ޖިންސީ ގޯނާއާ ދެކޮޅަށް މިއަދު ވެސް އަޑުއުފުލައިފި
މުޒާހަރާ އިންތިޒާމް ކުރީ ވޮއިސް އޮފް ޗިލްޑްރެންސް އިން
ޖިންސީ ގޯނާއާ ދެކޮޅަށް މާލޭގައި ބޭއްވި މުޒާހަރާގެ ތެރެއިން
ރާއްޖޭގައި މި ފަހަކަށް އައިސް ޖިންސީ ގޯނާތަކުގެ މައްސަލަތައް ގިނަވާތީވެ، އެކަމާއި ދެކޮޅަށް މާލޭގައި އަނެއްކާވެސް އަޑު އުފުލައިފިއެވެ.
ދާދި ފަހުން ވުޖޫދަށް އައި ވޮއިސް އޮފް ޗިލްޑްރެން (ވީއޯސީ) އިން އިންތިޒާމު ކޮށްގެން ބޭއްވި މުޒާހަރާ ފެށީ ހުކުރު ދުވަހު ހަވީރު މަޖީދީ މަގާއި ޗާންދަނީ މަގު ބައްދަލުވާ ޖަންކްޝަން ސަރަހައްދުންނެވެ.
ހަވީރު ހަތަރެއް ޖެހިއިރު ފެށި މުޒާހަރާ ނިންމާލާފައިވަނީ ޝޯޝަލް ސެންޓަރު ކުރިމަތިންނެވެ. މުޒާހަރާގެ ބައިވެރިންނަށް ހުރަސް ނާޅާ ފުލުހުން ވަނީ އެ މީހުންނަށް މުޒާހަރާ ކުރުމުގެ ފުރުސަތު ދީފައެވެ.
މުޒާހަރާގެ ބައިވެރިން ގޮވާލީ ޖިންސީ ގޯނާގެ މައްސަލަތައް އަވަހަށް ބެލުމަށާއި، އަދަބު ދޭން ޖެހޭ މީހުންނަށް ވީހާވެސް އަވަހަށް އަދަބު ދިނުމަށެވެ. 50ށް ވުރެ ގިނަ ބައިވެރިން ބައިވެރިވި މުޒާހަރާގައި، ސީރިއަސް ތުހުމަތުތަކެއް ކުރެވި މަގާމުން ވަކިކޮށްފައިވާ ކުރީގެ ޓޫރިޒަމް މިނިސްޓަރު އަލީ ވަހީދު ހައްޔަރު ކުރުމަށް ވަނީ ގޮވާލިއެވެ.
