އެފްއޭއެމްގެ މުވައްޒަފަކު ޕޮޒިޓިވްވެ، މުވައްޒަފުންނާއި ނޫސްވެރިން ކަރަންޓީނަށް

ފުޓްބޯލް އެސޯސިއޭޝަން މޯލްޑިވްސް (އެފްއޭއެމް) ގެ މުވައްޒަފަކު ކޮރޯނާވައިރަސް (ކޮވިޑް-19) ށް ޕޮޒިޓިވް ވުމާއި ގުޅިގެން، އެފްއޭމްގެ މުވައްޒަފުންނާއި ނޫސްވެރިން ގޭގައި ކަރަންޓީންވުމަށް އަންގައިފިއެވެ.

މިދިޔަ ހަފުތާގެ ބުރާސްފަތި ދުވަހު އެފްއޭއެމުން ވަނީ އެ އިދާރާގެ ކޮންގްރެސް ބާއްވާފައެވެ. މައުލޫމާތު ލިބޭ ގޮތުގައި ކޮވިޑް-19ށް ޕޮޒިޓިވްވީ އެ އިދާރާގެ ޤާނޫނީ ވަކީލެވެ. އޭނާ ވަނީ ކޮންގްރެސްގެ އިތުރުން އެ ދުވަހު އެފްއޭއެމުން ބޭއްވި ނޫސްވެރިންގެ ބައްދަލުވުމުގައިވެސް ބައިވެރިވެފައެވެ.

އެހެންކަމުން 14 ދުވަހަށް ގޭގައި ކަރަންޓީންވުމަށް އަންގަފައިވަނީ އެފްއޭއެމްގެ ކޮންގްރެސްގައި ބައިވެރިވި ބައެއް މީހުންނާއި، ކޮންގްރެސް އޮތް ދުވަހު ބޭއްވި ނޫސްވެރިންގެ ބައްދަލުވުމުގައި ބައިވެރިވި ނޫސްވެރިންނެވެ.

އެފްއޭއެމްގެ ޤާނޫނީ ވަކީލު ކޮވިޑް-19ށް ޕޮޒިޓިވްވިއިރު، އޭނާ މިހާރު ހުރީ ކަރަންޓީން ފެސިލިޓީއެއްގައެވެ. ބުދަ ދުވަހު ރައްޔިތުންގެ މަޖިލީހުގެ އިޖުތިމާޢީ ކޮމިޓީއަށް އެފްއޭއެމް ހާޒިރުކުރިއިރު، މި ބައްދަލުވުމުގައި ޤާނޫނީ ވަކީލު ބައިވެރިވީ އޮންލައިން ކޮށެވެ. އެކަމަކު މި ބައްދަލުވުމުގައި އެފްއޭއެމްގެ ރައީސް ބައްސާމް އަދީލް ޖަލީލް ވަނީ ބައިވެރިވެވަޑައިގެންފައެވެ.

މިދިޔަ ހަފުތާގެ ބުރާސްފަތި ދުވަހު އެފްއޭއެމް ހައުސްގައި އެ އިދާރާގެ ކޮންގްރެސް ބޭއްވިއިރު، މި ކޮންގްރެސްގައި އެ އިދާރާގެ އިންތިޚާބުވެސް ވަނީ ބާއްވާފައެވެ. މި އިންތިޚާބުގައި އެފްއޭއެމްގެ ރައީސްގެ މަޤާމަށް ދެވަނަ ދައުރަކަށް ބައްސާމް ވަނީ އިންތިޚާބު ކޮށްފައެވެ.