މަޖިލީހުގައި ރެސްޓޯރެންޓަކާއި ޖިމެއްގެ އިތުރުން ފިހާރައެއް ހުޅުވަނީ
1 ޖުލައި 2020 | ބުދަ 07:52ކްލަބުގެ މެމްބަރުންގެ ގޮތުގައި ތިއްބަވަނީ މަޖިލީހުގެ މެމްބަރުންނާއި މަޖިލީހުގެ މުވައްޒަފުން
ރައްޔިތުންގެ މަޖިލިސް އިދާރާ
ރައްޔިތުންގެ މަޖިލީހުގައި ރެސްޓޯރެންޓަކާއި ޖިމެއްގެ އިތުރުން ފިހާރައެއް ހުޅުވުމުގެ މަސައްކަތް ކުރައްވަމުން ގެންދަވާ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ބުދަ ދުވަހުގެ ޖަލްސާގައި ވާހަކަދައްކަވަމުން މަޖިލީހުގެ ރައީސް ވިދާޅުވީ ރައްޔިތުންގެ މަޖިލީހުގެ އިދާރާގެ ސޯޝަލް ކްލަބުން ދަނީ މަޖިލީހުގެ އައު އިމާރާތުގެ ޓެރަހުގައި ރެސްޓޯރެންޓެއް ގާއިމު ކުރުމުގެ މަސައްކަތް ކުރަމުންދާ ކަމަށެވެ. އަދި އެ އިމާރާތުގައި ޖިމެއް ވެސް ގާއިމުކުރުމުގެ މަސައްކަތް ކުރަމުންދާ ކަމަށެވެ.
މިވަގުތު މަޖިލިސް ކްލަބުގެ ގަވާއިދުގައި ބުނާ ގޮތުން އެ ކްލަބުގެ މެމްބަރުންގެ ގޮތުގައި ތިއްބަވަނީ މަޖިލީހުގެ މެމްބަރުންނާއި މަޖިލީހުގެ މުވައްޒަފުންނެވެ.
މިހެން އޮތް ނަމަވެސް ދުނިޔޭގެ ހުރިހާ ތަނެއްގައި ވެސް މި ކްލަބަކީ ކުރީގެ މަޖިލީހުގެ މެމްބަރުންނާޢި ރިޓަޔަރ ވެފައިވާ މަޖިލީހުގެ މުވައްޒަފުންނަށް ބައިވެރިވެވަޑައިގެންނެވޭ ކްލަބެއްކަން ފާހަގަކުރައްވާ އެމަނިކުފާނު ވިދާޅުވީ މި ރެސްޓޯރެންޓުގައި މެމްބަރުންނާއި ދާއިރާގެ ރައްޔިތުން އެކުގައި މަޝްވަރާކޮށް ސައިފޮދު ބެއްލެވޭނެ އިންތިޒާމް ހަމަޖެއްސުމުގެ މަސައްކަތް ކުރައްވަމުން ގެންދަވާ ކަމަށެވެ.
މީގެއިތުރުން މެމްބަރުންނަށް މަޖިލީހުގެ ޔައުމިއްޔާއައި ގާނޫނު ފޮތް ބައި ބައްލަވައިގަތުމަށް މަޖިލީހުގައި ފިހާރައެއް ގާއިމުކުރުމުގެ މަަސައްކަތް ވެސް ކުރިއަށްދާ ކަމަށް ވެސް ވިދާޅުވިއެވެ.
