ކޯޓަށް ހުށައަޅައިގެން 1017 ކުންފުންޏެއް އުވާލުމުގެ މަސައްކަތް ކުރަމުންދާ ކަމަށް މިނިސްޓްރީ އޮފް އިކޮނޮމިކް ޑިވަލޮޕްމަންޓުން ބުނެފިއެވެ.

ބުރާސްފަތި ދުވަހު މިނިސްޓްރީން ކުރި އިއުލާނެއްގައި ބުނީ، ދިވެހިރާއްޖޭގެ ކުންފުންޏާބެހޭ ޤާނޫނު ގެ 75 ވަނަ މާއްދާގެ (ށ) ގެ ދަށުން ކުންފުނި އުވާލުމުގައި އަމަލުކުރަންޖެހޭ ގޮތް ބަޔާންކުރާ ގަވާއިދުގެ 2 ވަނަ މާއްދާގެ ދަށުން، އަހަރީ ފީ ދައްކާފައިނުވާ ކުންފުނިތައް ކަނޑައަޅައި، 1979ން 2018 ގެ ނިޔަލަށް ޖުމްލަ 6050 ކުންފުންޏެއް ރެކޯޑު ކުރެވިފައިވާ ކަމަށެވެ.

އަދި އެއިން ކުންފުންޏެއް ހިންގަން ބޭނުންވާނަމަ، އެ ކުންފުންޏަކުން ފުރިހަމަ ކުރަންޖެހޭ ކަންކަން ފުރިހަމަ ކުރުމަށްފަހު، މިނިސްޓްރީއަށް އެންގުމަށް އިއުލާނު ކޮށްފައިވާނެ ކަމަށް މިނިސްޓްރީން ބުނެއެވެ. އެގޮތުން މިނިސްޓްރީން ކުރި އިޢުލާނުތަކާއި ގުޅިގެން، ޖުމްލަ 111 ކުންފުންޏެއް ހިންގުމަށް ބޭނުންވާ ކަމަށް އެ ކުންފުނިތަކުން އަންގާފައިވެއެވެ.

މިނިސްޓްރީން ބުނީ، އެ 6050 ކުންފުނީގެ ތެރެއިން އެއްވެސް ކުންފުންޏެއްގެ މައްޗަށް އެއްވެސް ދަރަންޏެއް ނުވަތަ ދަޢުވާއެއް އޮތްނަމަ ކަމާގުޅޭ ތަފްޞީލު މިނިސްޓްރީ އަށް ފޮނުވުމަށް ވެސް މުޙުލަތުތަކެއް ދެވިފައިވާ ކަމަށެވެ. އެގޮތުން މިނިސްޓްރީން ކުރި އިޢުލާނުތަކާ ގުޅިގެން 1017 ކުންފުންޏަކާ ގުޅޭ އެކި މައްސަލަތައް މިނިސްޓްރީއަށް ހުށަހަޅާފައިވާއިރު، އޭގެ ތެރޭގައި ބިދޭސީން ރާއްޖެއަށް ގެނައުމަށްފަހު ފުރިހަމަ ކުރަންޖެހޭ ކަންކަން ފުރިހަމަ ކޮށްފައި ނުވާ ކުންފުނިތައް ވެސް ހިމެނޭ ކަމަށް މިނިސްޓްރީން ބުނެއެވެ.

އޭގެ އިތުރުން، އެއްގަމުގައި ދުއްވާ އުޅަނދާއި ކަނޑުގައި ދުއްވާ އުޅަނދާ ގުޅޭ މައްސަލަތައް ހުރި ކުންފުނިތަކާއި، އެކި ޚިދުމަތްތަކަށް ފައިސާ ނުދައްކާ ކުންފުނިތަކާއި ޝަރުޢީ ކޯޓެއްގައި މައްސަލައެއް ބަލަމުންދާ ކުންފުނިތައް އޭގެ ތެރޭގައި ހިމެނޭއިރު، މި ހުރިހާ ކުންފުނިތަކެއް އުވާލުމަށް ކޯޓަށް ހުށައެޅުމަށް ވަނީ ނިންމާފައެވެ.

އޭގެ އިތުރުން، 6050 ކުންފުނީގެ ތެރެއިން 4924 ކުންފުނި ރެޖިސްޓްރާއަށް ލިބިގެންވާ ބާރުގެ ދަށުން އުވާލާފައިވާކަން މިނިސްޓްރީން ހާމަ ކޮށްފައިވެއެވެ.

ކުންފުންޏާ ބެހޭ ޤާނޫނުގެ 75 ވަނަ މާއްދާގެ (3) ގައި ބަޔާން ކޮށްފައިވާ ގޮތުން، ކުންފުނި އުވާލުމަށް ރެޖިސްޓްރާ ކަނޑައަޅައި، ކުންފުނީގެ ދަރަންޏާއި ދައުވާގެ ތަފްސީލު ހޯދުމަށް އިއުލާނު ކުރުމުން އެފަދަ ކަމެއް ހުށައެޅިއްޖެނަމަ އެ ކުންފުނިތައް އުވާލެވޭނީ ކޯޓަށް ހުށައަޅައިގެން ކަމަށް ބަޔާންކޮށްފައިވެއެވެ.