ގުޅުމެއް ނެތް ކޭސްތައް އެބަ ފެނޭ، ސަމާލުވޭ: ޑރ. މުއާޒް
6 ޖުލައި 2020 | ހޯމަ 18:11ޖޫން މަހުގެ ފަހު ކޮޅުން ފެށިގެން ގުޅުމެއް ނެތް ކޭސްތައް ގިނަވޭ
ރެންޑަމް ސާމްޕަލް ނެގުމުގެ ތެރެއިން
ޕޮޒިޓިވްވާ މީހުންގެ އަދަދު އިތުރުވެގެން ނުދިޔަ ނަމަވެސް ގުޅުމެއް ނެތް ކޭސްތައް ފެންނަމުންދާތީ އިތުރަށް ސަމާލުވުމަށް އައިޖީއެމްއެޗްގެ އިންޓަރނަލް މެޑިސިން ޑޮކްޓަރު މުއާޒު މޫސާ ވިދާޅުވެއްޖެއެވެ.
ހޯމަ ދުވަހުގެ ރޭ ހެލްތް އެމެޖަންސީ އޮޕަރޭޝަން ސެންޓަރު (އެޗްއީއޯސީ) އިން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޑރ. މުއާޒް ވިދާޅުވީ ޖޫން މަހުގެ ފަހު ކޮޅުން ފެށިގެން ގުޅުމެއް ނެތް ކޭސްތައް ގިނަވާކަން ފާހަގަކުރެވިފައިވާ ކަމަށެވެ. އަދި ދުވާލެއްްގެ މައްޗަށް ޕޮޒިޓިވްވާ މީހުންގެ އަދަދު އިތުރުވެގެން ނުދިޔަ ނަމަވެސް ގުޅުމެއް ނެތް ކޭސްތައް ފެންނާތީ އެކަމުން ދޭހަވެގެންދަނީ ކޮމިއުނިޓީ ސްޕްރެޑް އޮތް މިންވަރު ކަމަށް ޑރ. މުއާޒް ވިދާޅުވިއެވެ.
ފިޔަވަޅު ނާޅައިފިނަމަ ކޭސްތައް އިތުރުވެގެން ހިނގައިދާނެކަން ފާހަގަކުރައްވާ ޑރ. މުއާޒް ވިދާޅުވީ މިހާރު އެންމެ އިސްކަންދޭން ޖެހޭނީ ގައިދުރުކަން ބެހެއްޓުމާއި، އަތް ދޮވެ ސާފުކުރުމަށް ކަަމަށެވެ. އަދި ކޮވިޑް-19 ގެ އަލާމާތެއް ފެނިއްޖެނަމަ އެމީހަކު އާންމުންގެ ތެރެއަށް ނުނިކުމެ، ފްލޫ ކްލިނަކަކަށް ދެއްކުން ވަރަށް މުހިންމު ކަމަށް ވެސް ޑރ. މުއާޒް ވިދާޅުވިއެވެ.
ތިމާ އާއި އަދި އެހެން މީހުންގެ ރައްކާތެރިކަމަށްޓަކައި ވެސް ބޭރަށް ދާއިރު މާސްކް އެޅުން މުހިންމު ކަމަށާއި ބައްދަލުކުރާ މީހުންގެ އަދަދު މަދުކުރުން މުހިންމު ކަމަށް ވެސް ޑރ. މުއާޒް ވަނީ ނޫސްވެރިންގެ ބައްދަލުވުމުގައި ފާހަގަކުރައްވާފައެވެ.
ރާއްޖެއިން މިހާތަނަށް ޖުމްލަ 2,491 ކޮވިޑަށް ޕޮޒިޓިވްވެފައިވާއިރު ހޯމަ ދުވަހު ވައިރަސްއަށް 23 މީހުން ވަނީ ޕޮޒިޓިވްވެފައެވެ.
