ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ މަސްއޫލިއްޔަތަކަށް ވާނީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ ވައުދުފުޅުތައް ފުއްދުން ކަމަށް އެ އިދާރާގެ ރައީސްގެ މަގާމަށް ދެވަނަ ދައުރަކަށް އިންތިޚާބުވި ބައްސާމް އަދީލް ޖަލީލް ވިދާޅުވެއްޖެއެވެ.

ރައީސް ޞާލިޙުގެ ރިޔާސީ ވައުދުފުޅުތަކުގެ ތެރޭގައި ފުޓްބޯޅައިގެ ގިނަ ކަންތައްތަކެއް ހިމެނެއެވެ. އެގޮތުން ރާއްޖޭގައި ބައިނަލްއަގުވާމީ މުބާރާތައް ބޭއްވުމާއި، ކުޅިވަރު ދަނޑުތައް ފުރާލުމުގެ އިތުރުން ރާއްޖޭގެ 100 ރަށެއްގައި ފެންވަރު ރަނގަޅު ފުޓްބޯޅަ ދަނޑު އެޅުން ހިމެނެއެވެ.

އެފްއޭއެމްގެ ރައީސްގެ މަގާމަށް ދެވަނަ ދައުރަކަށް އިންތިޚާބުވުމަށް ފަހު ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ބައްސާމް ވިދާޅުވީ އެފްއޭއެމްގެ އައު ހިންގާ ކޮމިޓީގެ ވެސް އެންމެ ބޮޑު މަސްއޫލިއްޔަތަކަށް ވާނީ ރައީސް ވެފައިވާ ވައުދުފުޅުތަކުގެ ތެރޭގައި ހިމެނޭ ފުޓުބޯޅައިގެ ކަންތައްތައް ފުއްދުން ކަމަށެވެ. އެގޮތުން ކުޅިވަރާ ބެހޭ ވުޒާރާއާ ގުޅިގެން އަބަދުވެސް މަސައްކަތް ކުރަމުންދާ ކަމަށް ބައްސާމް ވިދާޅުވިއެވެ.

ކުޅިވަރާ ބެހޭ ވުޒާރާއިން ރާއްޖޭގެ ރަށްރަށުގައި ފެންވަރު ރަނގަޅު ފުޓްބޯޅަ ދަނޑު އެޅުމުގެ މަސައްކަތް ކުރަމުން އަންނައިރު، މިއަހަރުގެ ތެރޭގައި 13 ރަށެއްގެ ފުޓުބޯޅަ ދަނޑުގެ މަސައްކަތް ނިންމާލެވޭނެ ކަމަށް އެ ވުޒާރާއިން ވަނީ ބުނެފައެވެ.

ދާދި ފަހުން ވެސް އެފްއޭއެމުން ވަނީ ރާއްޖޭގެ އެކި ސަރަހައްދުތަކުގައި 20 އާޓިފިޝަލް ގްރާސް ފުޓްބޯޅަ ދަނޑުތައް އަޅަން ކޮރެއާގެ ކުންފުންޏެއް ކަމަށްވާ ސްކައިވިންޑް ގްލޯބަލްއާ އެކު އެއްބަސްވެފައެވެ. މި 20 ދަނޑުގެ ތެރެއިން ތިން ދަނޑު އަޅާނީ މާލެ އާއި ވިލިމާލެ އަދި ހުޅުމާލޭގައި ކަމަށާއި ބާކީ 17 ދަނޑުގެ ގޮތެއް ނިންމާނީ ކުޅިވަރާ ބެހޭ ވުޒާރާއާ މަޝްވަރާކުރުމަށް ފަހު ކަމަށް ކަމަށް މީގެ ކުރިން ބައްސާމް ވަނީ ވިދާޅުވެފައެވެ.

ރާއްޖޭގެ އެކި ކަންކޮޅުތަކުގައި ސަރުކާރާ ގުޅިގެން ފުޓްބޯޅަ ދަނޑުތައް އަޅަމުން އަންނައިރު، ކުރިއަށް އޮތް ދައުރުގައި އެފްއޭއެމްގެ މިހާރުގެ ލީޑަޝިޕުން އެންމެ ބޮޑު އިސްކަމެއްދީގެން ކުރާނެ އެއް ކަމަކީ 2023-2024 ވަނަ އަހަރުގެ ދިވެހި ޕްރިމިއާ ލީގު މުޅި ރާއްޖެ އަށް ފުޅާކޮށްލައިގެން ހޯމް އެންޑް އަވޭ އުސޫލުން ކުރިއަށް ގެންދިއުން ކަމަށް ބައްސާމް ވަނީ ބުރާސްފަތި ދުވަހު ވިދާޅުވެފައެވެ.

މުޅި ރާއްޖެއަށް ދިވެހި ޕްރިމިއާ ލީގު ފުޅާކުރުމުގެ ޕްލޭނެއް އެފްއޭއެމުން އެކުލަވާލާއިރު، މީގެ ކުރިން ކުޅިވަރާ ބެހޭ ވަޒީރު އަޙްމަދު މަޙްލޫފު ވެސް ވަނީ މިކަމާ ގުޅޭ ގޮތުން ބައްސާމާއެކު މަޝްވަރާ ކުރައްވާފައެވެ.