ބިދޭސީން ކުރަމުންދާ އިހުތިޖާޖުތައް ކޮންޓްރޯލް ނުކުރެވޭނަމަ ގައުމީ ސަލާމަތަށް ނުރައްކާވެދާނެ
އިތުރު ސައިޓުތަކުގައި މުޒާހަރާކުރަން ފެށުމުން ކޮންޓްރޯލް ނުކުރެވިދާނެ: ފުލުހުން
ޗީފް ސުޕްރިންޑެންޓް އޮފް ޕޮލިސް މުހައްމަދު ބަޝީރު
ބިދޭސީން ކުރަމުންދާ އިހުތިޖާޖުތައް ކޮންޓްރޯލް ނުކުރެވޭނަމަ ގައުމީ ސަލާމަތަށް ނުރައްކާވެދާނެ ކަމަށް ފުލުހުން ބުނެފިއެވެ.
ފުލުހުން މިހެން ބުނެފައިވަނީ ރާއްޖޭގައި މަސައްކަތްކުރާ ބިދޭސީންގެ ފަރާތުން ހިންގަމުންދާ ތަފާތު ހަމަނުޖެހުންތަކާއި ގުޅޭގޮތުން ހޯމަ ދުވަހު ބޭއްވި ގައުމީ ސަލާމަތާއި ޚާރިޖީ ގުޅުންތަކުގެ ކޮމިޓީ ބައްދަލުވުމުގައެވެ.
ބިދޭސީން ކުރަމުންދާ މުޒާހަރާތައް އިތުރުވެ، ދިގުލައިގެންދާނަމަ ގައުމީ ސަލާމަތަށް ހުރީ ކިހާ ބޮޑު ނުރައްކަލެއްތޯ ކޮމެޓީގެ މުގައްރިރު، މަރަދޫ ދާއިރާގެ މެމްބަރު އިބްރާހިމް ޝަރީފް ސުވާލުކުރެއްވުމުން ޗީފް ސުޕްރިންޑެންޓް އޮފް ޕޮލިސް މުހައްމަދު ބަޝީރު ވަނީ ރާއްޖޭގެ އެކި ކަންކޮޅުތަކުގައި ސައްހަ ލިޔެކިއުމެއްނެތް ވަރަށް ގިނަ އަދަދެއްގެ ބިދޭސީން އުޅެމުންދާކަން ފާހަގަކުރައްވާފައެވެ.
އޭނާ ވިދާޅުވީ މިހާރު ކުރަމުންދާ މުޒާހަރާތަކާއި ގުޅިގެން އިތުރު ބިދޭސީން މިފަދަ މުޒާހަރާތަކުގައި ބައިވެރިވެ، އިތުރު ސައިޓުތަކުގައި މުޒާހަރާކުރަން ފެށުމުން ކޮންޓްރޯލް ނުކުރެވިދާނެ ކަމަށެވެ. އަދި މިފަދަ އިހުތިޖާޖުތައް ކޮންޓްރޯލް ނުކުރެވުމަކީ އޮތް ނުރައްކަލެއް ކަމަށް ބަޝީރު ވިދާޅުވިއެވެ.
ހޯމަ ދުވަހު ހުޅުމާލޭގައި ކުރެވުނު މުޒާހަރާގައި ފުލުހުންނާއި ފުލުހުންގެ އުޅަނދުތަކަށާއި އަދި ސައިޓުގައި ހުރި އިކުއިޕްމެންޓަށް ގެއްލުންދީފައިވާކަން ފާހަގަކުރައްވާ އޭނާ ވިދާޅުވީ ކުރިއަށް އޮތްތަނުގައި މި ފަދަ އިހުތިޖާޖުތައް ބޮޑުވެދާނެ ކަމުގެ ފުރުސަތު އެބައޮތް ކަމަށެވެ.
