ޔުވެންޓަސްގެ އެއްބަސްވުން ބުފޮން އާއި ކިއެލީނީ އާކޮށްފި

ޔުވެންޓަސް އާއެކު ގޯލްކީޕަރު ޖިއަންލުއިޖީ ބުފޮން އާއި ކެޕްޓަން ޖިއޯޖިއޯ ކިއަލީނީ ހަދާފައިވާ އެއްބަސްވުން އިތުރު އެއް އަހަރަށް އާކޮށްފިއެވެ.

އެއްބަސްވުން އާކުރުމަށް ފަހު ބުފޮން ބުނީ އޭނާ އާއި ކިއަލީނީ އުންމީދުކުރި ގޮތަށް، ދެމީހުން ވަކިނުވެ އަނެއްކާވެސް ގުޅިގެން ކުރިން ކުޅުނު ގޮތަށް ކުޅެވޭނޭ ކަމަށެވެ. އަދި އެ ދެ މީހުންގެ ގުޅުން ކެނޑުމަށް ދުނިޔެވެސް އެއްބަސްނުވާ ކަމަށް ބުފޮން ބުންޏެވެ.

ޔުވެންޓަސްގެ އެއްބަސްވުން އިތުބާރު ޑިފެންޑަރު ކިއެލީނީ އާކުރިއިރު، އޭނާ ވަނީ މިދިޔަ އަހަރުގެ އޮގަސްޓް މަހުގެ ފަހުކޮޅު ފަރިތަކުރުންތަކުގެ ތެރެއިން ކަކުލަށް ލިބުނު ސީރިއަސް އަނިޔާއަކުން ރަނގަޅުވުމަށް އޮޕަރޭޝަނެއް ކޮށްފައެވެ. އެ އަނިޔާއާ ގުޅިގެން ހަ މަސް ދުވަހު ކުޅުމާ ދުރުގައި ކިއަލީނީ ހުންނަށް ޖެހުނުއިރު، އޭނާގެ ކުޅުމުގެ ތެރެއަށް އައީ މިއަހަރުގެ ފެބްރުއަރީ މަހުގެ ތެރޭގައެވެ.

އުމުރުން 35 އަހަރުގެ ކިއެލީނީ ދާދި ފަހުން ވަނީ ކުޅުން ހުއްޓާލަން ބޭނުންނުވާ ކަމަށާއި، އަންނަ އަހަރަށް ފަސްކުރި ޔޫރޯގައިވެސް ކުޅެން ގަސްތުކުރާ ކަމަށް ބުނެފައެވެ.

އުމުރުން މިހާރު 42 އަހަރުގެ ބުފޮން ވަނީ ޔުވެންޓަސްގައި 17 އަހަރު ހޭދަކުރުމަށްފަހު 2018 ވަނަ އަހަރު އެ ކްލަބު ދޫކޮށްލުމަށްފަހު ޕީއެސްޖީއަށް ބަދަލުވެފައެވެ. އެކަމަކު މިދިޔަ އަހަރު އޭނާ އެނބުރި ޔުވެންޓަސްއާ ގުޅުނުއިރު، މި ސީޒަނުގައި ބުފޮން ވަނީ މިހާތަނަށް 13 މެޗު ކުޅެދީފައެވެ. އަދި މިހާތަނަށް ޔުވެންޓަސްއަށް ޖުމްލަ 669 މެޗު ކުޅެދީފައިވާ ބުފޮން ވަނީ އެ ކްލަބާއެކު އިޓާލިއަން ލީގު ނުވަ ފަހަރު ހޯދާފައެވެ.

މީގެ އިތުރުން ލިވޯނޯއިން މީގެ 20 އަހަރު ކުރިން ކެރިއަރު ފަށައި ރޯމާ އާއި ފިއޮރެންޓީނާއަށްވެސް ކުޅުނު ކިއެލީނީ އަކީ 2005ން ފެށިގެން ޔުވެންޓަސްގެ މުހިންމު ކުޅުންތެރިޔެކެވެ. އަދި ފަބިއޯ ކަނަވާރޯ ކުޅުން ހުއްޓާލި ހިސާބުން ފެށިގެން، އޭނާއަކީ އިޓަލީގެ އެންމެ އިތުބާރު ޑިފެންޑަރެވެ. ޔުވަންޓަސްއަށް މިހާތަނަށް 509 މެޗު ކުޅެދީފައިވާ ކިއެލީނީ ވަނީ ގައުމީ ޓީމަށް 2004ން ފެށިގެން 103 މެޗު ކުޅެދީފައެވެ.