭގެ ތެރެއިން ފްލެޓް ލިބިފައިވަނީ ބައެއް މީހުނަށެވެ.
އަސްލަމް ވިދާޅުވެފައިވަނީ ވެށިފަހި މާލެ ޕްރޮގްރާމްގެ ދަށުން ލިބިފައިވާ ލިޔުން ހުށައެޅުމުން އެ ލިޔުމަކީ ސައްހަ ލިޔުމަކަށް ވާނަމަ، އޭގައި ބުނާ ގޮތަކަށް އަމަލު ކުރުމަށް މިނިސްޓްރީން ނިންމާފައިވާ ކަމަށެވެ.
ވެށިފަހި މާލެ ޕްރޮގްރާމުގެ ދަށުން ބޯހިޔާވަހިކަން ހަމަނުޖެހި ތިބި ފަރާތްތަކަށް ގޮތެއް ހޯދައި ދިނުމަކީ ރައީސް އިބްރާހިމް މުހައްމަދު ޞާލިހްގެ ރިޔާސީ ވައުދަކަށްވާއިރު ރައްޔިތުންގެ މަޖިލީހުގެ ޖަލްސާތައް މިއަހަރަށް ފައްޓަވަމުން ރައީސް ސޯލިހު ދެއްވި ރިޔާސީ ބަޔާނުގައި ވެސް ވަނީ ވެށިފަހި ޕްރަގްރާމްގެ ދަށުން މާލެއިން ލިބިފައިވާ ބިންކޮޅުގެ ބަދަލުގައި ހުޅުމާލެއިން ގޯތި ލިބޭނެ ކަމުގެ ލިޔުން ލިބި، މިހާތަނަށް ގޯތި ލިބިފައިނުވާ މީހުންނަށް ވަރަށް އަވަހަށް ގޮތްތަކެއް ހަމަޖެހިގެންދާނެ ކަމަށް ވިދާޅުވެފައެވެ.
