ޖިންސީ ގޯނާ ކުރުމުގެ މައްސަލަތަކަށް އިތުރު ސަމާލުކަމެއް ދިނުމަށް ރައީސް އެދިވަޑައިގެންފި
އަދުލު އިންސާފު ގާއިމު ކުރުމަށް ފުލުހުންގެ ދައުރު ވަރަށް ބޮޑު
އާދިއްތަ ދުވަހު އިސްކަންދަރުކޮށީގައި ބޭއްވި ރަސްމިއްޔާތުގެ ތެރެއިން، ރައީސް ސޯލިހު ވާހަކަފުޅު ދައްކަވަނީ
އަދުލު އިންސާފު ގާއިމްކުރުމަށް ފުލުހުންގެ ދައުރު ވަރަށް ބޮޑު ކަމަށާއި، ޚާއްސަކޮށް ޖިންސީ ގޯނާ ކުރުމުގެ މައްސަލަތަކަށް އިތުރު ސަމާލުކަމެއް ދިނުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު އެދިވަޑައިގެންފިއެވެ.
އާދިއްތަ ދުވަހު އިސްކަންދަރުކޮށީގައި ބޭއްވި ރަސްމިއްޔާތުގައި ފުލުހުންނާއި ބައްދަލުކުރައްވާ ވާހަކަ ދައްކަވަމުން ރައީސް ސޯލިހު ވިދާޅުވީ ކޮވިޑް-19ގެ އަޑިގުޑަންތަކުން އަރައިގަތުމަށް މި ކުރާ މަސައްކަތުގައި އަދި ވެސް ވަރަށް ދަތި އުނދަގޫ މަރުހަލާތަކެއް ކަނޑައްތު ކުރަން ޖެހޭ ކަމަށާއި، ރާއްޖޭގެ އިގްތިސާދަށް މިއައި ހީނަރުކަމާއެކު އާންމު ރައްޔިތުންގެ އަތްމަތި ދަތިވެ ދިރިއުޅުމަށް ވަރަށް ބޮޑެތި ދަތިތަކާ ކުރިމަތިވެފައިވާ ކަމަށެވެ.
ހަމައެއާއެކު އިޖުތިމާއި ގިނަ މައްސަލަތަކެއް ފެންމަތިވަމުންދާކަން ފާހަގަކުރައްވާ ރައީސް ސޯލިހު ވިދާޅުވީ އޭގެ ތެރެއިން ގިނަ މައްސަލަތަކަކީ ކޮވިޑް-19އާ ސީދާ ގުޅިގެން އަލަށް ކުރިމަތިވާން ފެށި މައްސަލަތައް ނޫން ކަމަށެވެ. އެފަދަ ގިނަ މައްސަލަތަކަކީ އެތައް ޒަމާނެއް ވަންދެން އެކަންކަމެދު މީގެ ކުރިން މާބޮޑު ސަމާލުކަމެއް ނުދީ އަޅަން ޖެހޭ ފިޔަވަޅުތައް އެޅުމުގައި ފަސްޖެހުމުގެ ސަބަބުން ތިލަވަމުން އަންނަ މައްސަލަތަކެއް ކަމަށް އެމަނިކުފާނު ވިދާޅުވިއެވެ.
ރައީސް ސޯލިހު ވިދާޅުވީ މިކަން ކާމިޔާބު ކުރުމަށްޓަކައި ގާނޫނުތަކަށް ބަދަލުތަކެއް ގެންނަން ޖެހޭ ކަމަށާއި، ފުލުހުންނަށާއި، ތަންފީޒީ އިދާރާތަކަށް ބޭނުންވާ ވަސީލަތްތަކާއި ތައުލީމާ ތަމްރީން ވެސް އިތުރަށް ހޯދާ ދޭން އެބަޖެހޭ ކަމަށެވެ. އަދި ފުލުހުންގެ ވެލްފެއަރގެ ކަންކަން ހަރުދަނާ ކުރުމަށް ވެސް ސަރުކާރުން ޚާއްސަ ސަމާލުކަމެއް ދޭން ޖެހޭ ކަމަށެވެ.
ރައީސް ސޯލިހު ވިދާޅުވީ ތަރައްގީވަމުން އަންނަ މިޒަމާނުގައި މަސައްކަތް ކުރަމުންދަނީ ފުލުހުންގެ ތެރޭގައި ތިބި ފަންނުގެ އިލްމީ ތަޖުރިބާގެ ބޭފުޅުންގެ ލަފަޔާ މަޝްވަރާގެ މަތިން ކަމަށެވެ. ސަރުކާރުގެ ފަރާތުން ރައްޔިތުން އެންމެ ބޮޑަށް ބޭނުންވަނީ އަދުލު އިންސާފު ގާއިމު ކުރަން ކަމަށާއި، އެކަމުގެ ފެށުން ވެސް ގުޅިފައިވަނީ ފުލުހުންގެ ޚިދުމަތާއި ކަމަށް އެމަނިކުފާނު ވިދާޅުވިއެވެ. އަދި ވިދާޅުވީ ފުލުހުންނަށް ހުށަހެޅޭ މައްސަލަތައް ބަލާ ތަހުގީގު ފުރިހަމަކޮށް އަވަސް ކުރުމަކީ އޭގެ ތެރެއިން ވެސް އެންމެ މުހިންމު މަސައްކަތް ކަމަށެވެ.
ރައީސް ސޯލިހު ވިދާޅުވީ ޚާއްސަކޮށް އަންހެނުންނާއި ކުޑަ ކުދިންނަށް ޖިންސީ ގޯނާ ކުރުމުގެ މައްސަލަތަކަށް އިތުރު ސަމާލުކަމެއް ދޭން ޖެހޭ ކަމަށެވެ. އަދި ތަހުގީގު އަވަސްކޮށް ޝަރީއަތްތައް ހަލުވިކޮށް އަވަހަށް އިންސާފު ގާއިމު ކުރެވެން ޖެހޭ ކަމަށް އެމަނިކުފާނު ވިދާޅުވިއެވެ.
