ޖިންސީ ގޯނާގެ މައްސަލަތަކަކީ އެއްވެސް ގޮތަކަށް ތަހައްމަލު ކުރެވިގެންވާނެ ކަމެއް ނޫން: ރައީސް މައުމޫން
8 ޖުލައި 2020 | ބުދަ 19:13މިކަހަލަ މައްސަލަތަކުގައި އަވަސް އިސްލާހީ ފިޔަވަޅު އެޅުން ވަރަށް މުހިންމު
ކުރީގެ ރައީސް މައުމޫނު ރައީސް ސޯލިހުއާ ބައްދަލުކުރައްވަނީ
މިނިސްޓަރ އަލީ ވަހީދާއި ގުޅޭގޮތުން ކުރެވުނު ތުހުމަތުތަކާއި ގުޅިގެން މަގާމުން އިސްތިއުފާ ދެއްވުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު އެންގެވުމާއި ގުޅިގެން ރައީސްގެ އެ ނިންމެވުމަށް ކުރީގެ ރައީސް މައުމޫން ތައުރީފު ކުރައްވައިފިއެވެ.
ރައީސްގެ ނިންމެވުމަށް ތައުރީފު ކުރައްވާ މައުމޫން ބުދަ ދުވަހުގެ ރޭ ކުރެއްވި ޓުވީޓުގައި ވިދާޅުވީ މިކަހަލަ މައްސަލަތަކުގައި އަވަސް އިސްލާހީ ފިޔަވަޅު އެޅުން ވަރަށް މުހިންމު ކަމަށާއި އަންހެނުންނަށް ކުރާ ޖިންސީ ގޯނާގެ މައްސަލަތަކަކީ އެއްވެސް ގޮތަކަށް ތަހައްމަލު ކުރެވިގެންވާނެ ކަމެއް ނޫން ކަމަށެވެ. އެއީ މުޖުތަމައު ތެރޭގައި ވިޔަސް އަދި ހާއްސަކޮށް ސަރުކާރުގެ އޮފީސްތަކުގައި ކަމުގައި ވިޔަސް އެކަން ބަލައިނުގަނެވޭނެ ކަމަށެވެ.
ރައީސް އޮފީހުގެ ތަރުޖަމާނު އިބްރާހިމް ހޫދު ބުދަ ދުވަހުގެ ރޭ ކުރެއްވި ޓްވީޓުގައި ވިދާޅުވީ މަސައްކަތުގެ މާހައުލުގައި ހިނގައިގެން ނުވާނެ ފަދަ އަހުލާގީ މައްސަލަތަކެއް ޓުއަރިޒަމް މިނިސްޓްރީގައި ހިނގާފައިވާކަމުގެ ޝަކުވާ އެ މިނިސްޓްރީގެ މުވައްޒަފުންތަކެއް ރައީސުލްޖުމްހޫރިއްޔާއަށާއި ޖެންޑަރ މިނިސްޓްރީ އަށް ހުށައަޅާފައިވާ ކަމަށެވެ.
މިނިސްޓަރު އަލީ ވަހީދު މަގާމުން އިސްތިއުފާ ދެއްވުމަށް ރައީސް އެންގެވިއިރު، މިއީ މި ކެބިނެޓްގެ ވަޒީރަކު އިސްތިއުފާ ދެއްވުމަށް ރައީސަކު މިހާ ހާމަކަން ބޮޑު ގޮތެއްގައި އެންގެވި ފުރަތަމަ ފަހަރެވެ.
