އިމިގްރޭޝަންގެ ތެރެއިން މަސައްކަތް ކުރަނީ ބިދޭސީންގެ މައްސަލަ ހައްލުވިޔަ ނުދޭން: ވިސާމް
13 ޖުލައި 2020 | ހޯމަ 10:39ކުރިން ވެސް އަދި މިހާރުވެސް އިމިގްރޭޝަންގެ ތެރެއިން ޖަރީމާތައް ހިންގަމުންދާކަމަށް ވިސާމު ތުހުމަތު ކުރެއްވި
ގަމު ދާއިރާގެ މެމްބަރު މުހައްމަދު ވިސާމް: ބިދޭސީން މައްސަލާގައި އިމިގްރޭޝަންގެ ކުރީގެ ވެރިންނާއި މިހާރުގެ ވެރިންގެ ތެރެއިން \"ޖަރީމާ\" ހިންގި ފަރާތްތަކުގެ މައްޗަށް ތަހުގީގު ހިންގުމަށް ގޮވާލެއްވި
މޯލްޑިވްސް އިމިގްރޭޝަންގެ ތެރެއިން މަސައްކަތްކުރަނީ ބިދޭސީންގެ މައްސަލަ ހައްލުވިޔަ ނުދޭން ކަމަށާއި، އިމިގްރޭޝަންގައި ތިބި އެފަދަ ވެރިންނާމެދު ފިޔަވަޅު އެޅުމަށް ރައްޔިތުންގެ މަޖިލީހުގެ ގަމު ދާއިރާގެ މެމްބަރު މުހައްމަދު ވިސާމް ގޮވާލައްވައިފިއެވެ.
ގަވާއިދާ ޚިލާފަށް އެތެރެފައިވާ ބިދޭސީން މެދުވެރިކޮށް ރާއްޖޭގެ ގައުމީ ސަލާމަތަށް ނުރައްކާތެރިވާ ގޮތަށް ރާއްޖޭގެ ސަލާމަތީ ބާރުތަކާއި ކުރިމަތިލާ މުދަލަށް ގެއްލުންދިނުމަށް ހިތްވަރު ލިބޭގޮތަށް އަމަލުކުރަމުންދާތީ އެކަން ކުށްވެރިކުރުމުގެ ގޮތުން، ރައްޔިތުންގެ މަޖިލީހުގެ ބިލެތްދޫ ދާއިރާގެ މެމްބަރު އަހުމަދު ހަލީމް ރައްޔިތުންގެ މަޖިލީހަށް ކުއްލި މައްސަލައަށް ބަހުސް ކުރައްވަމުން ވިސާމް ވިދާޅުވީ، ބިދޭސީންގެ މައްސަލަ ސީރިއަސް ވެގެން އުޅެންވީ ފުލުހުންނާ ކުރިމަތިލި ހިސާބުން ނޫން ކަމަށާއި ބިދޭސީންގެ މައްސަލައަކީ މާކުރިންވެސް ހައްލުކުރަންޖެހި، ނުކުރެވިފައިވާ މައްސަލައެއް ބޮޑު މައްސަލައެއް ކަމަށެވެ.
ވިސާމް ވިދާޅުވީ، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ވެރިކަމުގައި ބިދޭސީންގެ މައްސަލަ ހައްލުކުރުމަށް އެކަށީގެން މަސައްކަތްތަކެއް ކުރަމުންދާ ކަމަށެވެ. އެގޮތުން ޓާސްކްފޯސްއެއް ހަދައި، ބިދޭސީންގެ މައްސަލަ ހައްލުކުރުމުގެ ގޮތުން، އެކިއެކި ގޮތްގޮތުން މަސައްކަތް ކުރައްވާފައިވާކަން ވިސާމް ފާހަގަކުރެއްވިއެވެ.
ނަމަވެސް، ބިދޭސީންގެ މައްސަލަ ހައްލު ކުރުމަށް ސަރުކާރުން މަސައްކަތް ކުރަމުންދާއިރު، އިމިގްރޭޝަންގައި ތިބި ނުފޫޒުފަދަ ވެރިންގެ ސަބަބުން އެމަސައްކަތްތަކަށް ހުރަސް އެޅެމުންދާ ކަމަށް ވިސާމް ވިދާޅުވިއެވެ. އެހެންކަމުން އެފަރާތްތައް މަގާމުން އެކަހެރިކޮށް، އެ ފަރާތްތަކުގެ މައްސަލަތައް ބެލުމަށް ކަމާބެހޭ އިދާރާތަކަށް ވިސާމް ވަނީ ގޮވާލައްވާފައެވެ.
ވިސާމު ވިދާޅުވީ ރާއްޖޭގައި ގަވާއިދާ ހިލާފަށް އުޅެ، މަނީ ލޯންޑަރިންގ ފަދަ ބޮޑެތި ޖިނާއީ އަމަލުތައް ހިންގާ މީހުން ޑީޕޯޓް ކޮށްލުމަކުން މައްސަލައަށް ހައްލެއް ނާންނާނެ ކަމަށާއި، އެފަދަ މީހުންނާއި އެމީހުންނާއެކު، ބައިވެރިވާ މީހުންގެ މައްސަލަތައް ތަހުގީގުކޮށް ފިޔަވަޅު އަޅަންޖެހޭ ކަމަށެވެ. އަދި މިކަންކަމުގައި އިމިގްރޭޝަންގެ ވަޒީފާގައި އުޅޭ ނުވަތަ ކުރިން އުޅުނު ފަރާތެއްވިޔަސް އެފަރާތްތަކުގެ މައްޗަށް ތަހުގީގު ހިންގުމަށް ވިސާމް ވަނީ ގޮވާލައްވާފައެވެ.
މިވަގުތު ވެސް އިމިގްރޭޝަންގެ ވަޒީފާގައި އެފަދަ ތުހުމަތު ކުރެވޭ މީހުން އެބައުޅޭ ކަމަށާއި، އެފަދަ ބަޔަކު އިމިގްރޭޝަންގެ ވަޒީފާގައި އުޅޭނަމަ، އެ މީހަކު ވަޒީފާއިން އެކަހެރިކޮށް، އެމައްސަލަތައް ފުލުހުން ތަހުގީގު ކުރުމަށް ވިސާމް ވަނީ ގޮވާލައްވާފައެވެ.
ރާއްޖޭގައި ލިޔެކިޔުމެއް ނެތި އުޅޭ ބިދޭސީންގެ މައްސަލަ އިތުރަށް ގޯސްވެގެން ދިޔައީ ކޮވިޑުގެ ސަބަބުން ކުންފުނިތަކުގެ މާލީ ހާލަތު ދަށަށް ގޮސް، ގިނަ އަދަދެއްގެ މުވައްޒަފުންނަށް މުސާރަ ނުދީ ކުންފުނިތަކުން މަސައްކަތް ކުރުވުމާއި ގުޅިގެންނެވެ. މިފަހުން ބިދޭސީން ކުރި ދެތިން އިހުތިޖާޖެއް ނުރައްކާތެރި މުޒާހަރާތަކަށް ބަދަލުވެގެން ގޮސް، މުދަލާއި ތަކެއްޗަށް ގެއްލުން ދީފައިވެއެވެ.
