ކުޑަފަރިން މާލެ ގެނައިތަނުން ކޮވިޑް-19ށް ޕޮޒިޓިވްވި މީހާ ފުރަތަމަ ގެންދިޔައީ މަނަދުއަށް

ނ. ކުޑަފަރިން ބޭސްފަރުވާއަށް މާލެ ގެނައިތަނުން ކޮވިޑް-19ށް ޕޮޒިޓިވްވި މީހާ ފުރަތަމަ ގެންދިޔައީ އެއަތޮޅު މަނަދޫގައި ހުންނަ ނ. އަތޮޅު ހޮސްޕިޓަލަށް ކަމަށް ކުޑަފަރީ ކައުންސިލުން ބުނެފިއެވެ.

އުމުރުން 92 އަހަރުގެ މިފިރިހެން މީހާ މަނަދުއަށް ގެންދިޔައީ ހުކުރު ދުވަހުގެ ރޭ ކަމަށް ކުޑަފަރީ ކައުންސިލުގެ ނައިބު ރައީސް ޖަޒުލާން އާދަމް "ރާއްޖެ.އެމްވީ" އާ ވާހަކަ ދައްކަވަމުން ވިދާޅުވިއެވެ. އެމީހާ މަނަދުއަށް ގެންދިޔައީ ފާހާނާއަށް ވެއްޓިގެން ކަމަށާއި މަނަދޫއަށް ގެންގޮސްފައިވަނީ ސީ އެމްބިއުލަންސްގައި ކަމަށް ޖަޒްލާން ވިދާޅުވިއެވެ. އެމީހާ ޕޮޒިޓިވް ވެފައިވާކަން އެޗްޕީއޭއިން އަންގާފައިވަނީ ހޮނިހިރު ދުވަހުގެރެއެވެ.

Advertisement

މި މީހާ ޕޮޒިޓިވްވުމާއި ގުޅިގެން ކުޑަފަރި ވަނީ މޮނިޓަރިންގެ ހާލަތަށް ގެނެސްފައެވެ. އަދި މިމީހާއާ ކޮންޓެކްޓްވެފައި ތިބި މީހުން ބަލަމުންދާ ކަމަށާއި މިހާތަނަށް އައިއިރު 30 މީހަކު ޑައިރެކްޓް ކޮންޓެކްޓުންގެ ގޮތުގައި ފާހަގަކުރެވިފައިވާ ކަމަށް ޖަޒްލާން ވިދާޅުވިއެވެ. އަދި އެމީހުން މިހާރު ކަރަންޓީނު ކުރެވި، ހޯމް ކަރަންޓީނުގައި ތިބިއިރު، ހަތަރު މީހަކު ތިބީ ކައުންސިލުން ހަމަޖައްސައިގެން ގެސްޓް ހައުސްއެއްގައި ކަމަށް ޖަޒްލާން ވިދާޅުވިއެވެ.

ޖަޒްލާން ވިދާޅުވީ ގިނަ އަދަދެއްގެ ބަޔަކު ކްލޯޒް ކޮންޓެކްޓުންގެ ގޮތުގައި ފާހަގަވެގެން ގޮސްފައިވަނީ އެ މީހާއަކީ ފާހަނައަށް ވެއްޓިގެން މަނަދުއަށް ގެންދަން މަސައްކަތް ކުރި މީހަކަށްވާތީ، އޭނާ ގެންދިޔުމުގައި އެކި ގޮތްގޮތުން މީހުން ހަރަކާތްތެރި ވެފައިވާތީ ކަމަށެވެ.

މިކަމާއި ގުޅޭގޮތުން އިތުރު މައުލޫމާތުދެމުން ނ. އަތޮޅު ހޮސްޕިޓަލުން ބުނީ އެމީހާ ގެނައީ ފައިގައި ރެނދެއް ލާފައިވުމުން ކަމަށެވެ. އަދި އިތުރު ފަރުވާއަށް މާލެއަށް ސީ އެމްބިއުލަންސްގައި ފޮނުވާލިއިރު، މިހާތަނަށް އައިއިރު ކޮންޓެކްޓް ޓްރޭސިންގެ ތެރެއިން 16 މީހަކު ފާހަގަވެފައިވާ ކަމަށް އެހޮސްޕިޓަލުން މައުލޫމާތުދެއެވެ. މީގެތެރެއިން 13 މީހުންނަކީ އަތޮޅު ހޮސްޕިޓަލުގައި މަސައްކަތްކުރާ މީހުން ކަމަށާއި، މީގެތެރެއިން 10 މީހުންނަކީ ނަރުހުން ކަމަށްވެސް ހޮސްޕިޓަލުން މައުލޫމާތުދެއެވެ. މި މީހުންނަށް މިހާރު ގޭގައި ތިބުމަށް އަންގާފައިވާކަމަށް ހޮސްޕިޓަލުން މައުލޫމާތުދެއެވެ.

ނ. މަނަދޫއިން މީގެ ކުރިން ވަނީ 10 މީހަކު ކޮވިޑް-19ށް ޕޮޒިޓިވްވެފައެވެ. އެތަނުން 9 މީހުންނަކީ އެރަށުން މާލެ ގެނެވުނު އުމުރުން ދުވަސްވީ ބަލިމީހަކާ ކޮންޓެކްޓްވި މީހުންނެވެ. އެމީހާ ކޮވިޑް-19ން ރަނގަޅުވުމަށްފަހު ވަނީ ސިއްހީ އެހެން މައްސަލަތަކެއްގައި ނިޔާވެފައެވެ.

މަނަދޫން ބަޔަކު ޕޮޒިޓިވްވުމާއި ގުޅިގެން އެރަށް މޮނިޓަރިންގެ ހާލަތަށްވެސް ގެނައެވެ.