ހުޅުމާލެ ރޭޕް ކޭސް: އެންމެ ފުރިހަމަޔަށް އަދި އަވަހަށް މައްސަލަ ބަލައިދީ
29 ޖޫން 2020 | ހޯމަ 02:32ޖިންސީ އަނިޔާކުރުމާއި ގެވެށި އަނިޔާގެ މައްސަލަތައް ރާއްޖޭގައި އިތުރުވަމުންދާތީ އެމްއާރްއެމުން ކަންބޮޑުވޭ
އެމްއާރްއެމް އުފެއްދުމަށް ދަރުބާރުގޭގައި ބޭއްވި ޖަލްސާގެ ތެރެއިން
މިދިޔަ ހުކުރު ދުވަހުގެރޭ ހުޅުމާލެ ފަޅުތެރޭގައި އޮތް ސަފާރީ ބޯޓެއްގައި އަންހެނަކު ރޭޕް ކުރިކަމަށް ތުހުމަތުކުރެވޭ މައްސަލައިގައި، ކުށުގެ ވެށިން ހައްޔަރު ކުރިކަމަށް ބުނެވޭ ދެ ފިރިހެނުންގެ މައްސަލަ ބެލެން އޮތް އެންމެ ފުރިހަމަކޮށް އަދި އަވަހަށް މައްސަލަ ބަލައި ދިނުމަށް ސަރުކާރު ކޯލިޝަން ގައި ހިމެނޭ މޯލްޑިވްސް ރިފޯމް މޫވްމެންޓް (އެމްއާރްއެމް) އިން ގޮވާލައިފިއެވެ.
ޖިންސީ އަނިޔާކުރުމާއި ގެވެށި އަނިޔާގެ މައްސަލަތައް ރާއްޖޭގައި އިތުރުވަމުންދާތީ އެކަމާއި ކަންބޮޑުވުން ފާޅުކޮށް އެ ޕާޓީން ނެރުނު ބަޔާނެއްގައި ބުނީ، އެ ފަދަ މައްސަލަތައް އިތުރަވުން ދިޔުމަކީ ކަންބޮޑުވާ ކަމެއް ކަމަށެވެ. އެފަދަ ލާ އިންސާނީ އަދި ނާތަހުޒީބީ އަމަލުތައް މުޖުތަމައުން ނައްތާލުމަށް ކުރެވެން އޮތް ހުރިހާކަ މެއް ކުރުމަށް ޖިނާއީ އަދުލުގެ ނިޒާމު ދަމަހައްޓަން ހަވާލު ކުރެވިފައިވާ އެންމެހާ ފަރާތްތަކަށް އެ ޕާޓީން ވަނީ އިލްތިމާސްކޮށްފައެވެ.
އަނިޔާގެ ކަންކަމުގެ ފަރުވާއަކަށް ވާނީ އަނިޔާ ލިބޭ ފަރާތަކަށް އިންސާފާއި ރައްކާތެރިކަން ކަށަވަރު ކުރުން ކަމަށްވާއިރު، އިންސާފު ހޯދައި ދިނުމަށްޓަކައި ގާނޫނު ތަންފީޒު ކުރުމަށް މަތިކޮށްފައިވާ އިދާރާތަކުން ވަކި ފަރާތަކަށް ބުރަނުވެ ހަމަ އާއި އިންސާފުން މައްސަލަތައް ތަހުގީގުކޮށް، ކުށްވެރިންނަށް ހައްގު އަދަބު ދިނުމަށް އެ ޕާޓީން ގޮވާލިއެވެ.
ބެލެންއޮތް އެންމެ ފުރިހަމައަށް އަދި އަވަހަށް މައްސަލަ ބަލައި އަދުލުވެރިކަމާއެކު ތަހުގީގު ކުރުމަކީ، ކުށުގެ ތުހުމަތު ކުރެވޭ ފަރާތަކީ އެކުށް ނުކުރާ މީހަކުނަމަ އެމީހަކަށް އިންސާފު ހޯދައިދިނުމަށް ވެސް އޮތް އެންމެ ރަނގަޅު މަގު ކަމަށް ދެކޭ ކަމަށް އެ ޕާޓީގެ ބަޔާނުގައި ބުންޏެވެ.
