ސްޕެއިންގައި ޓެރަރިޒަމްގެ ހަމަލާތަކާ ދެކޮޅަށް ހިންގި އޮޕްރޭޝަންގައި އަލްޖީރިއާގެ ދެ ރައްޔިތަކު ހައްޔަރު ކޮށްފި
މިދެމީހުން ހައްޔަރު ކުރީ ބާސެލޯނާއިން
މިއޮޕްރޭޝަންގައި ހައްޔަރު ކުރި މީހުންގެ ގެންދަނީ
ސްޕެއިންގައި ޓެރަރިޒަމްގެ ހަމަލާތަކާ ދެކޮޅަށް ހިންގި ޚާއްސަ އޮޕްރޭޝަނެއްގައި އަލްޖީރިއާގެ ދެ ރައްޔިތަކު ހައްޔަރު ކޮށްފިއެވެ.
މީޑިއާތަކުގައި ރިޕޯޓު ކޮށްފައިވާ ގޮތުގައި ކަޓަލަންގެ ޕޮލިސް ހިންގި ޚާއްސަ އޮޕްރޭޝަންގައި މި ދެމީހުން ހައްޔަރު ކުރީ ބާސެލޯނާ ސިޓީންނެވެ.
ހައްޔަރު ކުރި ދެމީހުންނަކީ 2017 ވަނަ އަހަރުން ފެށިގެން ފުލުހުން ފާރަލަމުން އައި ދެމީހުންނެވެ. އަދި އެމީހުން ހައްޔަރު ކޮށްފައިވަނީ ހަމަލާ ދިނުމަށް ރާވަމުން ދަނިކޮށް ބޮން ހަދާ ސާމާނުތަކާއެކު ކަމަށް މީޑިއާތަކުގައި ރިޕޯޓު ކޮށްފައިވެއެވެ.
މި އޮޕަރޭޝަންތަކުގައި ހަމަލާ ދިނުމަށް ރާވާފައިވާ ސަރަހައްދުތަކާއި، ހަމަލާ ދިނުމަށް ބޭނުންކުރާ ގޮވާ ޒާތުގެ ތަކެއްޗާއި، ބޭނުން ކުރާ ހަތިޔާރުތައް ހޯދިފައިވާ ކަމަށް ފުލުހުން ބުނެއެވެ.
މިއަހަރުގެ މެއި މަހު ވެސް މޮރޯކޯއަށް ނިސްބަތްވާ މީހެއް ވެސް ބާސެލޯނާ އިން ވަނީ ހައްޔަރުކޮށްފައެވެ. އެމީހާ ހައްޔަރު ކޮށްފައިވަނީ ހަނގުރާމަ ޖަމާއަތެއް ކަމަށްވާ އައިސިސްއާ ގުޅުން އޮތް ކަމުގރ ތުހުމަތުގައެވެ. އަދި އައިސިސްއާ ގުޅިގެން ހަމަލާ ދިނުމަށް ރޭވުންތައް ރާވަމުންދާ ކަމަށް ބުނެފައިވެއެވެ.
އިންޓީރިއާ މިނިސްޓްރީގެ ޑޭޓާތައް ދައްކާ ގޮތުން މިއަހަރުގެ ކުރީކޮޅު އައިސިސްއާ ގުޅުން އޮތް 16 މީހަކު ވެސް ވަނީ ހައްޔަރު ކޮށްފައެވެ.
