މިގަވާއިދު ގެޒެޓްވެގެން ދިޔުމާއި ގުޅިގެން ޚިދުމަތަށް އެދޭ މީހުންނަށް ކަންކަން ކުރަންވީ ގޮތް ސާފުކޮށް އެނގިގެންދާނެ
އިކޮނޮމިކް މިނިސްޓަރ ފައްޔާޒު އިސްމާއީލް މަޖިލީހުގެ ޖަލްސާގައި ވާހަކަ ދައްކަވަނީ
ބިދޭސީ މަސައްކަތްތެރިން ގެންގުޅުމާއި ބެހޭ މުޅި ގަވާއިދު އެއްކޮށް ބަދަލުކޮށް މިހަފްތާތެރޭގައި ގެޒެޓް ކުރެވޭވަރު ވާނެ ކަމަށް އިކޮނޮމިކް މިނިސްޓަރ ފައްޔާޒު އިސްމާއީލް ވިދާޅުވެއްޖެއެވެ.
ހޯމަ ދުވަހު އޮތް ރައްޔިތުންގެ މަޖިލީހުގެ ޖަލްސާގައި ފަހަކަށް އައިސް ބިދޭސީން ކުރަމުންދާ މުޒާހަރާތަކާއި ގުޅިގެން ހުށަހެޅި ކުއްލި މައްސަލައަށް މެމްބަރުން ބަހުސްކުރައްވަމުން ގެންދަވަނިކޮށް އެކޮނޮމިކް މިނިސްޓަރ ވަނީ މަޖިލީހުގެ ރައީސް، ރައީސް މުހައްމަދު ނަޝީދުގެ އެދިވަޑައިގަތުމަކަށް މި މައްސަލައާ ގުޅޭގޮތުން ވާހަކަ ދައްކަވާފައެވެ.
މިނިސްޓަރ ވިދާޅުވީ ބިދޭސީންގެ މައްސަލަ ހައްލުކުރުމަށް އިކޮނޮމިކް މިނިސްޓްރީން ކުރަމުންދާ މަސައްކަތްތަކުގެ ތެރެއިން މިދިޔަ އަށް މަސް ދުވަހު މިނިސްޓްރީން ކުރަމުންދިޔަ އެއް މަސައްކަތަކީ މި ގަވާއިދު ބަދަލުކުރުމުގެ މަސައްކަތް ކަމަށެވެ. އަދި އެއީ އުނދަގޫ މަސައްކަތެއް ކަން ފާހަގަ ކުރައްވާ ފައްޔާޒް ވިދާޅުވީ، ގަވާއިދު އެކުލަވާލުމުގައި ގިނަ ކަންތައްތަކަށް ބަލަންޖެހުނު ކަމަށެވެ.
މިނިސްޓަރ ވިދާޅުވީ މިގަވާއިދު ގެޒެޓް ވެގެން ދިޔުމާއި ގުޅިގެން ޚިދުމަތަށް އެދޭ މީހުންނަށް ކަންކަން ކުރަންވީ ގޮތް ސާފުކޮށް އެނގިގެންދާނެ ކަމަށެވެ.
މިނިސްޓަރ ވިދާޅުވީ ބިދޭސީންގެ މައްސަލައަކީ ދިވެހި ތާރީޚުގައި ހިނގާފައިވާ އެންމެ ހަޑިމުޑުދާރު ކަންތައްކަމަށެވެ.
އިންސާނުންތަކެއް ވިއްކައިގެން ރާއްޖޭގައި ކޮށްފައިވާ މިހާ ހަޑިމުޑުދާރު ކަމެއް ފެނިވަޑައިނުގަންނަވާ ކަމަށާއި އެމްއެމްޕީއާރުސީގެ މައްސަލައަކީ ބިދޭސީންގެ މައްސަލައާ އަޅާބަލާއިރު މުޑުދާރު މައްސަލައެއް ނޫންކަމަށް މިނިސްޓަރ ވިދާޅުވިއެވެ.
މިކަމަކީ އެތައް ބައިވަރު އިންސާނުންތަކެއް އަނިޔާވެރިކަމާއެކު އެމީހުންގެ ނާޖާއިޒު ފައިދާ ހޯދާ އަދި މުޅި ރާއްޖޭގެ ގައުމީ ސަލާމަތަށް އޭގެ ނުރައްކާތަކާއި އަދި އިގްތިޞާދަށާއި އިޖުތިމާއީ ފޭރާމަށް ވެސް އޭގެ ނުރައްކާތަކެއް ކުރިމަތި ކުރުވާފައިވާކަމެއް ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ބިދޭސީންގެ މައްސަލަ ހައްލުކުރުމަށް މިހާރު ކުރަމުންދާ މަސައްކަތްތައް އެގޮތަށް ކުރައްވަމުން ގެންދަވާނެ ކަމަށެވެ.
ބިދޭސީންގެ މައްސަލަ ހައްލުކުރުމަށް މި ސަރުކާރުން ގިނަ މަސައްކަތްތަކެއް ފަށާފައިވާއިރު، ބިދޭސީން ދިރިއުޅޭ ތަންތަނުގެ ހާލަތު ރެގިއުލޭޓް ކުރުމަކީ އޭގެ ތެރެއިން މުހިއްމު އެއް މަސައްކަތެވެ. އެގޮތުން، ކުރިއަށް އޮތް ތަނުގައި ބިދޭސީން އެތެރެކުރަން ހުއްދަ ދޭއިރު، މިކަންކަމަށް ބަލާނެ ކަމަށް އިކޮނޮމިކް މިނިސްޓްރީން ވަނީ ހާމަކޮށްފައެވެ.
ބިދޭސީންގެ އެކޮމޮޑޭޝަންގެ މައްސަލައަށް ގެނައުމުގެ ގޮތުން ގުޅިފަޅުން 30 ހެކްޓަރުގެ ބިން ހިއްކުމުގެ މަސައްކަތް ވެސް ސަރުކާރުން ވަނީ ފަށާފައެވެ. މި ސަރަހައްދު ހިއްކައި އެތަނުގައި އިމާރާތްކުރަން ނިންމާފައިވާ ވަރކަރސް ވިލެޖްގެ މަސައްކަތް ނިމުމުން، 40،000 ބިދޭސީންނަށް ބޭނުންވާ ބޯހިޔާވަހިކަން ހަމަޖެހިގެންދާނެ ކަމަށް ސަރުކާރުން ބުނެއެވެ.
އޭގެ އިތުރުން، ލިޔެކިޔުމެއްނެތި ރާއްޖޭގައި އުޅޭ ބިދޭސީން ރެގިއުލަރައިޒް ކުރުމުގެ ޕްރޮގްރާމަކާއި، ރާއްޖެއަށް ބައެއް ގައުމުތަކުން އެތެރެވެވޭ ބިދޭސީންގެ އަދަދުތައް ލިމިޓް ކުރުމުގެ މަސައްކަތް ވަނީ ކޮށްފައެވެ. ބިދޭސީން އެތެރެވެވޭ ލިމިޓުތައް ކަނޑައެޅުމާއެކު، ބަންގްލަދޭޝްއިން ރާއްޖެއަށް ނަން ސްކިލްޑް ލޭބަރުން ގެނައުން ސަރުކާރުން ވަނީ މަނާކޮށްފައެވެ.
