މިނިސްޓަރު އިމްރާން ޖިންސީ ފުރައްސާރަކުރި ކަމަށް ބުނާ އޯޑިއޯގެ ސައްހަކަން ދަނީ ބަލަމުން: ފުލުހުން
12 ޖުލައި 2020 | އާދީއްތަ 11:39ދައުރުވާ އޯޑިއޯގެ މައްސަލަ ފުލުހުންނަށް ހުށަހަޅާފައިނުވޭ
ހޯމް މިނިސްޓަރު ޝެއިހް އިމްރާން އަބްދުﷲ
ހޯމް މިނިސްޓަރު ޝެއިހް އިމްރާން އަބްދުﷲ ޖިންސީ ފުރައްސާރަކުރި ކަމަށް ބުނެ ސޯޝަލް މީޑިއާގައި ދައުރުވަމުންދާ އޯޑިއޯގެ ސައްހަކަން ބެލުމުގެ މަސައްކަތް ކުރަމުންދާ ކަމަށް މޯލްޑިވްސް ޕޮލިސް ސަރވިސްއިން ބުނެފިއެވެ.
ފުލުހުން ބުނީ މިނިސްޓަރު އިމްރާން ޖިންސީ ފުރައްސާރަކުރި ކަމަށް ބުނެ ދައުރުވާ އޯޑިއޯގެ މައްސަލަ ފުލުހުންނަށް ހުށަހަޅާފައިނުވާ ކަމަށެވެ. އޯޑިއޯ ސޯޝަލް މީޑިއާ މެދުވެރިކޮށް ސަމާލުކަމަށް އައިސްފައިވާތީ އޯޑިއޯގެ ސައްހަކަން ބެލުމަށް ކުރަންޖެހޭ ކަންކަން ކުރަމުންދާ ކަމަށެވެ.
އާދިއްތަ ދުވަހު ދައުރުވަމުން އަންނަ އޯޑިއޯގައި އަންހެނަކު ވަނީ މިނިސްޓަރު އިމްރާންގެ މައްޗަށް ޖިންސީ ގޯނާކުރިކަމުގެ ތުހުމަތުކޮށް ގިނަ ވާހަކަތަކެއް ދައްކާފައެވެ. ނަމަވެސް މިއޯޑިއޯއިން އެހެން މީހެއް އަޑެއް ނީވެއެވެ.
ހޯމް މިނިސްޓަރު ޝެއިހް އިމްރާން އަބްދުﷲ ޖިންސީ ފުރައްސާރަކުރި ކަމަށް ބުނެ އޯޑިއޯ ދައުރު ކުރަމުންދާއިރު އަލީ ވަހީދު ޓޫރިޒަމް މިނިސްޓްރުކަމުން ވަކި ކޮށްފައިވަނީ އެ މިނިސްޓްރީގެ މުވައްޒަފުންތަކަކަށް ޖިންސީ ގޯނާކުރި ކަމުގެ ތުހުމަތުތަކާއި ގުޅިގެންނެވެ. އަލީ ވަހީދު އަށް ތުހުމަތުތައް ކުރި މުވައްޒަފުން ބުނާ ގޮތުން، އެ މުވައްޒަފުންނަށް ޖިންސީ ގޯނާ ކުރާތާ ގިނަ ދުވަސްތަކެއް ވަނީ ވެފައެވެ.
