ޖަރުމަން ކަޕްގެ ތަށި ބަޔާނުން ދިފާއުކޮށްފި

ބަޔާ ލެވަކޫސެން ބަލިކޮށް ޖަރުމަން ކަޕްގެ ތަށި ބަޔާން މިއުނިކުން ދިފާއުކޮށްފިއެވެ.

ބާލިންގެ އޮލިމްޕިއަސްޓޭޑިއަންގައި ހޮނިހިރު ދުވަހުގެރޭ ކުޅުނު ފައިނަލް މެޗުގައި ލެވަކޫސެންގެ މައްޗަށް ބަޔާން ކުރިހޯދީ 4-2 ގެ ނަތީޖާއަކުންނެވެ.

މި މެޗުގެ ފުރަތަމަ ހާފުގައި ބަޔާނުން ވަނީ ދެ ލަނޑުގެ ލީޑެއް ނަގާފައެވެ. މެޗުގެ 16 ވަނަ މިނެޓުގައި ޑިފެންޑަރު ޑޭވިޑް އަލްބާ ބަޔާނަށް ލީޑު ނަގައިދިންއިރު، މެޗުގެ 24 ވަނަ މިނެޓުގައި ސާޖް ގްނަބްރީ ވަނީ ބަޔާނަށް ލީޑު ފުޅާކޮށްދީފައެވެ.

ދެވަނަ ހާފުގައިވެސް ބަޔާނުން ރަނގަޅު ކުޅުމެއް ދެއްކިއިރު، މެޗުގެ 59 ވަނަ މިނެޓުގައި ރޮބަޓް ލެވަންޑޯސްކީ ވަނީ ބަޔާންގެ ތިންވަނަ ލަނޑު ކާމިޔާބުކޮށްފައެވެ.

މެޗުގެ 64 ވަނަ މިނެޓުގައި ސްވެން ބެންޑާގެ ލަނޑުން ލެވަކޫސެންއިން ފަރަގު ކުޑަކުރި ނަމަވެސް، ލެވަންޑޯސްކީ ވަނީ 89 ވަނަ މިނެޓުގައި ބަޔާނަށް އިތުރު ލަނޑެއް ކާމިޔާބުކޮށްދީފައެވެ. މިއީ މި ސީޒަނުގައި ލެވަންޑޯސްކީ ކާމިޔާބުކުރި 51 ވަނަ ލަނޑެވެ.

މި މެޗުގައި ލެވަކޫސެންއިން ކާމިޔާބުކުރި ފަހު ލަނޑު އިތުރު ވަގުތުގައި ލިބު ޕެނަލްޓީއަކުން ކާމިޔާބުކޮށްދިނީ ކައި ހަވާޓްޒްއެވެ.

ލެވަކޫސެން ބަލިކޮށް ބަޔާނުން ޖަރުމަން ކަޕްގެ ތަށި ދިފާއުކުރިއިރު، މިއީ އެ ޓީމުން މިހާތަނަށް ޖަރުމަން ކަޕްގެ ތަށި އުފުލާލި 20 ވަނަ ފަހަރެވެ. ޖަރުމަން ކަޕްގެ އިތުރުން ބަޔާނުން ވަނީ މި ސީޒަނުގެ ޖަރުމަން ލީގުވެސް ކާމިޔާބުކޮށްފައެވެ.