ސަޕޯޓަރަކާ މެދު ހަމަނުޖެހުން ހިންގި މައްސަލައިގައި ޓޮޓެންހަމް ހޮޓްސްޕާގެ މިޑްފީލްޑަރު އެރިކް ޑަޔާ ހަތަރު މެޗަށް ސަސްޕެންޑް ކުރަން އިނގިރޭސި އެފްއޭއިން ނިންމައިފިއެވެ.

އެރިކް ޑަޔާ އާއި ސަޕޯޓަރަކާ ދެމެދު ހަމަނުޖެހުން ހިނގީ މާޗު މަހުގެ ފަސްވަނަ ދުވަހު އިނގިރޭސި އެފްއޭ ކަޕްގެ ފަސްވަނަ ބުރުގައި ނޯވިޗް ސިޓީ އަތުން ޕެނަލްޓީ ޖަހައިގެން 3-2 އިން ޓޮޓެންހަމް ބަލިވި މެޗަށްފަހުއެވެ.

ރިޕޯޓުތައް ބުނާ ގޮތުން އަމިއްލަ ދަނޑުގައި ނޯވިޗް އަތުން ޓޮޓެންހަމް ބަލިވި މެޗަށް ފަހު ޑަޔާ އާއި ސަޕޯޓަރަކާ ދެމެދު ހަމަނުޖެހުން ހިނގީ، އެ ސަޕޯޓަރު ޑަޔާގެ އާއިލީ މެމްބަރުންތަކެއް ތިއްބާ އޭނާއަށް ފުރައްސާކުރުމާ ގުޅިގެންނެވެ.

އެ މައްސަލަ އެފްއޭ އިން ބެލުމަށްފަހު ނިންމާފައިވަނީ ޑަޔާގެ އަމަލަކީ ކުޅުންތެރިން އަމަލުކުރަން ކަނޑައަޅާފައިވާ މިންގަނޑާ ޚިލާފު އަމަލެއް ކަމުން އޭނާ ހަތަރު މެޗަށް ސަސްޕެންޑް ކުރުމަށެވެ. އޭގެ އިތުރަށް އެފްއޭއިން ވަނީ ޑަޔާ 40،000 ޕައުންޑުން ޖޫރިމަނާ ކޮށްފައެވެ.

ޑަޔާ ސަސްޕެންޑް ކުރަން އެފްއޭއިން ނިންމިއިރު، މީގެ ކުރިން ޓޮޓެންހަމްގެ ކޯޗު ހޯސޭ މޮރީނިއޯ ވަނީ ޑަޔާގެ އެ އަމަލަކީ ޕްރޮފެޝަނަލް ކުޅުންތެރިން ކަންތައް ކުރަން ޖެހޭނެ ގޮތެއް ނޫން ކަމަށާއި އެކަމަކު އެއީ ކޮންމެ މީހަކަށް ވެސް އެފަދަ ވަގުތެއްގައި އަމަލުކުރެވޭނެ ގޮތް ކަމަށް ބުނެފައެވެ.