އިންދިރާގާންދީ މެމޯރިއަލް ހޮސްޕިޓަލް (އައިޖީއެމްއެޗް) އިން އަލަށް ތައާރަފުކުރި ޔުނީފޯމްގެ ޚަރަދު ކުޑަ ކަމަށް އެ ހޮސްޕިޓަލުން ބުނެފިއެވެ.

އައިޖީއެމްއެޗުން ބުނީ މީގެ ކުރިން ނަރުހުންގެ ޔުނީފޯމް ފަހަނީ އައުޓްސޯސް ކޮށްގެން ކަމުގައިވާތީ މިއީ ވަރަށް ބޮޑު ޚަރަދެއް ހިނގާ ކަމެއް ކަމަށެވެ. ނަމަވެސް މި ފަހަރުގެ ޔުނީފޯމަކީ ރާއްޖެއިން ބޭރުން ފޮތި ގެނެސްގެން ފަހާފައިވާ ޔުނީފޯމެއްކަމުން މި އައު ޔުނީފޯމްގެ ސަބަބުން މިކަމަށް ދައުލަތުން ކުރަމުން ދިޔަ ޚަރަދު ކުޑަވެގެން ދިޔަ ކަމަށް އެ ހޮސްޕިޓަލުން ވަނީ ފާހަގަކޮށްފައެވެ.

އައިޖީއެމްއެޗުން ބުނީ ނަރުހުންނާއި އެހެނިހެން މުވައްޒަފުން ލާ ޔުނީފޯމަކީ ހޮސްޕިޓަލުގެ ޚަރަދުގައި އަހަރަކު އެއްފަހަރު ފޯރުކޮށް ދޭންޖެހޭ އެއްޗެއް ކަމަށެވެ. ނަމަވެސް 2018 ވަނަ އަހަރުން ފެށިގެން ތަފާތު ސަބަބުތަކާއި ހެދި ނަރުހުންނަށް ޔުނީފޯމް ފޯރުކޮށްދެވިފައެއް ނުވާ ކަމަށް އައިޖީއެމްއެޗުން ބުނެއެވެ.

އަލަށް ތައާރަފް ކުރެވުނު ޔުނިފޯމާ ބެހޭ ގޮތުން އައިޖީއެމްއެޗުން ބުނީ މިހާރު މި ފޯރުކޮށްދެވުނު ޔުނީފޯމަކީ 2019 ވަނަ އަހަރު ހަވާލުކުރަން ކަނޑައެޅުނު ޔުނީފޯމެއް ކަމަށެވެ.

މީގެ ކުރިން ބޭނުންކުރަމުންދިޔަ ޔުނީފޯމާއި މެދު، އެކި ބާވަތުގެ ޝަކުވާ އައިސްފައިވާ ކަމަށް ވެސް އައިޖީއެމްއެޗުން ބުނެއެވެ.

މީގެ އިތުރުން އައިޖީއެމްއެޗުން ބުނީ 12 ޖުލައި 2020 ގައި ބޭނުން ކުރަން ފެށި ނަރުހުންގެ އައު ޔުނީފޯމަކީ ނަރުހުންނާއި އަދި ދާއިރާގެ އެކި ފަރާތްތަކުގެ މަޝްވަރާ އާއި އެކު ފަރުމާ ކުރެވިފައިވާ، ޔުނީފޯމާއި މެދު ހުށަހަޅާފައިވާ ގިނަ ޝަކުވާތަކަކަށް ހައްލު ލިބޭ ފަދަ ޔުނީފޯމެއް ކަމަށެވެ.

އައިޖީއެމްއެޗުން ބުނީ ޔުނީފޯމަކީ އަހަރަކު އެއްފަހަރު ފޯރުކޮށްދޭންޖެހޭ އެއްޗެއް ކަމަށްވާއިރު، ޔުނީފޯމާއި މެދު ހުރި ޝަކުވާތަކަށް ހައްލު ލިބި، ކުޑަ ޚަރަދު ކުޑަވާނެ ގޮތަށް މިފަދަ ކަންކަން ކުރުމަކީ ހޮސްޕިޓަލުގެ މެނޭޖްމަންޓުން އަބަދު ވެސް އިސްކަންދޭ ކަމެއް ކަމުގައެވެ.