2019ގެ މާލީ ބަޔާން މިހާތަނަށް ހުށަހަޅުއްވާފައިވަނީ ވަރަށް މަދު ވަޒީރެއް
އޮޑިޓް އޮފީހުން އެންމެ ފަހުން އެ ރިޕޯޓުތައް އާއްމުކޮށްފައިވަނީ މިދިޔަ އަހަރުގެ މާޗް މަހު
ވަޒީރުންގެ މަޖިލީހުގެ ބައްދަލުވުމެއް: މާލީ ބަޔާން ހުށައަޅާފައިވަނީ ކިތައް ވަޒީރުންކަމެއް އަދި ކަށަވަރުވެފައެއް ނުވޭ
2019 ވަނަ އަހަރުގެ މާލީ ބަޔާން މިހާތަނަށް ހުށަހަޅުއްވާފައިވަނީ ވަރަށް މަދު ވަޒީރެއްކަން ރާއްޖެއެމްވީއަށް މައުލޫމާތު ލިބިއްޖެއެވެ.
އިތުބާރުހުރި މަސްދަރަކުން ރާއްޖެއެމްވީއަށް މައުލޫމާތު ލިބިފައިވާގޮތުގައި މިހާތަނަށް މިދިޔަ އަހަރުގެ މާލީ ބަޔާން ހުށަހަޅުއްވާފައިވަނީ ވަރަށް މަދު ވަޒީރެކެވެ. ނަމަވެސް ހުސްވި އަހަރުގެ މާލީ ބަޔާން ހުށަހަޅުއްވާފައިވަނީ ކިތައް ވަޒީރުންކަމެއް އަދި ކަށަވަރުވެފައެއް ނުވެއެވެ.
މިއަހަރު ވަޒީރުންގެ އޮޑިޓް ރިޕޯޓުތައް އަދި އާއްމުކޮށްފައި ނުވާއިރު އޮޑިޓް އޮފީހުން އެންމެ ފަހުން އެ ރިޕޯޓުތައް އާއްމުކޮށްފައިވަނީ މިދިޔަ އަހަރުގެ މާޗްމަހުގެ ތެރޭގައެވެ.
މިކަމާއި ގުޅިގެން ރާއްޖެއެމްވީން އޮޑިޓަރ ޖެނެރަލްގެ އޮފީހާއި ގުޅާލުމުން ބުނީ، މައުލޫމާތު ހޯދާ ލިބިގަތުމުގެ ހައްގުގެ ދަށުން ފުރަން ޖެހޭ ފޯމު ފުރުމަށް ފަހު، މައުލޫމާތު ހޯދަން ހުށައެޅުމަށެވެ. އަދި މިހާތަނަށް ލިބިފައިވާ ރިޕޯޓުތައް އޮޑިޓު އޮފީހުގެ ވެބްސައިޓުގައި އަންނަ އާދިއްތަ ދުވަހު އާއްމުކުރާނެ ކަމަށް ވެސް އެ އޮފީހުން މައުލޫމާތު ދީފައިވެއެވެ.
ދިވެހިރާއްޖޭގެ ގާނޫނު އަސާސީގެ މުދަލާއި ފައިސާގެ ބަޔާން ހާމަކުރުމުގެ މާއްދާގައި ވާގޮތުން ވަޒީރުންގެ މަޖިލީހުގެ ކޮންމެ މެންބަރަކުމެ، ކޮންމެ އަހަރަކު އެއް ފަހަރު މެންބަރެއްގެ މިލްކިއްޔާތުގައިވާ މުދަލާއި ފައިސާގެ ހިސާބުތަކާއި، ވިޔަފާރީގެ މަޞްލަޙަތުތަކާއި އަރަންޏާއި ދަރަނި ހާމަކޮށް ތައްޔާރުކުރާ ބަޔާނެއް އޮޑިޓަރ ޖެނެރަލަށް ހުށަހަޅަންޖެހެއެވެ.
