ޤާނޫނުން ކަނޑައެޅިގެން ކުރަން ލާޒިމުކުރާ ކަންކަން ނުކުރާ ކަމަށް ވަނީނަމަ އެ ވާހަކަ މަޖިލީހުގައި ދައްކާނެ ކަމަށާއި، އެ ވަޒީރަކާ މެދު ފިޔަވަޅުއަޅައި ވަކި ކުރަން ޖެހޭ ހިސާބުން ވަކި ކުރާނެ ކަމާ މެދު އެމްޑީޕީގެ ޕާލިމެންޓްރީ ގްރޫޕާ މެދު ކުޑަވެސް ޝައްކެއް ނެތް ކަމަށް މެދު ހެންވޭރު ދާއިރާގެ މެންބަރު އަދި އެމްޑީޕީގެ ޕާލިމެންޓްރީ ގްރޫޕުގެ ލީޑަރު އަލީ އާޒިމް ވިދާޅުވެއްޖެއެވެ.
ރާއްޖެޓީވީގެ ކުޅިވަރު ފައިލް ޕްރޮގްރާމުގައި ވާހަކަ ދައްކަމުން އާޒިމް ވިދާޅުވީ ޤާނޫނާއި ގަވާއިދުތަކާއި އެއްގޮތަށް އަދި އިތުރަށް ރައްޔިތުން ބޭނުންވާ ކަންކަން ނުކުރާނަމަ، ވަޒީރަކު ވަކިކޮށް އައު ވަޒީރަކު ލުމަކީ އެމްޑީޕީގެ ޕާލިމެންޓްރީ ގްރޫޕުން ކަންބޮޑުވާ ކަމެއް ނޫން ކަމަށެވެ.
ކުޅިވަރާ ބެހޭ ވުޒާރާއިން ދިވެހިރާއްޖޭގެ ކުޅިވަރުގެ ޤާނޫނާއި އެއްގޮތަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އާ ދޭތެރޭގައި ފިޔަވަޅު އަޅާފައި ނުވާތީ، އެފްއޭއެމްއާ ދޭތެރޭގައި ޤާނޫނުގައިވާ ގޮތަށް ފިޔަވަޅު އަޅައިދިނުމަށް އެދި ރައްޔިތުންގެ މަޖިލީހަށް ކުއްލި މައްސަލައެއް ހުށަހަޅާ އެމައްސަލައަށް ބަހުސްކޮށް މައްސަލަ މިހާރު އިޖުތިމާޢީ ކޮމިޓީން ބަލަމުންދާއިރު، އާޒިމް ވިދާޅުވީ މައްސަލައިގައި އެފްއޭއެމްގެ ވާހަކަ އެކަނި އޮތުމުން މުޅިން ފުރިހަމަނުވާ ކަމަށާއި ހުރިހާ ކުޅިވަރު އެސޯސިއޭޝަނެއްގެ ވާހަކަވެސް މި މައްސަލައިގައި އަންނަން ޖެހޭ ކަމަށެވެ.
2015 ވަނަ އަހަރު ރައީސް އަބްދުﷲ ޔާމީނުގެ ދައުރުގައި ކުޅިވަރުގެ ޤާނޫނެއް ވުޖޫދަށް އައިރު، އެ ޤާނޫނުގައި ވަރަށް ސާފުކޮށް ކްލަބުތަކާއި، ޖަމިއްޔާތައް އަދި އެސޯސިއޭޝަންތައް ދިވެހިރާއްޖޭގައި ހިންގަންވީގޮތުގެ ވާހަކަ ލިޔެފައިވަނިކޮށް، އެއްވެސް ބަޔަކަށް އޭގެ ބޭރުން ނޫޅެވޭނެ ކަމަށް އާޒިމް ވިދާޅުވިއެވެ.
ޤާނޫނޫން ވަރަށް ސާފުކޮށް ބަޔާންކޮށްފައި ވަނިކޮށް އޭގެ ބޭރުން އިންތިޚާބެއް ބާއްވަފައި، ވަރަށް ފޮނިވެފައި އެވާހަކަ ބުނުމަކީ ހަގީގަތުގައި ދިވެހި ސަރުކާރަށް ގޮންޖެހުން. އެއީ ވަރަށް ކަންބޮޑުވާންޖެހޭ ކަމެއް. އެހެންކަމުން ކުޅިވަރާ ބެހޭ ވަޒީރުވެސް ރައްޔިތުންގެ މަޖިލީހުންވެސް ސަރުކާރު ހިންގާ ހުރިހާ ފަރާތްތަކެއް އޭގެ ތެރޭގައި ފުލުސް އޮފީސް، ހޯމް މިނިސްޓްރީ އަދި ހުރިހާ ވުޒާރާތަކެއް ކަންބޮޑުވާންޖެހޭ ކަމެއް އެއީ. ސަރުކާރަށް ގޮންޖާ ވަކި ބައެއްގެ ގޮތުގައި ސަރުކާރާއި ނުބެހޭ ބައެއްގެ ގޮތުގައި ކަންކަން ކުރަން ފުރުސަތު ދެވިގެން ނުވާނެ.މެދު ހެންވޭރު ދާއިރާގެ މެންބަރު އަލީ އާޒިމް
2016 ވަނަ އަހަރު އެފްއޭއެމްގެ ރައީސްގެ މަގާމަށް ބައްސާމް އަދީލް ޖަލީލް އައްޔަންކުރި ދުވަހުން ފެށިގެން މިއަދާ ހަމައަޔަށް ކޮންމެ އަހަރަކުވެސް އެ އެސޯސިއޭޝަން ހިންގަމުން ދަނީ ޤާނޫނާއި އެ އެސޯސިއޭޝަނުގެ އަސާސީ ގަވާއިދާ ޚިލާފަށް ކަމަށާއި، އެހެން ނަމަވެސް އެކަންކަން ބަލަން ހަވާލުވެފައިވާ ފަރާތް ކަމަށްވާ ކުޅިވަރާ ބެހޭ ވުޒާރާއިން އެކަންކަން ބަލާފައިނުވާ ކަމަށް އާޒިމް ވިދާޅުވިއެވެ.
