ޕްރިމިއާ ލީގުން އިތުރު މީހަކު ކޮރޯނާވައިރަހަށް ޕޮޒިޓިވް ވެއްޖެ

އިނގިރޭސި ޕްރިމިއާ ލީގުން އިތުރު މީހަކު ކޮރޯނާވައިރަސް (ކޮވިޑް-19) ށް ޕޮޒިޓިވް ވެއްޖެއެވެ.

100 ދުވަހަށް ފަހު ޕްރިމިއާ ލީގު އަލުން ފަށާފައިވަނީ މި މަހުގެ 17 ވަނަ ދުވަހެވެ. ޕްރިމިއާ ލީގު އަލުން ފެށި ނަމަވެސް، އެ ލީގުން އަންނަނީ ކްލަބުތަކުގެ ކުޅުންތެރިންނާއި އޮފިޝަލުން ކޮވިޑް-19ށް ޓެސްޓު ކުރަމުންނެވެ.

އެގޮތުން މިހާތަނަށް 11 ބުރެއްގެ މަތިން ކުޅުންތެރިންނާއި އޮފިޝަލުން ކޮވިޑް-19ށް ޓެސްތު ކޮށްފައިވާއިރު، ފަހުން ކުރިއަށް ގެންދިޔަ ޓެސްޓު ކުރުމުގެ ބުރުގައި 2،250 މީހަކު ވަނީ ޓެސްޓު ކޮށްފައެވެ. މި ބުރުން އިތުރު އެއް މީހަކު ވައިރަހަށް ޕޮޒިޓިވް ވިކަން ޕްރިމިއާ ލީގުން ވަނީ ހާމަކޮށްފައެވެ. އެކަމަކު އެ މީހާގެ އެއްވެސް މައުލޫމާތެއް ހާމަކޮށްފައެއް ނުވެއެވެ.

ޕްރިމިއާ ލީގު އަލުން ފަށައިގެން ކުރިއަށްދާއިރު، ބާކީ ހަތް މެޗު އޮއްވައި ލިވަޕޫލުން ވަނީ މި ސީޒަނުގެ ޕްރިމިއާ ލީގުގެ ޗެމްޕިއަންކަން ކަށަވަރުކޮށްފައެވެ. މިއީ އެޓީމުން 1989-1990 ގެ ސީޒަނުގެ ފަހުން އިނގިރޭސި ޗެމްޕިއަންކަން ހޯދި ފުރަތަމަ ފަހަރެވެ. އަދި އެ ޓީމުން އިނގިރޭސި ޗެމްޕިއަންކަން ހޯދި ޖުމްލަ 19 ވަނަ ފަހަރެވެ. އެކަމަކު މިއީ 1992 ވަނަ އަހަރު އިނގިރޭސި ފުރަތަމަ ޑިވިޝަން، ޕްރިމިއާ ލީގަށް ރިބްރޭންޑްކުރި ފަހުން އެ ޓީމުން ޗެމްޕިއަންކަން ހޯދި ފުރަތަމަ ފަހަރެވެ.

ލީގު ޗެމްޕިއަންކަން ލިވަޕޫލުން ކަށަވަރުކުރިއިރު، އެޓީމު އެއްވަނައިގައި އޮތީ 23 ޕޮއިންޓުގެ ލީޑަކާއެކުއެވެ. ލިވަޕޫލަށް 31 މެޗުން 86 ޕޮއިންޓު ލިބިފައިވާއިރު، ދެވަނައިގައި އޮތް މެންޗެސްޓާ ސިޓީއަށް 31 މެޗުން ލިބިފައިވަނީ 63 ޕޮއިންޓެވެ.