ސްޕެނިޝް ލީގުގައި އަންގާރަ ދުވަހުގެރޭ އެތުލެޓިކޯ މެޑްރިޑާ އެއްވަރުވެ ލީގު ޗެމްޕިއަންކަން ދިފާއުކުރުމަށް ބާސެލޯނާއަށް ހާސްކަމާ ކުރިމަތިލާން ޖެހިއްޖެއެވެ.

އަންގާރަ ދުވަހުގެރޭ ބާސާގެ ދަނޑުގައި ކުޅުނު މެޗު އެއްވަރުވީ 2-2 ގެ ނަތީޖާއަކުންނެވެ.

ދެ ޓީމުގެ ފަރާތުންވެސް ހަމަހަމަ ކުޅުމެއް ފެނިގެންދިޔަ މި މެޗުގެ ވަރަށް ކުރީކޮޅު ބާސާއިން ވަނީ ލީޑު ނަގާފައެވެ. މެޗުގެ 11 ވަނަ މިނެޓުގައި ބާސާގެ ކެޕްޓަން ލިއޮނެލް މެސީ ނަގައިދިން ކޯނަރު ގޯލަށް ވަނީ އެތުލެޓިކޯގެ ފޯވާޑް ޑިއޭގޯ ކޮސްޓާ އަތުން ބައިކޮޅަށެވެ.

އެކަމަކު އޭގެ އަށް މިނެޓު ފަހުން އެތުލެޓިކޯއިން ވަނީ ނަތީޖާ އެއްވަރުކޮށްފައެވެ. ލިބުނު ޕެނަލްޓީއަކުން މި ލަނޑު އެތުލެޓިކޯއަށް ކާމިޔާބުކޮށްދިނީ ސައުލް ނިގޭޒްއެވެ. މިއީ އެތުލެޓިކޯގެ ޔަނިކް ކަރަސްކޯއަށް ބާސާގެ އާޓޫރޯ ވިޑާލް ކުރި ފައުލަކަށް ދިން ޕެނަލްޓީ އެކެވެ. ފުރަތަމަ ކޮސްޓާ ޖެހި ޕެނަލްޓީ ބާސާގެ ގޯލްކީޕަރު ޓާ ސްޓެގެން މަތަކުރި ނަމަވެސް، އޭނާ އެ ބޯޅަ ހުއްޓުވީ ގޯލު ރޮނގަށްވުރެ ކުރިއަށް ޖެހިގެން ހުރެ ކަމަށް ބަލައި އަލުން ޕެނަލްޓީ ޖަހަން ދިނުމުން، ސައުލް ވަނީ ޕެނަލްޓީ ކާމިޔާބުކޮށްފައެވެ.

ބާސާއިން މި މެޗުގައި އަލުން ލީޑު ނެގީ ދެވަނަ ހާފު ފަށައިގެން ފަސްވަނަ މިނެޓުގައެވެ. އެތުލެޓިކޯގެ ފިލިއްޕޭ ބާސާގެ ޑިފެންޑަރު ނެލްސަން ސެމޭޑޯއަށް ކުރި ފައުލަކާ ގުޅިގެން އެޓީމަށް ޕެނަލްޓީއެއް ދިންއިރު، މި ޕެނަލްޓީ ކާމިޔާބުކޮށްދިނީ މެސީއެވެ. މިއީ މެސީ އޭނާގެ ކެރިއަރުގައި ކާމިޔާބުކުރި 700 ވަނަ ލަނޑެވެ.

އެތުލެޓިކޯ އިން ދެވަނަ ފަހަރަށް ނަތީޖާ އެއްވަރުކުރީވެސް ޕެނަލްޓީ އަކުންނެވެ. މެޗުގެ 62 ވަނަ މިނެޓުގައި މި ޕެނަލްޓީ އެތުލެޓިކޯއަށް ކާމިޔާބުކޮށްދިނީ ސައުލްއެވެ. މި ޕެނަލްޓީއަކީ އޭރިއާ ތެރެއިން އެތުލެޓިކޯގެ ކަރަސްކޯއަށް ސެމޭޑޯ ފައުލް ކުރުމުން ދިން ޕެނަލްޓީއެކެވެ.

މި މެޗުން ބާސާ އެއްވަރުވުމުން، ލީގުގެ އެއްވަނައިގައި ހަތަރު ޕޮއިންޓަށް ލީޑު ފުޅާކުރަން ރެއާލް މެޑްރިޑަށް ވަނީ ފުރުސަތު ލިބިފައެވެ. ރެއާލް މި ވަގުތު އެއްވަނައިގައި އޮތީ 32 މެޗުން 71 ޕޮއިންޓާއެކުއެވެ. ދެވަނައިގައި ބާސާ އޮތީ 33 މެޗުން 70 ޕޮއިންޓާއެކުއެވެ. އަދި ތިންވަނައިގައި އޮތް އެތުލެޓިކޯއަށް 33 މެޗުން ލިބިފައިވަނީ 59 ޕޮއިންޓެވެ.