ވީޑިއޯ ކޮންފަރެންސް މެދުވެރިކޮށް ޝަރީއަތް ކުރިއަށް ގެންދެވޭ ގޮތަށް ހުށަހެޅި އިސްލާހު މަޖިލިހުން ފާސްކޮށްފި
29 ޖޫން 2020 | ހޯމަ 09:28އޯޑިއޯ އަދި ވީޑިއޯ ކޮންފަރެންސިންގ މެދުވެރިކޮށް ޝަރީއަތް ކުރިއަށް ގެންދުމާގުޅޭ މުހިއްމު ކަންކަން މިބިލްގައި ހިމެނޭ
ދިވެހިރާއްޖޭގެ ސުޕްރީމް ކޯޓުން އޯޑިއޯ އަދި ވީޑިއޯ ކޮންފަރެންސިންގ މެދުވެރިކޮށް ޝަރީއަތެއް ކުރިއަށް ގެންދަނީ
އޯޑިއޯ އަދި ވީޑިއޯ ކޮންފަރެންސް މެދުވެރިކޮށް، ޝަރީއަތް ކުރިއަށް ގެންދެވޭނެގޮތް ތަފްސީލު ކޮށްދިނުމުގެ ގޮތުން، ޖިނާއީ އިޖުރާއަތުގެ ގާނޫނަށް އިސްލާހު ގެނައުމުގެ ބިލު ރައްޔިތުންގެ މަޖިލީހުން ފާސްކޮށްފިއެވެ.
ހޯމަ ދުވަހުގެ ޖަލްސާގައި މި ބިލު ރައްޔިތުންގެ މަޖިލީހުން ފާސްކޮށްފައިވަނީ ވޯޓުގައި ބައިވެރިވި 58 މެމްބަރުންގެ އަޣްލަބިއްޔަތުންނެވެ. މި ބިލު ފާސްކުރުމަށް ނުފެންނަ ކަމަށް އެއް މެމްބަރަކު ވޯޓު ދެއްވިއެވެ.
މި ބިލު ދިރާސާ ކޮށްފައިވަނީ ޖުޑީޝަރީ ކޮމެޓީންނެވެ. ކޮމެޓީގެ ރިޕޯޓްގައި ޖިނާއީ އިޖުރާއަތުގެ ގާނޫނަށް އިސްލާހު ގެނައުމުގެ މި ބިލާ ގުޅިގެން ކޮމެޓީން ވެސް ވަނީ ކަމާބެހޭ ފަރާތްތަކުގެ މަޝްވަރާއާއެކު އިސްލާހުތަކެއް ހުށަހަޅުއްވާފައެވެ.
އެގޮތުން ޖިނާއީ އިޖުރާއަތުގެ ގާނޫނުގެ 19 ވަނަ މާއްދާއަށް، ބައެއް އިތުރުކޮށް، އޯޑިއޯ އަދި ވީޑިއޯ ކޮންފަރެންސް މެދުވެރިކޮށް އެއް މާލަމަށްވުރެ ގިނަ މާލަން ގުޅުވާލައިގެން ބާއްވާ ކޮންމެ އަޑުއެހުމަކީ ވެސް، ފަނޑިޔާރެއްގެ ކުރިމަތީގައި ބާއްވާ ޝަރީއަތުގެ މަޖިލީހެއްގެ ގޮތުގައި ވަނީ ކަނޑައަޅާފައެވެ.
މީގެއިތުރުން، މުހިއްމު ބައެއް އިސްލާހުތަކަށް ބަލާއިރު، ފަނޑިޔާރު ކަނޑައަޅާ ހާއްސަ ހާލަތްތަކުގައި، އަދުލު އިންސާފުގެ ހަމަތައް ނުގެއްލޭނެ ގޮތުގެމަތިން، އަޑުއެހުންތަކާއި ޝަރީއަތްތައް ހިންގާ ކޯޓުގެ މާލަމާއި، މައްސަލައިގައި ހިމެނޭ އެހެނިހެން ފަރާތްތައް ތިބޭ މާލަންތައް، އޯޑިއޯ އަދި ވީޑިއޯ ކޮންފަރެންސިންގ މެދުވެރިކޮށް ގުޅުވާލައިގެން، އަޑުއެހުންތަކާއި ޝަރީއަތްތައް ކުރިއަށް ގެންދިއުމުގެ އިހުތިޔާރު ފަނޑިޔާރަށް ލިބިގެންވެއެވެ. މިގޮތުން ހާއްސަ ހާލަތެއް ކަމަށް ފަނޑިޔާރަށް ކަނޑައެޅިދާނެ ކަމަށް ވެސް ބުނެފައިވެއެވެ.
އެގޮތުން، އެއީ ގާނޫނު އަސާސީން ނުވަތަ ގާނޫނަކުން ބާރު ލިބިގެން އިއުލާންކޮށްފައިވާ ކުއްލި ނުރައްކަލުގެ ހާލަތެއް ނުވަތަ ކާރިސާގެ ހާލަތެއްގެ ސަބަބުން ޝަރީއަތުގެ މަޖިިލީހަށް ހާޒިރުވުމުގައި ރައްކާތެރިކަމެއް ނެތުން ކަމަށް ބުނެފައިވެއެވެ. އަދި ޖޯގުރަފީ ގޮތުން ރަށްތަކާއި ސަރަހައްދުތައް އެތުރިފައިވާ ގޮތުގެ ސަބަބުން ދަތުރުފަތުރު ކުރުމަށް، މޫސުމީ ގޮތުންނާއި ޚަރަދުގެ ގޮތުންނާއި ނުވަތަ ޖިނާއީ އަދުލުގެ ނިޒާމު ހިންގުމުގެ އިންތިޒާމުތައް އެ ރަށެއްގައި ނުވަތަ އެ ސަރަހައްދެއްގައި ގާއިމުކުރެވިފައިވާ ގޮތްތަކަށް އެވަގުތަކު އޮތް ހުރަސްތަކާއި ގޮންޖެހުންތަކަށް ރިއާޔަތްކުރުމާއެކު، އަދި ހުށަހެޅިފައިވާ މައްސަލައެއް ނިންމުމަށް ލަސްވުން މެދުވެރިވެ، އަދުލް އިންސާފު ގާއިމުކުރުމަށް ބުރޫއަރާފާނެ ހާލަތެއް އޮތުން ހިމެނެވެ.
މީގެއިތުރުން ވެސް ގިނަ އިސްލާހުތަކެއް ޖިނާއީ އިޖުރާއަތުގެ ގާނޫނަށް އިސްލާހު ގެނައުމުގެ ކޮމެޓީ ރިޕޯޓުގައި ވެއެވެ.
