ނޫސްވެރިން ހޮވި ސީޒަނުގެ މޮޅު ކުޅުންތެރިޔަކަށް ވެސް ސަލާހު

އިނގިރޭސިވިލާތުގެ ކުޅިވަރު ނޫސްވެރިން ހޮވި މި ސީޒަނުގެ އެންމެ މޮޅު ކުޅުންތެރިޔަކަށް ލިވަޕޫލްއަށް ކުޅެމުން އަންނަ މިސްރުގެ ފޯވާޑް މުހައްމަދު ސަލާހު ހޮވިއްޖެއެވެ.

މި އެވޯޑަކީ އިނގިރޭސިވިލާތުގެ ކުޅިވަރު ނޫސްވެރިންގެ ވޯޓާއެކު ދެވޭ އެވޯޑަކަށްވާއިރު މިއަހަރުގެ އެވޯޑަށް 400 ނޫސްވެރިން ވޯޓު ދީފައިވެއެވެ. މި އެވޯޑަށް ސަލާހުއާ އެންމެ ބޮޑަށް ވާދަކޮށްފައިވަނީ މެންޗެސްޓާ ސިޓީއަށް ކުޅެމުން އަންނަ ބެލްޖިއަމްގެ މިޑްފީލްޑަރު ކެވިން ޑެބްރައިންއެވެ. ޖުމްލަ ވޯޓުގެ 90 އިންސައްތަ މި ދެ ކުޅުންތެރިން ހޯދިއިރު ސަލާހުއަށް އެވޯޑު ލިބުނީ ޑެބްރައިންއަށްވުރެ 20 ވޯޓު އިތުރަށް ހޯދައިގެންނެވެ. މިއަހަރުގެ އެވޯޑުގައި ތިންވަނައަށް އެންމެ ގިނައިން ވޯޓު ލިބުނީ ޓޮޓެންހަމްގެ ފޯވާޑް ހެރީ ކޭންއަށެވެ.

މި އެވޯޑު ދޭ ފުޓްބޯލް ރައިޓަރސް އެސޯސިއޭޝަން (އެފްޑަބްލިއުއޭ) ގެ ޗެއާމަން ޕެޓްރިކް ބާކްލޭ ބުނެފައިވަނީ މިއީ 1969 ވަނަ އަހަރުގެ ފަހުން ނެގުނު އެންމެ ވާދަވެރި ވޯޓު ކަމަށެވެ. އޭނާ ބުނީ ސަލާހުއަށް މި އެވޯޑު ލިބުމުގައި އެންމެ ބޮޑު ސަބަބަކަށް ވެގެންދިޔައީ ޗެމްޕިއަންސް ލީގުގެ ސެމީ ފައިނަލުގައި އޭނާ ދެއްކި މޮޅު ކުޅުން ކަމަށާއި މި ދެ ކުޅުންތެރިންނަކީ ވެސް ކުޑަ ވަގުތުކޮޅެއްގެ ތެރޭގައި ދުނިޔޭގެ ސަމާލުކަން ދަމައިގެންފައިވާ ކުޅުންތެރިން ކަމަށެވެ. އެހެން ނަމަވެސް މި އެވޯޑު އެންމެ ބޮޑަށް ހައްގުވަނީ ސަލާހުއަށް ކަމަށާއި އެކަމަށް އޭނާއަށް މަރުހަބާ ކިޔާ ކަމަށް ޕެޓްރިކް ބުނެފައިވެއެވެ.

ސަލާހު ވެގެންގޮސްފައިވަނީ މި އެވޯޑު ހޯދި އެފްރިކާއަށް ނިސްބަތްވާ ފުރަތަމަ ކުޅުންތެރިޔާއަށެވެ. ހަމައެހެންމެ އޭނާ ވެގެންގޮސްފައިވަނީ 2014 ވަނަ އަހަރު ލުއިސް ސުއަރޭޒް މި އެވޯޑު ހޯދި ފަހުން ޔޫރަޕަށް ނިސްބަތްނުވާ ކުޅުންތެރިޔަކު މި އެވޯޑު ހޯދި ފުރަތަމަ ކުޅުންތެރިޔާއަށެވެ. ސަލާހު ވަނީ މި ސީޒަނުގައި ހޮވި ޕްރޮފެޝަނަލް ފުޓްބޯލާސް އެސޯސިއޭޝަން (ޕީއެފްއޭ) ގެ އެންމެ މޮޅު ކުޅުންތެރިޔާގެ މަގާމު ވެސް ހޯދާފައެވެ.

ލިވަޕޫލްގެ ފޯވާޑް ލައިންގެ އެންމެ މުހިންމު ރޯލު އަދާކުރަމުން އަންނަ ސަލާހު ވަނީ އެ ޓީމަށް ޕްރިމިއާ ލީގުގައި ކުޅުނު 34 މެޗުގައި 31 ލަނޑު ޖަހާފައެވެ. އޭނާ ވަނީ މި ސީޒަނުގެ މިހާތަނަށް ލިވަޕޫލްއަށް އޭނާގެ ލަނޑުތަކުން 15 ޕޮއިންޓް ހޯދައިދީފައެވެ. ހަމައެހެންމެ ޕްރިމިއާ ލީގުގައި ލިވަޕޫލްއިން ޖެހި 76 ލަނޑުގައި އޭނާގެ 51 އިންސައްތަ ހިއްސާއެއް އެބައޮތެވެ. އޭނާ އެ ޓީމާއި ގުޅުނީ އިޓަލީގެ ރޯމާ ދޫކޮށް 34 މިލިއަން ޕައުންޑްގެ ފީއަކަށެވެ.

މި އެވޯޑަށް ސަލާހުއާ އެންމެ ވާދަކުރި ކުޅުންތެރިޔަކީ މެންޗެސްޓާ ސިޓީގެ މިޑްފީލްޑަރު ކެވިން ޑެބްރައިންއެވެ. މެންޗެސްޓާ ސިޓީއިން ޕްރިމިއާ ލީގުގެ ތަށި ޔަގީންކޮށްފައިވާއިރު އެ ޓީމުގައި އޭނާ އަންނަނީ މޮޅު ކުޅުމެއް ދައްކަމުންނެވެ. އޭނާ ވަނީ މިހާތަނަށް މި ސީޒަނުގައި 12 ލަނޑު ޖަހައި 15 ލަނޑު ޖެހުމަށް އެހީތެރިވެދީފައެވެ. ހަމައެހެންމެ އޭނާވަނީ ހަމަލާ އުފެއްދުމަށް ސިޓީގެ ފޯވާޑުންނަށް 102 ފުރުސަތު ތަނަވަސްކޮށްދީފައެވެ.

މިދިޔަ އަހަރު މި އެވޯޑު ހޯދީ މިދިޔަ ސީޒަނުގައި ޗެލްސީއަށް ޕްރިމިއާ ލީގު ހޯދައިދިނުމުގައި މުހިންމު ރޯލެއް އަދާކުރި ފްރާންސްގެ މިޑްފީލްޑަރު އެންގޯލޯ ކަންޓޭއެވެ.