ބޮސްނިއާ ގަތުލްއާމް ފަދަ އިތުރު ގަތުލްއާންމެއް ހިނގުން ހުއްޓުވަންޖެހޭ: ރައީސް ސޯލިހު
މިގަތުލް އާންމުގައި ދުނިޔެ ދޫކުރި ފަރާތްތަކުގެ ހަނދާނުގައި މިފަދަ އިތުރު ގަތުލް އާންމެއް ހިންގުން ހުއްޓަން ޖެހޭ
ބޮސްނިއާ ހަޒްގޮވީނާ ގަތުލްއާންމުގައި މަރުވި މީހުންގެ ޖަނާޒާގެ ތެރެއިން: މިގަތުލްއާންމުގައި 8،000 މުސްލިމުން ވަނީ ދުނިޔެ ދޫކޮށްފައި
ބޮސްނިއާ ގަތުލްއާންމަށް 25 އަހަރު މިއަދު ފާހަގަ ކުރަމުންދާއިރު، އެ ގަތުލްއާންމުގައި މަރުވި މީހުންގެ ހަނދާނުގައި އެފަދަ އިތުރު ގަތުލްއާންމެއް ހިނގުން ހުއްޓުވަން ޖެހޭ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ވިދާޅުވެއްޖެ އެވެ.
ރައީސް ސޯލިހު ހޮނިހިރު ދުވަހު ކުރެއްވި ޓްއީޓުގައި ވިދާޅުވީ ބޮސްނިއާ ގަތުލްއާންމަށް މިއަދު 25 އަހަރު ފާހަގަ ކުރަމުންދާއިރު އެގަތުލްއާންމުގައި ދުނިޔެ ދޫކުރި 8000 (އަށް ހާސް) މުސްލިމު ކުޑަ ފިރިހެން ކުދިންނާއި، ފިރިހެނުންގެ މަރުގެ ހަނދާނުގައި މިފަދަ އިތުރު ގަތުލްއާންމެއް ހިންގުން ހުއްޓުވަން ޖެހޭ ކަމަށެވެ.
ބޮސްނިއާ ހަޒްގޮވީނާ ގަތުލްއާންމަކީ ދެވަނަ ބޮޑު ހަނގުރާމައިގެ ފަހުން ޔޫރަޕްގެ ގައުމެއްގައި ހިންގައިފައިވާ އެންމެ ބޮޑު ގަތުލްއާންމެވެ. އެގޮތުން ސާބިއާގެ ސިފައިން ފަސް ދުވަހުގެ ތެރޭގައި 8،000 (އަށް ހާސް) ހަތިޔާރު ނެތް މުސްލިމުންވަނީ މަރާލައިފައެވެ. މީގެ އިތުރުން އެތަށް ހާސް މުސްލިމު އަންހެނުންނަށް ޖިންސީ ފުރައްސާރަ ކޮށްފައިވާއިރު މިގަތުލްއާންމު ނިންމާ މިނިވަންކަން ބޮސްނިއާގެ ރައްޔިތުންނަށް ލިބިފައިވަނީ 1992 ވަނަ އަހަރުގައެވެ.
