ނޮޅިވަރަމުގައި ހޯމް ކަރަންޓީނުގައި ހުރި މީހަކު ކޮވިޑަށް ޕޮޒިޓިވްވެއްޖެ
9 ޖުލައި 2020 | ބުރާސްފަތި 09:50އެމީހަ ރަށަށް ދިޔައީ މިމަހުގެ 6 ވަނަ ދުވަހު
ހދ. ނޮޅިވަރަމް: އެމީހާ ރަށަށް ގޮސްފައިވަނީ މި މަހުގެ 6 ވަނަ ދުވަހު
ހދ. ނޮޅިވަރަމުގައި ހޯމް ކަރަންޓީނުގައި ހުރި މީހަކު ކޮވިޑް-19 އަށް ޕޮޒިޓިވްވެއްޖެއެވެ.
އެ ރަށު ކައުންސިލްގެ ރައީސް އިބްރާހީމް ރަޝީދު ރާއްޖެއެމްވީ އަށް މައުލޫމާތު ދެއްވަމުން ވިދާޅުވީ އެ މީހާ އެ ރަށަށް ގޮސްފައިވަނީ މި މަހުގެ 6 ވަނަ ދުވަހު ކަމަށެވެ. އަދި އެ ދުވަހުގެ ފަހުން އޭނާ ހުރީ ގޭގައި ކަރަންޓީނު ވެގެން ކަމަށެވެ.
އޭނާ ވިދާޅުވީ އެ މީހާ ޕޮޒިޓިވްވެފައިވަނީ މާލޭގައި ކުރެވޭ ރެންޑަމް ސާމްޕްލިންގެ ތެރެއިން ސާމްޕަލް ނަގާ ޓެސްޓުކުރުމުން ކަމަށެވެ. އަދި އެމީހާ އާއެކު އެ ގޭގައި އިތުރު ތިން މީހުން ކަރަންޓީނުވެގެން ތިބިކަން ފާހަގަކުރައްވާ އިބްރާހިމް ރަޝީދު ވިދާޅުވީ ބުރާސްފަތި ދުވަހު އެމީހުންގެ ސާމްޕަލް ނަގާފައިވާ ކަމަށެވެ.
ނޮޅިވަރަމުން މީހަކު ކޮވިޑަށް ޕޮޒިޓިވްވެފައިވާއިރު މިދިޔަ މަހުގެ 18 ވަނަ ދުވަހު ގއ. މާމެންދޫގައި ހޯމް ކަރަންޓީނުގައި ހުރި މީހަކު ވެސް ވަނީ ކޮވިޑަށް ޕޮޒިޓިވްވެފައެވެ.