ކުޅިވަރާ ބެހޭ ވުޒާރާ އާއި ސްޕޯޓްސް ކޮމިޝަނަށް އެކަން ނުކުރެވެނީ ކީއްވެތޯ ސުވާލު ކުރަންޖެހޭ ކަމަށާއި، އެކަން ނުވަނީ ކެޕޭސިޓީ ނެތިގެންތޯ ނޫނީ ކައިރީގައިތިބި މީހުންގެ ގާބިލުކަން ނެތިގެންތޯ ނޫނީ ވަޒީރެއްގެ ހައިސިއްޔަތުން އެކަންކުރަން ނޭނގިގެންތޯ އަމިއްލައަށް ވަޒީރު ސުވާލުކޮށްލަން ޖެހޭ ކަމަށް އާޒިމް ވިދާޅުވިއެވެ.
އެފްއޭއެމްގެ ރައީސްކަން ކުރި ނަމަވެސް އެ އިދާރާއިން ނިކުތް ހިސާބުން ފެށިގެން އެފްއޭއެމަށް ދިޔުމުގެ ވިސްނުން އެއްވެސް އިރަކު ނުގެންގުޅޭ ކަމަށާއި، މިއަދު މި ވާހަކަ ދައްކަނީ އެއްވެސް އަމިއްލަ އެދުމެއް އޮވެގެން ނޫންކަން ފާހަގަ ކުރައްވަމުން އާޒިމް ވިދާޅުވީ އެ ވާހަކަ ދައްކަނީ ޤާނޫނާއި ޚިލާފަށް ކަންކަން ކުރަމުންދާތީ ކަމަށެވެ.
މި މައްސަލަ ހުށަހެޅުމުގެ ކުރިން ކުޅިވަރާ ބެހޭ ވަޒީރާއި މަޝްވަރާކޮށް ސިޓީވެސް ފޮނުވި ކަމަށާއި، އެހެން ނަމަވެސް އެ ބައްދަލުވުން ވެސް ދިޔައީ އެތައް ބަޔަކަށް އިނގޭ ކަމެއްގެ ގޮތުގައި ކަމަށް އާޒިމް ވިދާޅުވިއެވެ.
މައްސަލަ ލުމުގެ ކުރިން މަޝްވަރާ ކުރިން. މައްސަލަ ހުށަހެޅީ ކުރެވުނު މަސައްކަތްތަކުން އަމަލީ ސިފައެއް ނުނިކުތުމުން. ވަޒީރާއި ބައްދަލުކުރަން ދިޔައިރު އެފްއޭއެމަށް އިނގޭ ސިޓީއެއް ލައިގެން އުޅޭކަން، ވަޒީރާއި ބައްދަލުކުރަން ވަދެއްޖެކަން އަދި ނިކުމެއްޖެކަން. މިއީ ކަންބޮޑުވާން ޖެހޭ ކަމެއް.މެދު ހެންވޭރު ދާއިރާގެ މެންބަރު އަލީ އާޒިމް
ދައުލަތުން ކުޅިވަރަށް ބޮޑު ހޭދައެއް ކުރަމުންދާއިރު، ސަރުކާރަށް ބަސް ބުނުމުގެ ފުރުސަތު އޮންނަންވާނެ ކަމަށާއި ކުޅިވަރަށް ސިޔާސީ ނުފޫޒު ފޯރުވުން މިއަދުވެސް ޤަބޫލުނުކުރާއިރު، މަޖިލީހަށް މައްސަލައެއް ހުށަހަޅަން ޖެހުނީ ޤާނޫނު ތަންފީޒު ކުރަން ތިބި ފަރާތްތަކުން އެކަންނުކޮށް ޤާނޫނީ ބާރު ނެތިގެންދާތަން ބަލަން ނުހުރެވިގެން ކަމަށް އާޒިމް ވިދާޅުވިއެވެ.
މިއަދުގެ މަޖިލީހުގައި ކުޅިވަރުގެ ތެރޭގައި އަމަލީ ގޮތުން މަސައްކަތްކޮށްފައިވާ ގިނަ މެންބަރުން ތިބިއިރު، ކުޅީވަރާ ބެހޭ ވަޒީރާއި ސްޕޯޓްސް ކޮމިޝަނަރަށް ޤާނޫން ކުރަން ލާޒިމުކުރާ އެތައް ކަމެއް ނުކޮށް ހުރިއިރު، އެތަން ބަލަން ތިބެއްޖެނަމަ، ދިވެހި ކުޅިވަރު އެކީއެކަށް ހަލާކުވެގެންދާނެ ކަމަށާއި، މި ވާހަކަ މިއަދު ދައްކަމުން ދަނީ ކުޅިވަރު ހަލާކުވެގެންދާތަން ދެކެން ބޭނުނުން ނުވާތީ ކަމަށް އާޒިމް ވިދާޅުވިއެވެ.