މި ރޭޕް ކޭސްގެ މައްސަލައާ ގުޅިގެން އާދިއްތަ ދުވަހުގެ ރޭ ފުލުހުން ނެރުނު ބަޔާނުގައި ބުނީ، ހުޅުމާލެ ފަޅުގައި އަޅާފައި އޮތް ސަފާރީއެއްގައި ދިވެހިރާއްޖޭގައި މަސައްކަތް ކުރާ އުމުރުން 27 އަހަރުގެ ބިދޭސީ އަންހެނަކަށް ގަދަކަމުން ޖިންސީ ގޯނާކުރި މައްސަލަ ހުށަހެޅިފައިވަނީ 26 ވަނަ ދުވަހުގެ ފަތިހު ފަހެއް ޖެހިހާއިރު ކަމަށެވެ. ފުލުހުން ބުނީ، ހުޅުމާލެ ލަކުޑި ޖެޓީ ސަރަހައްދުގައި އެ އަންހެން މީހާއާއި އިތުރު ދެ ފިރިހެނަކު ތިއްބާ ފުލުހުން އެތަނަށް ގޮސް މައުލޫމާތު އޮޅުން ފިލުވާފައިވާ ކަމަށެވެ.
އެ އަންހެން މީހާގެ ފަރާތުން ފުލުހުންނަށް މަޢުލޫމާތު ދީފައިވަނީ، ޖޫން މަހުގެ 25 ވަނަ ދުވަހުގެރޭ އޭނާގެ ރައްޓެއްސެއްގެ ފަރާތުން ލިބުނު ދައުވަތަކަށް ކަމަށާއި، އެ މައްސަލައިގައި ތުހުމަތުކުރެވޭ ދެ މީހުންނާއެކު ސަފާރީއަކަށް ގޮސް ވަގުތު ހޭދަކުރި ކަމަށާއި، އެ މީހުން، ސަފާރީ ތެރޭގައި އޭނާގެ ނުރުހުމުގައި އޭނާއަށް ޖިންސީ ގޯނާކުރި ކަމަށާއި، އެ މީހުންގެ އަމަލުތައް ހުރި ގޮތުން އެފަދަ އަމަލެއް ތަކުރާރުކޮށްފާނެތީ ސަލާމަތްވުމުގެ ގޮތުން މޫދަށް ފުންމާލުމުން ޑިންގީއެއްގައި އެ ދެމީހުން އައިސް އޭނާ ޑިންގީއަށް ނަގައިގެން ގެނެސް ޖެޓީއަށް ބޭލި ކަމަށް ވެސް ބަޔާނުގައިވެއެވެ.
އެކަން ފުލުހުންނަށް ހުށަހެޅުމުން، އެތަނުގައި ތިބި ދެ ފިރިހެނުން އެވަގުތު ފުލުހުންގެ ބެލުމުގެ ދަށަށް ގެނެސްފައިވަނީ، އެއީ ދެމިގެންދިޔަ ކުށުގެ ވެއްޓެއް ކަމަށްވާތީ ކަމަށް ބަޔާންކޮށް ފުލުހުން ބުނީ މައްސަލައިގައި ޖިންސީ އަނިޔާ ލިބުނު މީހާ 26 ވަނަ ދުވަހުގެ ހެނދުނު ހޮސްޕިޓަލަށް ގެންގޮސް ޑޮކްޓަރަށް ދައްކާފައިވާ ކަަމަށެވެ.
އެ މައްސަލައާ ގުޅިގެން ފުލުހުންގެ ބެލުމުގެ ދަށަށް ގެނެވުނު އުމުރުން 39 އަހަރުގެ ދެ މީހުން ބަންދުން ދޫކޮށްލާފައިވަނީ އެ ވަގުތާ ހަމައަށް ލިބިފައި ހުރި މަޢުލޫމާތުތަކަށް ބަލާއިރު، ބަންދުގައި ބައިތިއްބައިގެން ތަހުގީގު ކުރިއަށް ގެންދިއުމަށް ނުފެންނާތީ ކަމަށް ފުލުހުން ކުރިން ބުނި ވާހަކަތައް، ބަޔާނުގައި ވަނީ ތަކުރާރުކޮށްފައެވެ.
